၁၀. သုဂတဝိနယသုတ္တဝဏ္ဏနာ

၁၆၀. ဒသမေ ဝဠဉ္ဇေန္တီတိ သဇ္ဈာယန္တိ စေဝ ဝါစုဂ္ဂတံ ကရောန္တာ ဓာရေန္တိ စ. အဝိဂတတဏှတာယ တံ တံ ပရိက္ခာရဇာတံ ဗဟုမ္ပိ အာဒိယန္တီတိ ဗဟုလာ၊ တေ ဧဝ ဗာဟုလိကာ ယထာ ‘‘ဝေနယိကော’’တိ (မ. နိ. ၁.၂၄၆၊ အ. နိ. ၈.၁၁၊ ပါရာ. ၈). တေ ပန ယသ္မာ ပစ္စယဗဟုလဘာဝါ ယုတ္တပ္ပယုတ္တာ နာမ ဟောန္တိ၊ တသ္မာ အာဟ ‘‘ပစ္စယဗာဟုလ္လာယ ပဋိပန္နာ’’တိ. သိထိလံ ဂဏှန္တီတိ သာထလိကာ၊ သိက္ခာယ အာဒရဂါရဝါဘာဝေန သိထိလံ အဒဠှံ ဂဏှန္တီတိ အတ္ထော. သိထိလန္တိ စ ဘာဝနပုံသကနိဒ္ဒေသော၊ သိထိလ-သဒ္ဒေန ဝါ သမာနတ္ထဿ သာထလသဒ္ဒဿ ဝသေန သာထလိကာတိ ပဒသိဒ္ဓိ ဝေဒိတဗ္ဗာ. အဝဂမနတောတိ အဓောဂမနတော၊ ဩရမ္ဘာဂိယဘာဝတောတိ အတ္ထော. နိဗ္ဗီရိယာတိ ဥဇ္ဈိတုဿာဟာ တဒဓိဂမာယ အာရမ္ဘမ္ပိ အကုရုမာနာ.

သုဂတဝိနယသုတ္တဝဏ္ဏနာ နိဋ္ဌိတာ.

ဣန္ဒြိယဝဂ္ဂဝဏ္ဏနာ နိဋ္ဌိတာ.