အသေက္ခဓမ္မဒသကဝဏ္ဏနာ

ဖလဉ္စ တေ သမ္ပယုတ္တဓမ္မာ စာတိ ဖလသမ္ပယုတ္တဓမ္မာ၊ အရိယဖလသဘာဝါ သမ္ပယုတ္တာ ဓမ္မာတိ အတ္ထော. ဖလသမ္ပယုတ္တဓမ္မာတိ ဖလဓမ္မာ စေဝ တံသမ္ပယုတ္တဓမ္မာ စာတိ ဧဝမေတ္ထ အတ္ထော ဝေဒိတဗ္ဗော. ဒွီသုပိ ဌာနေသု ပညာဝ ကထိတာ သမ္မာ ဒဿနဋ္ဌေန သမ္မာဒိဋ္ဌိ၊ သမ္မာ ဇာနနဋ္ဌေန သမ္မာဉာဏန္တိ စ. အတ္ထိ ဟိ ဒဿနဇာနနာနံ သဝိသယေ ပဝတ္တိအာကာရဝိသေသော၊ သွာယံ ဟေဋ္ဌာ ဒဿိတော ဧဝ. ဖလသမာပတ္တိဓမ္မာတိ ဖလသမာပတ္တိယံ ဓမ္မာ၊ ဖလသမာပတ္တိသဟဂတဓမ္မာတိ အတ္ထော. အရိယဖလသမ္ပယုတ္တဓမ္မာပိ ဟိ သဗ္ဗသော ပဋိပက္ခတော ဝိမုတ္တတံ ဥပါဒါယ ‘‘ဝိမုတ္တီ’’တိ ဝတ္တဗ္ဗတံ လဘန္တိ. ကေနစိ ပန ယထာ အသေက္ခာ ဖလပညာ ဒဿနကိစ္စံ ဥပါဒါယ ‘‘သမ္မာဒိဋ္ဌီ’’တိ ဝုတ္တာ၊ ဇာနနကိစ္စံ ဥပါဒါယ ‘‘သမ္မာဉာဏ’’န္တိပိ ဝုတ္တာ ဧဝ၊ ဧဝံ အရိယဖလသမာဓိ သမာဒါနဋ္ဌံ ဥပါဒါယ ‘‘သမ္မာသမာဓီ’’တိ ဝုတ္တော၊ ဝိမုစ္စနဋ္ဌံ ဥပါဒါယ ‘‘သမ္မာဝိမုတ္တီ’’ တိပိ ဝုတ္တော. ဧဝဉ္စ ကတွာ ‘‘အနာသဝံ စေတောဝိမုတ္တိ’’န္တိ ဒုတိယဝိမုတ္တိဂ္ဂဟဏဉ္စ သမတ္ထိတံ ဟောတီတိ.

ဒသကဝဏ္ဏနာ နိဋ္ဌိတာ.