၁-၂. ကုသိနာရသုတ္တာဒိဝဏ္ဏနာ

၁၂၄-၁၂၅. တတိယဿ ပဌမေ တဏှာဂေဓေန ဂထိတောတိ တဏှာဗန္ဓနေန ဗဒ္ဓေါ. တဏှာမုစ္ဆနာယာတိ တဏှာယ ဝသေန မုစ္ဆာပတ္တိယာ. မုစ္ဆိတောတိ မုစ္ဆံ မောဟံ ပမာဒံ အာပန္နော. အဇ္ဈောပန္နောတိ အဓိဩပန္နော. တဏှာယ အဓိဘဝိတွာ အဇ္ဈောတ္ထဋော ဂိလိတွာ ပရိနိဋ္ဌပေတွာ ဝိယ ဌိတော. တေနာဟ ‘‘အဇ္ဈောပန္နောတိ တဏှာယ ဂိလိတွာ ပရိနိဋ္ဌပေတွာ ပဝတ္တော’’တိ. အနာဒီနဝဒဿာဝီတိ ဂထိတာဒိဘာဝေန ပရိဘောဂေ အာဒီနဝမတ္တမ္ပိ န ပဿတိ. နိဿရဏပညောတိ အယမတ္ထော အာဟာရပရိဘောဂေတိ တတ္ထ ပယောဇနပရိစ္ဆေဒိကာ ‘‘ယာဝဒေဝ ဣမဿ ကာယဿ ဌိတိယာ’’တိအာဒိနာ (မ. နိ. ၁.၂၃၊ ၂.၂၄၊ ၃.၇၅၊ သံ. နိ. ၄.၁၂၀၊ အ. နိ. ၆.၅၈၊ ၈.၉) ပဝတ္တာ အာဟာရပဋိဗဒ္ဓဆန္ဒရာဂနိဿရဏဘူတာ ပညာ အဿ အတ္ထီတိ နိဿရဏပညော. သေသမေတ္ထ ဥတ္တာနမေဝ. ဒုတိယေ နတ္ထိ ဝတ္တဗ္ဗံ.

ကုသိနာရသုတ္တာဒိဝဏ္ဏနာ နိဋ္ဌိတာ.