၈. ဒေဝဒတ္တသုတ္တဝဏ္ဏနာ

၆၈. အဋ္ဌမေ ကာလေ သမ္ပတ္တေတိ ဂဗ္ဘဿ ပရိပါကဂတတ္တာ ဝိဇာယနကာလေ သမ္ပတ္တေ. ပေါတကန္တိ အဿတရိယာ ပုတ္တံ. ‘‘ဖလံ ဝေ ကဒလိံ ဟန္တီ’’တိအာဒိဂါထာယ ကုက္ကုဇကေနေဝ ပတ္တဝဋ္ဋိပသဝဿ ဥစ္ဆိန္နတ္တာ ဖလုပ္ပတ္တိ ကဒလိယာ ပရာဘဝါယ ဟောတီတိ အာဟ ‘‘ဖလံ ဝေ ကဒလိံ ဟန္တီ’’တိ. ကုက္ကုဇကံ နာမ ကဒလိယာ ပုပ္ဖနာဠံ. တထာ ဖလပါကပရိယောသာနတ္တာ ဩသဓီနံ ‘‘ဖလံ ဝေဠုံ နဠ’’န္တိ ဝုတ္တံ. အယံ ပနေတ္ထ ပိဏ္ဍတ္ထော – ယထာ အတ္တနော ဖလံ ကဒလိဝေဠုနဠေ ဝိနာသေတိ၊ ဂဗ္ဘော စ အဿတရိံ၊ ဧဝံ အတ္တနော ကမ္မဘူတော သက္ကာရော အသပ္ပုရိသံ ဝိနာသေတီတိ.

ဒေဝဒတ္တသုတ္တဝဏ္ဏနာ နိဋ္ဌိတာ.