၈. ဇမ္ဗာလီသုတ္တဝဏ္ဏနာ

၁၇၈. အဋ္ဌမေ သန္တန္တိ အင်္ဂသန္တတာယ စေဝ အာရမ္မဏသန္တတာယ စ ကမနီယံ မနောဟရံ. စေတောဝိမုတ္တိန္တိ ရူပါရူပါဝစရံ စိတ္တဝိမုတ္တိံ. တေနေဝါဟ ‘‘အဋ္ဌန္နံ သမာပတ္တီနံ အညတရံ သမာပတ္တိ’’န္တိ. လေပမက္ခိတေနာတိ လာခါမက္ခိတေန. ပါရိပန္ထိကေ အသောဓေတွာတိ ကာမစ္ဆန္ဒာဒိပါရိပန္ထိကေ အသောဓေတွာ. ယော ဟိ ကာမာဒီနဝပစ္စဝေက္ခဏာဒီဟိ ကာမစ္ဆန္ဒံ န သုဋ္ဌု ဝိက္ခမ္ဘေတွာ ကာယပ္ပဿဒ္ဓိဝသေန ဒုဋ္ဌုလ္လံ သုပ္ပဋိပ္ပဿဒ္ဓံ အကတွာ အာရမ္ဘဓာတုမနသိကာရာဒိဝသေန ထိနမိဒ္ဓံ န သုဋ္ဌု ပဋိဝိနောဒေတွာ သမထနိမိတ္တမနသိကာရာဒိဝသေန ဥဒ္ဓစ္စကုက္ကုစ္စံ န သမူဟတံ ကတွာ အညေပိ သမာဓိပရိပန္ထေ ဓမ္မေ န သုဋ္ဌု သောဓေတွာ ဈာနံ သမာပဇ္ဇတိ. သော အသောဓိတံ အာသယံ ပဝိဋ္ဌဘမရော ဝိယ အသုဒ္ဓံ ဥယျာနံ ပဝိဋ္ဌရာဇာ ဝိယ စ ခိပ္ပမေဝ နိက္ခမတိ. ယော ပန သမာဓိပရိပန္ထေ ဓမ္မေ သုဋ္ဌု ဝိသောဓေတွာ ဈာနံ သမာပဇ္ဇတိ၊ သော သုဝိသောဓိတံ အာသယံ ပဝိဋ္ဌဘမရော ဝိယ သုပရိသုဒ္ဓံ ဥယျာနံ ပဝိဋ္ဌရာဇာ ဝိယ စ သကလမ္ပိ ဒိဝသဘာဂံ အန္တောသမာပတ္တိယံယေဝ ဟောတိ.

အာယမုခါနီတိ နဒိတဠာကကန္ဒရပဒရာဒိတော အာဂမနမဂ္ဂါ. တေ စ ကန္ဒရာယေဝါတိ အာဟ ‘‘စတဿော ပဝိသနကန္ဒရာ’’တိ. အပါယမုခါနီတိ အပဂမနမဂ္ဂါ. အပေန္တိ အပဂစ္ဆန္တိ ဧတေဟီတိ ဟိ အပါယာ၊ တေ ဧဝ မုခါနီတိ အပါယမုခါနိ. တာနိ စ ဥဒကနိက္ခမနစ္ဆိဒ္ဒါနီတိ အာဟ ‘‘အပဝါဟနစ္ဆိဒ္ဒါနီ’’တိ၊ အပါယသင်္ခါတာနိ ဥဒကနိက္ခမနစ္ဆိဒ္ဒါနီတိ အတ္ထော. သေသံ သုဝိညေယျမေဝ.

ဇမ္ဗာလီသုတ္တဝဏ္ဏနာ နိဋ္ဌိတာ.