၃-၄. မဟာကောဋ္ဌိကသုတ္တာဒိဝဏ္ဏနာ

၁၇၃-၄. တတိယေ ဖဿာယတနာနန္တိ ဧတ္ထ အာကရဋ္ဌော အာယတနသဒ္ဒေါတိ အာဟ ‘‘ဖဿာကရာန’’န္တိအာဒိ. ‘‘သုဝဏ္ဏာယတနံ၊ ရဇတာယတန’’န္တိအာဒီသု အာကရောပိ ‘‘အာယတန’’န္တိ ဝုတ္တော၊ သဉ္ဇာတိသမောသရဏာဒိဝသေနပိ အာယတနဋ္ဌော လဗ္ဘတိယေဝ. မာ-ဣတိ ပဋိသေဓေ နိပါတော. သွာယံ ဆန္နံ ဖဿာယတနာနံ အသေသံ ဝိရာဂနိရောဓာ အတ္ထညံ ဝစနံ ကိဉ္စီတိ သန္ဓာယာဟာတိ အာဟ ‘‘မာ ဘဏီတိ အတ္ထော’’တိ. ပဉ္စဖဿာယတနာနိ နိရုဒ္ဓါနီတိ စက္ခာဒီနဉ္စ တတ္ထ အဘာဝံ သန္ဓာယ ဝဒတိ. ဆဋ္ဌဿာတိ မနာယတနဿ. စတုတ္ထေ နတ္ထိ ဝတ္တဗ္ဗံ.

မဟာကောဋ္ဌိကသုတ္တာဒိဝဏ္ဏနာ နိဋ္ဌိတာ.