၇. သောဘနသုတ္တဝဏ္ဏနာ

၇. သတ္တမေ ပညာဝေယျတ္တိယေနာတိ သစ္စသမ္ပဋိဝေဓာဒိပညာဝေယျတ္တိယေန. ဝိနယံ ဥပေတာတိ တဒင်္ဂါဒိဝသေန ကိလေသာနံ ဝိနယံ ဥပေတာ. ဝေသာရဇ္ဇေနာတိ သာရဇ္ဇကရာနံ ဒိဋ္ဌိဝိစိကိစ္ဆာဒိပါပဓမ္မာနံ ဝိဂမနတော ဝေသာရဇ္ဇေန၊ သာရဇ္ဇရဟိတေနာတိ အတ္ထော. တေပိဋကဝသေန ဗဟု သုတံ ဧတေသန္တိ ဗဟုဿုတာ. တမေဝ ပရိယတ္တိဓမ္မံ ဓာရေန္တိ သုဝဏ္ဏဘာဇနေ ပက္ခိတ္တသီဟဝသံ ဝိယ ဝိနဿန္တံ အကတွာ သုပ္ပဂုဏသုပ္ပဝတ္တိဘာဝေန ဟဒယေ ဌပေန္တီတိ ဓမ္မဓရာ. ဧဒိသာ စ အတ္တနာ သုတဿ ဓမ္မဿ အာဓာရဘူတာ နာမ ဟောန္တီတိ အာဟ ‘‘သုတဓမ္မာနံ အာဓာရဘူတာ’’တိ.

သောဘနသုတ္တဝဏ္ဏနာ နိဋ္ဌိတာ.