၉. ပဓာနသုတ္တဝဏ္ဏနာ

၆၉. နဝမေ ပဒဟတိ ဧတေဟီတိ ပဓာနာနိ. ဥတ္တမဝီရိယာနိ သေဋ္ဌဝီရိယာနိ ဝိသိဋ္ဌဿ အတ္ထဿ သာဓနတော. ကိလေသာနံ သံဝရတ္ထာယာတိ ယထာ အဘိဇ္ဈာဒယော န ဥပ္ပဇ္ဇန္တိ၊ ဧဝံ သတိယာ ဥပဋ္ဌာနေန ကိလေသာနံ သံဝရဏတ္ထာယ. ပဇဟနတ္ထာယာတိ ကာမဝိတက္ကာဒီနံ ဝိနောဒနတ္ထာယ. ပဓာနန္တိ တဿေဝ ပဇဟနဿ သာဓနဝသေန ပဝတ္တဝီရိယံ. ကုသလာနံ ဓမ္မာနံ ဗြူဟနတ္ထာယာတိ ဗောဇ္ဈင်္ဂသင်္ခါတာနံ ကုသလဓမ္မာနံ ဝဍ္ဎနတ္ထာယ. ပဓာနန္တိ တဿေဝ ဝဍ္ဎနဿ သာဓနဝသေန ပဝတ္တဝီရိယံ.

ပဓာနသုတ္တဝဏ္ဏနာ နိဋ္ဌိတာ.