စတုဘူမကကုသလဝဏ္ဏနာ

၂၈. ဧဝံ စတုဘူမကကုသလစိတ္တံ သရူပတော နိဒ္ဒိသိတွာ ဣဒါနိ တံ နိဂမေန္တော အာဟ ‘‘ကာမေ အဋ္ဌေဝါ’’တိအာဒိ. တတ္ထ ကာမေတိ ကာမဘဝေ. တထာ ‘‘ရူပေ’’တိအာဒီသု.

၂၉. ကုသလာကုသလာပဂတေနာတိ ကုသလာကုသလကမ္မတော အပဂတေန. အဂ္ဂမဂ္ဂဿ ဟိ ဥပ္ပန္နကာလတော ပဋ္ဌာယ အရဟတော သဗ္ဗာနိ ကုသလာကုသလကမ္မာနိ ပဟီနာနိ နာမ ဟောန္တိ ပစ္စယဝေကလ္လေန ပဋိသန္ဓိဒါနေ အသမတ္ထဘာဝတော. ယတော စ အရိယမဂ္ဂဉာဏံ ‘‘ကမ္မက္ခယကရ’’န္တိ ဝုစ္စတိ. အထ ဝါ အဟေတုအပစ္စယဝိသုဇ္ဈနဿ အဘာဝတော ကိလေသသမုစ္ဆေဒကေန မဂ္ဂကုသလေန အကုသလေဟိ အပဂတေန. ကုသလေ ကုသလေနာတိ ကုစ္ဆိတာနံ သလနာဒီဟိ ကုသလသင်္ခါတာယ ပဋိပတ္တိယံ ဒေသနုပ္ပါဒနာဒီသု ဆေကေန. မုနိနာတိ ဥဘယလောကမုနနကေန အဂ္ဂဖလဉာဏေန၊ သဗ္ဗညုတညာဏေန ဝါ သမန္နာဂတတ္တာ မုနိနာ. တေနာဟ –

‘‘ယော မုနာတိ ဥဘော လောကေ၊ မုနိ တေန ပဝုစ္စတီ’’တိ.

ဝသိနာတိ ဆဠဘိညတာယ ပရမေန စိတ္တဝသိဘာဝေန သမန္နာဂတတ္တာ၊ ဈာနာဒီသု ပဉ္စဝိဓဝသိသဗ္ဘာဝတော စ ဝသိဘူတေန ဝသိဘာဝူပဂတိန္ဒြိယေန.

စတုဘူမကကုသလဝဏ္ဏနာ နိဋ္ဌိတာ.