၂. ပဝိဝေကသုတ္တဝဏ္ဏနာ

၉၄. ဒုတိယေ သာဏေဟိ ဝါကေဟိ နိဗ္ဗတ္တိတာနိ သာဏာနိ. မိဿသာဏာနိ မသာဏာနိ န ဘင်္ဂါနိ. ဧရကတိဏာဒီနီတိ အာဒိ-သဒ္ဒေန အက္ကမကစိကဒလိဝါကာဒီနံ သင်္ဂဟော. ဧရကာဒီဟိ ကတာနိ ဟိ ဆဝါနိ လာမကာနိ ဒုဿာနီတိ ‘‘ဆဝဒုဿာနီ’’တိ ဝတ္တဗ္ဗတံ လဘန္တိ. ကုဏ္ဍကန္တိ တနုတရံ တဏ္ဍုလပ္ပကရဏံ. ပဉ္စ ဒုဿီလျာနီတိ ပါဏာတိပါတာဒီနိ ပဉ္စ. စတ္တာရော အာသဝါတိ ကာမာသဝါဒယော စတ္တာရော အာသဝါ. သီလဂ္ဂပ္ပတ္တောတိ သီလေန၊ သီလဿ ဝါ အဂ္ဂပ္ပတ္တော.

ပဝိဝေကသုတ္တဝဏ္ဏနာ နိဋ္ဌိတာ.