နေတံဌာနံဝိဇ္ဇတိဝါရဝဏ္ဏနာ

၁၃၁. တဿ ပစ္စယဿာတိ ဖဿပစ္စယဿ ဒိဋ္ဌိဝေဒယိတေတိ ဒိဋ္ဌိယာ ပစ္စယဘူတေ ဝေဒယိတေ၊ ဖဿပဓာနေဟိ အတ္တနော ပစ္စယေဟိ နိပ္ဖါဒေတဗ္ဗေတိ အတ္ထော. ဝိနာပိ စက္ခာဒိဝတ္ထူဟိ၊ သမ္ပယုတ္တဓမ္မေဟိ စ ကေဟိစိ ဝေဒနာ ဥပ္ပဇ္ဇတိ၊ န ပန ကဒါစိ ဖဿေန ဝိနာတိ ဖဿော ဝေဒနာယ ဗလဝကာရဏန္တိ အာဟ ‘‘ဗလဝဘာဝဒဿနတ္ထ’’န္တိ. သန္နိဟိတောပိ ဟိ ဝိသယော သစေ ဖုသနာကာရရဟိတော ဟောတိ စိတ္တုပ္ပါဒေါ၊ န တဿ အာရမ္မဏပစ္စယေန ပစ္စယော ဟောတီတိ ဖဿောဝ သမ္ပယုတ္တဓမ္မာနံ ဝိသေသပစ္စယော. တထာ ဟိ ဘဂဝတာ စိတ္တုပ္ပါဒံ ဝိဘဇန္တေန ဖဿောယေဝ ပဌမံ ဥဒ္ဓဋော၊ ဝေဒနာယ ပန အဓိဋ္ဌာနမေဝ.