၈. ဥပကသုတ္တဝဏ္ဏနာ

၁၈၈. အဋ္ဌမေ နိဗ္ဗတ္တိဝသေန နိရယံ အရဟတိ၊ နိရယသံဝတ္တနိယေန ဝါ ကမ္မုနာ နိရယေ နိယုတ္တောတိ နေရယိကော. အဝီစိမှိ ဥပ္ပဇ္ဇိတွာ တတ္ထ အာယုကပ္ပသညိတံ အန္တရကပ္ပံ တိဋ္ဌတီတိ ကပ္ပဋ္ဌော. နိရယူပပတ္တိံ ပရိဟရဏဝသေန တိကိစ္ဆိတုံ အသက္ကုဏေယျောတိ အတေကိစ္ဆော. အပရိယာဒိန္နာဝါတိ အပရိက္ခီဏာယေဝ. သစေ ဟိ ဧကော ဘိက္ခု ကာယာနုပဿနံ ပုစ္ဆတိ၊ အညော ဝေဒနာနုပဿနံ။ပေ။ စိတ္တာနုပဿနံ. ‘‘ဣမိနာ ပုဋ္ဌေ အဟံ ပုစ္ဆာမီ’’တိ ဧကော ဧကံ န ဩလောကေတိ၊ ဧဝံ သန္တေပိ တေသံ ဝါရော ပညာယတိ ဧဝ၊ ဗုဒ္ဓါနံ ပန ဝါရော န ပညာယတိ. ဝိဒတ္ထိစတုရင်္ဂုလံ ဆာယံ အတိက္ကမနတော ပုရေတရံယေဝ ဘဂဝါ စုဒ္ဒသဝိဓေန ကာယာနုပဿနံ၊ နဝဝိဓေန ဝေဒနာနုပဿနံ၊ သောဠသဝိဓေန စိတ္တာနုပဿနံ၊ ပဉ္စဝိဓေန ဓမ္မာနုပဿနံ ကထေတိ. တိဋ္ဌန္တု ဝါ ဧဝံ စတ္တာရော. သစေ ဟိ အညေ စတ္တာရော သမ္မပ္ပဓာနေသု၊ အညေ ဣဒ္ဓိပါဒေသု၊ အညေ ပဉ္စိန္ဒြိယေသု၊ အညေ ပဉ္စဗလေသု၊ အညေ သတ္တဗောဇ္ဈင်္ဂေသု၊ အညေ အဋ္ဌမဂ္ဂင်္ဂေသု ပဉှေ ပုစ္ဆေယျုံ၊ တမ္ပိ ဘဂဝါ ကထေယျ. တိဋ္ဌန္တု ဝါ ဧတေ အဋ္ဌ. သစေ အညေ သတ္တတိံသ ဇနာ ဗောဓိပက္ခိယေသု ပဉှေ ပုစ္ဆေယျုံ၊ တမ္ပိ ဘဂဝါ တာဝဒေဝ ကထေယျ. ကသ္မာ? ယာဝတာ ဟိ လောကိယမဟာဇနေ ဧကံ ပဒံ ကထေန္တေ တာဝ အာနန္ဒတ္ထေရော အဋ္ဌ ပဒါနိ ကထေတိ. အာနန္ဒတ္ထေရေ ပန ဧကံ ပဒံ ကထေန္တေယေဝ ဘဂဝါ သောဠသ ပဒါနိ ကထေတိ. ကသ္မာ? ဘဂဝတော ဟိ ဇိဝှါ မုဒု၊ ဒန္တာဝရဏံ သုဖုသိတံ၊ ဝစနံ အဂဠိတံ၊ ဘဝင်္ဂပရိဝါသော လဟုကော. တေန ဝုတ္တံ – ‘‘အပရိယာဒိန္နာဝဿ တထာဂတဿ ဓမ္မဒေသနာ၊ အပရိယာဒိန္နံ ဓမ္မပဒဗျဉ္ဇန’’န္တိ.

တတ္ထ ဓမ္မဒေသနာတိ တန္တိဋ္ဌပနာ. ဓမ္မပဒဗျဉ္ဇနန္တိ ဧတ္ထ ဓမ္မောတိ ပါဠိ. ပဇ္ဇတိ အတ္ထော ဧတေနာတိ ပဒံ. ဝါကျဉ္စ ပဒေနေဝ သင်္ဂဟိတံ. အတ္ထံ ဗျဉ္ဇေတီတိ ဗျဉ္ဇနံ၊ အက္ခရံ. တဉှိ ပဒဝါကျံ ပရိစ္ဆိဇ္ဇမာနံ တံ တံ အတ္ထံ ဗျဉ္ဇေတိ ပကာသေတိ. ဧတေန အပရာပရေဟိ ပဒဗျဉ္ဇနေဟိ သုစိရမ္ပိ ကာလံ ကထေန္တဿ တထာဂတဿ န ကဒါစိ တေသံ ပရိယာဒါနံ အတ္ထီတိ ဒဿေတိ. ဂုဏဓံသီတိ ဂုဏဓံသနသီလော. ပဂဗ္ဗောတိ ဝါစာပါဂဗ္ဗိယေန သမန္နာဂတော.

ဥပကသုတ္တဝဏ္ဏနာ နိဋ္ဌိတာ.