၅-၆. ဥပဝါဏသုတ္တာဒိဝဏ္ဏနာ

၁၇၅-၆. ပဉ္စမေ ဝိဇ္ဇာယာတိ ဒိဗ္ဗစက္ခုပုဗ္ဗေနိဝါသာနုဿတိအာသဝက္ခယဉာဏသင်္ခါတာယ တိဝိဓာယ ဝိဇ္ဇာယ၊ အဋ္ဌဝိဓာယ ဝါ. အဋ္ဌဝိဓာပိ ဟိ ဝိဇ္ဇာ ဝိပဿနာဉာဏေန မနောမယိဒ္ဓိယာ စ သဟ အဘိညာ ပရိဂ္ဂဟေတွာ ဝုတ္တာ. ပန္နရသဓမ္မဘေဒေန စရဏေန သမန္နာဂတောတိ သီလသံဝရော၊ ဣန္ဒြိယေသု ဂုတ္တဒွါရတာ၊ ဘောဇနေ မတ္တညုတာ၊ ဇာဂရိယာနုယောဂေါ၊ သဒ္ဓါ၊ ဟိရီ၊ ဩတ္တပ္ပံ၊ ဗာဟုသစ္စံ၊ ဝီရိယံ၊ သတိ၊ ပညာ၊ စတ္တာရိ ရူပါဝစရဇ္ဈာနာနီတိ ဧဝံ ပန္နရသဘေဒေန စရဏဓမ္မေန သမန္နာဂတော. ဣမေယေဝ ဟိ ပန္နရသ ဓမ္မာ ယသ္မာ ဧတေဟိ စရတိ အရိယသာဝကော ဂစ္ဆတိ အမတံ ဒိသံ၊ တသ္မာ ‘‘စရဏ’’န္တိ ဝုတ္တာ. ဆဋ္ဌေ နတ္ထိ ဝတ္တဗ္ဗံ.

ဥပဝါဏသုတ္တာဒိဝဏ္ဏနာ နိဋ္ဌိတာ.