၇. ဝဿကာရသုတ္တဝဏ္ဏနာ

၁၈၇. သတ္တမေ ဝဿကာရော ဗြာဟ္မဏော မဂဓမဟာမတ္တောတိ ဧတ္ထ ဝဿကာရောတိ တဿ ဗြာဟ္မဏဿ နာမံ. မဟတိယာ ဣဿရိယမတ္တာယ သမန္နာဂတော မဟာမတ္တော. ဣဿရိယမတ္တာယာတိ စ ဣဿရိယပ္ပမာဏေနာတိ အတ္ထော၊ ဣဿရိယေန စေဝ ဝိတ္တူပကရဏေန စာတိ ဧဝံ ဝါ ဧတ္ထ အတ္ထော ဒဋ္ဌဗ္ဗော၊ ဥပဘောဂူပကရဏာနိပိ ဟိ လောကေ ‘‘မတ္တာ’’တိ ဝုစ္စန္တိ. မဂဓရညော၊ မဂဓရဋ္ဌေ ဝါ မဟာမတ္တောတိ မဂဓမဟာမတ္တော. တုဒိသညိတော ဂါမော နိဝါသော ဧတဿာတိ တောဒေယျော. တေနေဝါဟ ‘‘တုဒိဂါမဝါသိကဿာ’’တိ. တုဒိဂါမဝါသိတာ စဿ တတ္ထ အဓိပတိဘာဝေနာတိ ဒဋ္ဌဗ္ဗာ. သော ဟိ တံ ဂါမံ သောဏဒဏ္ဍော ဝိယ၊ စမ္ပံ ကူဋဒန္တော ဝိယ၊ ခါဏုမတံ အဓိပတိဘာဝေန အဇ္ဈာဝသတိ. မဟဒ္ဓနော ဟောတိ ပဉ္စစတ္တာလီသကောဋိဝိဘဝေါ. ပရိသတီတိ ပရိသာယံ၊ ဇနသမူဟေတိ အတ္ထော. တေနာဟ ‘‘သန္နိပတိတာယ ပရိသာယာ’’တိ. အဘိပ္ပသန္နောတိ ဧတ္ထ အဘိက္ကမနတ္ထော အဘိ-သဒ္ဒေါတိ အာဟ ‘‘အတိက္ကမ္မ ပသန္နော’’တိ၊ ပသာဒနီယံ ဌာနံ အတိက္ကမိတွာ အပ္ပသာဒနီယဋ္ဌာနေ ပသန္နောတိ အဓိပ္ပါယော. တံ တံ ကိစ္စံ အတ္ထံ ပဿတီတိ အတ္ထဒသာ၊ အလံ သမတ္ထာ ပဋိဗလာ အတ္ထဒသာ အလမတ္ထဒသာ၊ အလမတ္ထဒသေ အတိသယန္တီတိ အလမတ္ထဒသတရာ. တေနာဟ ‘‘အတ္ထေ ပဿိတုံ သမတ္ထာ’’တိအာဒိ. နေဝ သပ္ပုရိသံ န အသပ္ပုရိသံ ဇာနာတိ သပ္ပုရိသဓမ္မာနံ အသပ္ပုရိသဓမ္မာနဉ္စ ယာထာဝတော အဇာနနတော. သေသမေတ္ထ ဥတ္တာနမေဝ.

ဝဿကာရသုတ္တဝဏ္ဏနာ နိဋ္ဌိတာ.