၉. အကုသလမူလသုတ္တဝဏ္ဏနာ

၇၀. နဝမေ လုဗ္ဘတီတိ လောဘော. ဒုဿတီတိ ဒေါသော. မုယှတီတိ မောဟော. လောဘာဒီနိ ပနေတာနိ အသဟဇာတာနံ ပါဏာတိပါတာဒီနံ ကေသဉ္စိ အကုသလာနံ ဥပနိဿယပစ္စယဋ္ဌေန၊ သဟဇာတာနံ အဒိန္နာဒါနာဒီနံ ကေသဉ္စိ သမ္ပယုတ္တာ ဟုတွာ ဥပ္ပါဒကဋ္ဌေန၊ သယဉ္စ အကုသလာနီတိ သာဝဇ္ဇဒုက္ခဝိပါကဋ္ဌေနာတိ အာဟ ‘‘အကုသလာနံ မူလာနိ၊ အကုသလာနိ စ တာနိ မူလာနီ’’တိ. ဝုတ္တမ္ပိ စေတံ ‘‘ရတ္တော ခေါ၊ အာဝုသော၊ ရာဂေန အဘိဘူတော ပရိယာဒိန္နစိတ္တော ပါဏမ္ပိ ဟနတီ’’တိအာဒိ. ယဒပီတိ လိင်္ဂဝိပလ္လာသေန ဝုတ္တန္တိ အာဟ ‘‘ယောပိ၊ ဘိက္ခဝေ၊ လောဘော’’တိ. တဒပီတိ ဧတ္ထာပိ ဧသေဝ နယောတိ အာဟ ‘‘သောပိ အကုသလမူလ’’န္တိ. ဝိနာပိ လိင်္ဂဝိပလ္လာသေန အတ္ထယောဇနံ ဒဿေန္တော ‘‘အကုသလမူလံ ဝါ’’တိအာဒိမာဟ. သဗ္ဗတ္ထာတိ ‘‘ယဒပိ၊ ဘိက္ခဝေ၊ ဒေါသော၊ တဒပိ အကုသလမူလ’’န္တိအာဒီသု. အဘိသင်္ခရောတီတိ ဧတ္ထ အာယူဟတီတိ အတ္ထံ ဝတွာ တဉ္စ အာယူဟနံ ပစ္စယသမဝါယသိဒ္ဓိတော သမ္ပိဏ္ဍနံ ရာသိကရဏံ ဝိယ ဟောတီတိ အာဟ ‘‘သမ္ပိဏ္ဍေတိ ရာသိံ ကရောတီ’’တိ.

ပါဠိယံ ‘‘ဝဓေနာ’’တိအာဒီသု ဝဓေနာတိ မာရဏေန ဝါ ပေါထနေန ဝါ. ဝဓသဒ္ဒေါ ဟိ ဟိံသနတ္ထော ဝိဟေဌနတ္ထော စ ဟောတိ. ဗန္ဓနေနာတိ အဒ္ဒုဗန္ဓနာဒိနာ. ဇာနိယာတိ ဓနဇာနိယာ၊ ‘‘သတံ ဂဏှထ၊ သဟဿံ ဂဏှထာ’’တိ ဧဝံ ပဝတ္တိတဒဏ္ဍေနာတိ အတ္ထော. ဂရဟာယာတိ ပဉ္စသိခမုဏ္ဍကကရဏံ၊ ဂေါမယသိဉ္စနံ၊ ဂီဝါယ ကုရဏ္ဍကဗန္ဓနန္တိ ဧဝမာဒီနိ ကတွာ ဂရဟပါပနေန. တတ္ထ ပဉ္စသိခမုဏ္ဍကကရဏံ နာမ ကာကပက္ခကရဏံ. ဂေါမယသိဉ္စနံ သီသေန ကဏောဒကာဝသေစနံ. ကုရဏ္ဍကဗန္ဓနံ ဂဒ္ဒုလဗန္ဓနံ.

ကာလသ္မိံ န ဝဒတီတိ ယုတ္တကာလေ န ဝဒတိ၊ ဝတ္တဗ္ဗကာလဿ ပုဗ္ဗေ ဝါ ပစ္ဆာ ဝါ အယုတ္တကာလေ ဝတ္တာ ဟောတိ. အဘူတဝါဒီတိ ယံ နတ္ထိ၊ တဿ ဝတ္တာ. တေနာဟ ‘‘ဘူတံ န ဝဒတီ’’တိ. အတ္ထံ န ဝဒတီတိ ကာရဏံ န ဝဒတိ၊ အကာရဏနိဿိတံ နိပ္ဖလံ ဝတ္တာ ဟောတိ. ဓမ္မံ န ဝဒတီတိ သဘာဝံ န ဝဒတိ၊ အသဘာဝံ ဝတ္တာ အယထာဝါဒီတိ အတ္ထော. ဝိနယံ န ဝဒတီတိ သံဝရဝိနယံ န ဝဒတိ၊ န သံဝရဝိနယပ္ပဋိသံယုတ္တဿ ဝတ္တာ ဟောတိ၊ အတ္တနော သုဏန္တဿ စ န သံဝရဝိနယာဝဟဿ ဝတ္တာတိ အတ္ထော.

အတစ္ဆန္တိ အဘူတတ္ထံ. တေနာဟ ‘‘ဣတရံ တဿေဝ ဝေဝစန’’န္တိ. အထ ဝါ အဘူတန္တိ အသန္တံ အဝိဇ္ဇမာနံ. အတစ္ဆန္တိ အတထာကာရံ.

ပုညကမ္မတော ဧတိ ဥပ္ပဇ္ဇတီတိ အယော၊ ဝဍ္ဎိ. တပ္ပဋိက္ခေပေန အနယော၊ အဝဍ္ဎီတိ အာဟ ‘‘အနယံ အာပဇ္ဇတီတိ အဝဍ္ဎိံ အာပဇ္ဇတီ’’တိ. မာလုဝါသိပါဋိကာ နာမ ဒီဃသဏ္ဌာနံ မာလုဝါပက္ကံ၊ မာလုဝါဖလပေါဋ္ဌလိကာတိ အတ္ထော. ဖလိတာယာတိ အာတပေန သုဿိတွာ ဘိန္နာယ. ဝဋရုက္ခာဒီနံ မူလေတိ ဝဋရုက္ခာဒီနံ သမီပေ. သကဘာဝေန သဏ္ဌာတုံ န သက္ကောန္တီတိ ကသ္မာ န သက္ကောန္တိ? ဘဝနဝိနာသဘယာ. ရုက္ခမူလေ ပတိတမာလုဝါဗီဇတော ဟိ လတာ ဥပ္ပဇ္ဇိတွာ ရုက္ခံ အဘိရုဟတိ. သာ မဟာပတ္တာ စေဝ ဗဟုပတ္တာ စ မဟာကောလိရပတ္တသဏ္ဌာနေဟိ တတော စ မဟန္တတရေဟိ သာခါဝိဋပန္တရေဟိ ပတ္တေဟိ သမန္နာဂတာ. အထ နံ ရုက္ခံ မူလတော ပဋ္ဌာယ ဝိနန္ဓမာနာ သဗ္ဗဝိဋပါနိ သဉ္ဆာဒေတွာ မဟန္တံ ဘာရံ ဇနေတွာ တိဋ္ဌတိ၊ သာ ဝါတေ ဝါယန္တေ ဒေဝေ ဝါ ဝဿန္တေ ဩဃနဟေဋ္ဌာဂတာ ဩလမ္ဗနဟေတုဘူတံ ဃနဘာဝံ ဇနေတွာ တဿ ရုက္ခဿ သဗ္ဗသာခံ ဘိဇ္ဇတိ၊ ဘူမိယံ နိပါတေတိ. တတော တသ္မိံ ရုက္ခေ ပတိဋ္ဌိတဝိမာနံ ဘိဇ္ဇတိ ဝိနဿတိ. ဣတိ တာ ဒေဝတာယော ဘဝနဝိနာသဘယာ သကဘာဝေန သဏ္ဌာတုံ န သက္ကောန္တိ. ဧတ္ထ စ ယံ သာခဋ္ဌကဝိမာနံ ဟောတိ၊ တံ သာခါသု ဘိဇ္ဇမာနာသု တတ္ထ တတ္ထေဝ ဘိဇ္ဇိတွာ သဗ္ဗသာခါသု ဘိန္နာသု သဗ္ဗံ ဘိဇ္ဇတိ၊ ရုက္ခဋ္ဌကဝိမာနံ ပန ယာဝ ရုက္ခဿ မူလမတ္တမ္ပိ တိဋ္ဌတိ၊ တာဝ န နဿတီတိ ဝေဒိတဗ္ဗံ. တတ္ထ တတ္ထ ပလုဇ္ဇိတွာတိ တတ္ထ တတ္ထ ဘိဇ္ဇိတွာ. သေသမေတ္ထ သုဝိညေယျမေဝ.

အကုသလမူလသုတ္တဝဏ္ဏနာ နိဋ္ဌိတာ.