၆. ဒုတိယသဟသေယျသိက္ခာပဒဝဏ္ဏနာ

မနုဿိတ္ထိယာတိ ဇီဝမာနကမနုဿိတ္ထိယာ. ‘‘မတိတ္ထီ ပန ကိဉ္စာပိ ပါရာဇိကဝတ္ထုဘူတာ၊ အနုပါဒိန္နပက္ခေ ပန ဌိတတ္တာ သဟသေယျာပတ္တိံ န ကရောတီ’’တိ (ဝဇိရ. ဋီ. ပါစိတ္တိယ ၅၅) ဝဒန္တိ. အဒိဿမာနရူပါဟိ ပန ယက္ခိပေတီဟိ၊ မေထုနဿ အဝတ္ထုဘူတာယ စ တိရစ္ဆာနဂတိတ္ထိယာ အနာပတ္တိ. ပဌမဒိဝသေပီတိ ပဌမသ္မိံ ဝိယ သိက္ခာပဒေ န စတုတ္ထေယေဝ ဒိဝသေ၊ အထ ခေါ ဣဓ ပဌမဒိဝသေပီတိ အတ္ထော. ဣမိနာ ဣဓ ဒိဝသပရိစ္ဆေဒေါ နတ္ထီတိ ဒဿေတိ. အင်္ဂေသု ပန ပါစိတ္တိယဝတ္ထုကသေနာသနံ၊ တတ္ထ မာတုဂါမေန သဟ နိပဇ္ဇနံ၊ သူရိယတ္ထင်္ဂမနန္တိ တီဏိ အင်္ဂါနီတိ အယမ္ပိ ဝိသေသော ဒဋ္ဌဗ္ဗော.

ဒုတိယသဟသေယျသိက္ခာပဒဝဏ္ဏနာ နိဋ္ဌိတာ.