၃. သရဒသုတ္တဝဏ္ဏနာ

၉၅. တတိယေ ဝိဒ္ဓေတိ ဒူရီဘူတေ. ဒူရဘာဝေါ စ အာကာသဿ ဝလာဟကဝိဂမေန ဟောတီတိ အာဟ ‘‘ဝလာဟကဝိဂမေန ဒူရီဘူတေ’’တိ. တေနေဝ ဟိ ‘‘ဝိဒ္ဓေ ဝိဂတဝလာဟကေ’’တိ ဝုတ္တံ. နဘံ အဗ္ဘုဿက္ကမာနောတိ အာကာသံ အဘိလင်္ဃန္တော. ဣမိနာ တရုဏသူရိယဘာဝေါ ဒဿိတော. နာတိဒူရောဒိတေ ဟိ အာဒိစ္စေ တရုဏသူရိယသမညာ. ဒုဝိဓမေဝဿ သံယောဇနံ နတ္ထီတိ ဩရမ္ဘာဂိယဥဒ္ဓမ္ဘာဂိယဝသေန ဒုဝိဓမ္ပိ သံယောဇနံ အဿ ပဌမဇ္ဈာနလာဘိနော အရိယသာဝကဿ နတ္ထိ. ကသ္မာ ပနဿ ဥဒ္ဓမ္ဘာဂိယသံယောဇနမ္ပိ နတ္ထီတိ ဝုတ္တံ. ဩရမ္ဘာဂိယသံယောဇနာနမေဝ ဟေတ္ထ ပဟာနံ ဝုတ္တန္တိ အာဟ ‘‘ဣတရမ္ပီ’’တိအာဒိ၊ ဣတရံ ဥဒ္ဓမ္ဘာဂိယသံယောဇနံ ပုန ဣမံ လောကံ ပဋိသန္ဓိဝသေန အာနေတုံ အသမတ္ထတာယ နတ္ထီတိ ဝုတ္တန္တိ အတ္ထော. ဈာနလာဘိနော ဟိ သဗ္ဗေပိ အရိယာ ဗြဟ္မလောကူပပန္နာ ဟေဋ္ဌာ န ဥပ္ပဇ္ဇန္တိ၊ ဥဒ္ဓံ ဥဒ္ဓံ ဥပ္ပဇ္ဇန္တာပိ ဝေဟပ္ဖလံ အကနိဋ္ဌံ ဘဝဂ္ဂဉ္စ ပတွာ န ပုနညတ္ထ ဇာယန္တိ၊ တတ္ထ တတ္ထေဝ အရဟတ္တံ ပတွာ ပရိနိဗ္ဗာယန္တိ. တေနေဝါဟ ‘‘ဣမသ္မိံ သုတ္တေ ဈာနာနာဂါမီ နာမ ကထိတော’’တိ. ဈာနဝသေန ဟိ ဟေဋ္ဌာ န အာဂစ္ဆတီတိ ဈာနာနာဂါမီ.

သရဒသုတ္တဝဏ္ဏနာ နိဋ္ဌိတာ.