၉. ဘိက္ခုနီသုတ္တဝဏ္ဏနာ

၁၅၉. နဝမေ ဧဝံ ပဝတ္တံ ပစ္စုပ္ပန္နတဏှံ နိဿာယာတိ ‘‘ကုဒါဿု နာမာဟမ္ပိ အာသဝါနံ ခယာ’’တိအာဒိနာ နယေန အနုတ္တရေ ဝိမောက္ခေ ပိဟံ ဥပ္ပါဒေန္တဿ ဥပ္ပန္နတဏှံ နိဿာယ. ကထံ ပန လောကုတ္တရဓမ္မေ အာရဗ္ဘ အာသာ ဥပ္ပဇ္ဇတီတိ? န ခေါ ပနေတံ ဧဝံ ဒဋ္ဌဗ္ဗံ၊ န အာရမ္မဏကရဏဝသေန တတ္ထ ပိဟာ ပဝတ္တတိ အဝိသယတ္တာ ပုဂ္ဂလဿ စ အနဓိဂတဘာဝတော. အနုဿဝူပလဒ္ဓေ ပန အနုတ္တရဝိမောက္ခေ ဥဒ္ဒိဿ ပိဟံ ဥပ္ပါဒေန္တော တတ္ထ ပိဟံ ဥပ္ပါဒေတိ နာမ. နာကဍ္ဎတီတိ ကမ္မပထဘာဝံ အပ္ပတ္တတာယ ပဋိသန္ဓိံ န ဒေတိ. သေသံ သုဝိညေယျမေဝ.

ဘိက္ခုနီသုတ္တဝဏ္ဏနာ နိဋ္ဌိတာ.