ဣဒ္ဓိပါဒဝိဘင်္ဂမာတိကတ္ထဝဏ္ဏနာ

ဣဒ္ဓိပါဒဝိဘင်္ဂမာတိကာယ ပန စတ္တာရော ဣဒ္ဓိပါဒါတိ ဧတ္ထ ဣဇ္ဈတီတိ ဣဒ္ဓိ၊ သမိဇ္ဈတိ နိပ္ဖဇ္ဇတီတိ အတ္ထော၊ ဣဒ္ဓိ ဧဝ ပါဒေါ ဣဒ္ဓိပါဒေါ၊ ဣဒ္ဓိကောဋ္ဌာသောတိ အတ္ထော. ဣဇ္ဈန္တိ ဝါ ဧတာယ သတ္တာ ဣဒ္ဓါ ဝုဒ္ဓါ ဥက္ကံသဂတာ ဟောန္တီတိပိ ဣဒ္ဓိ၊ ပဇ္ဇန္တိ ဧတေနာတိ ပါဒေါ၊ ပတိဋ္ဌာ အဓိဂမူပါယောတိ အတ္ထော၊ ဣဒ္ဓိယာ ပါဒေါ ဣဒ္ဓိပါဒေါ. ဆန္ဒသမာဓိပဓာနသင်္ခါရသမန္နာဂတန္တိ ဧတ္ထ ဆန္ဒဟေတုကော၊ ဆန္ဒာဓိကော ဝါ သမာဓိ ဆန္ဒသမာဓိ၊ ကတ္တုကမျတာဆန္ဒံ အဓိပတိံ ကရိတွာ ပဋိလဒ္ဓသမာဓိဿေတံ အဓိဝစနံ. ပဓာနဘူတာ သင်္ခါရာ ပဓာနသင်္ခါရာ၊ စတုကိစ္စသာဓကဿ သမ္မပ္ပဓာနဝီရိယဿေတံ အဓိဝစနံ. သမန္နာဂတန္တိ တေန ဆန္ဒသမာဓိနာ၊ ပဓာနသင်္ခါရေန စ ဥပေတံ. ဣဒ္ဓိပါဒန္တိ ယထာဝုတ္တတ္ထေန ‘‘ဣဒ္ဓီ’’တိ သင်္ချံ ဂတာနံ ဥပစာရဇ္ဈာနာဒိကုသလစိတ္တသမ္ပယုတ္တာနံ ဆန္ဒသမာဓိပဓာနသင်္ခါရာနံ အဓိဋ္ဌာနဋ္ဌေန ပါဒဘူတသေသစိတ္တစေတသိကရာသိံ. ဘာဝေတီတိ ဝဍ္ဎေတိ၊ အတ္တနော သန္တာနေ ပုနပ္ပုနံ ဇနေတီတိ အတ္ထော. ဣမိနာ နယေန သေသေသုပိ အတ္ထော ဝေဒိတဗ္ဗော. တတ္ထ ဝီမံသာတိ ပညာ. သေသံ ပဒတော သုဝိညေယျမေဝ.

အတ္ထတော ပနေတ္ထ တေန ကိံ ကထိတံ? စတုန္နံ ဘိက္ခူနံ မတ္ထကပ္ပတ္တံ ကမ္မဋ္ဌာနံ ကထိတံ. ယထာ ဟိ စတူသု အမစ္စပုတ္တေသု ဌာနန္တရံ ပတ္ထေတွာ ဝိစရန္တေသု ဧကော ဥပဋ္ဌာနေန၊ ဧကော သူရဘာဝေန၊ ဧကော ဇာတိသမ္ပတ္တိယာ၊ ဧကော မန္တဗလေနာတိ ဧဝံ တေ ပစ္စေကကာရဏေန ရာဇာနံ အာရာဓေတွာ ဌာနန္တရံ ပါပုဏန္တိ၊ ဧဝံ ဘိက္ခူပိ ဆန္ဒဝီရိယစိတ္တဝီမံသာသု ဧကေကံ ဇေဋ္ဌံ ဓုရံ ပုဗ္ဗင်္ဂမံ ကတွာ လောကုတ္တရဓမ္မနိဗ္ဗတ္တကာ ဟောန္တိ. ဧတ္ထ စ ဆန္ဒော သမာဓိ ပဓာနသင်္ခါရောတိ တယော ဓမ္မာ ဣဒ္ဓီပိ ဟောန္တိ ဣဒ္ဓိပါဒါပိ၊ သေသာ ပန သမ္ပယုတ္တာ စတ္တာရော ခန္ဓာ ဣဒ္ဓိပါဒါ ဧဝ. ဧဝံ သေသာဓိပတိယုတ္တစိတ္တေသုပိ ဣဒ္ဓိပါဒါတိ ဝေဒိတဗ္ဗာ.

အပိစ ဈာနဝိပဿနာသု ပုဗ္ဗဘာဂေါ ဣဒ္ဓိပါဒေါ. ယော ပဋိလာဘော၊ သာ ဣဒ္ဓိ. ပဌမဇ္ဈာနာဒီနံ ဟိ ပုဗ္ဗဘာဂပရိကမ္မာနိ ဣဒ္ဓိပါဒေါ နာမ၊ ပဌမဇ္ဈာနာဒယော ဣဒ္ဓိ နာမ. ပဌမမဂ္ဂါဒီနံ ပုဗ္ဗဘာဂဝိပဿနာ ဣဒ္ဓိပါဒေါ နာမ၊ ပဌမမဂ္ဂါဒယော ဣဒ္ဓိ နာမ. ပဋိလာဘဝသေနာပိ ဒီပေတုံ ဝဋ္ဋတိ. ပဌမဇ္ဈာနာဒယော ဟိ ပဌမမဂ္ဂါဒယော စ ဣဒ္ဓိပါဒေါ နာမ၊ ဒုတိယဇ္ဈာနာဒယော၊ ဒုတိယမဂ္ဂါဒယော စ ဣဒ္ဓိ နာမာတိ အယံ တာဝေတ္ထ ပဒတ္ထော.

ဓမ္မဘေဒေါ ပနေတ္ထ ဝိဘင်္ဂနယေနေဝ ပါကဋော ဘဝိဿတိ. တတ္ထ ဟိ သုတ္တန္တဘာဇနီယေ တာဝ ဆန္ဒာဒီနံ ပဒါနံ ဝိဘင်္ဂံ ဝတွာ အန္တေ ‘‘ဣဒ္ဓိပါဒေါတိ တထာဘူတဿ ဝေဒနာက္ခန္ဓော။ပေ။ ဝိညာဏက္ခန္ဓော. ဣဒ္ဓိပါဒံ ဘာဝေတီတိ တေ ဓမ္မေ အာသေဝတိ ဘာဝေတိ ဗဟုလီကရောတိ၊ တေန ဝုစ္စတိ ဣဒ္ဓိပါဒံ ဘာဝေတီ’’တိ (ဝိဘ. ၄၃၄) ဧဝံ သဗ္ဗေ လောကိယလောကုတ္တရဓမ္မာ ဣဒ္ဓိပါဒေါတိ ဝုတ္တာ.

အဘိဓမ္မဘာဇနီယေ ပန ဆန္ဒာဒီနိ ပဒါနိ ဝိဘဇိတွာ အန္တေ ‘‘ဣဒ္ဓိပါဒေါတိ တထာဘူတဿ ဖဿော။ပေ။ ပဂ္ဂါဟော အဝိက္ခေပေါ’’တိ (ဝိဘ. ၄၄၇) ဧဝံ သဗ္ဗေ လောကုတ္တရကုသလဓမ္မာ ဣဒ္ဓိပါဒါတိ ဝတွာ ပုန ‘‘ဆန္ဒိဒ္ဓိပါဒေါ ဝီရိယိဒ္ဓိပါဒေါ စိတ္တိဒ္ဓိပါဒေါ ဝီမံသိဒ္ဓိပါဒေါ’’တိ (ဝိဘ. ၄၅၇) မာတိကံ ဌပေတွာ ‘‘တတ္ထ ကတမော ဆန္ဒိဒ္ဓိပါဒေါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ။ပေ။ ယော တသ္မိံ သမယေ ဆန္ဒော ဆန္ဒိကတာ။ပေ။ အယံ ဝုစ္စတိ ဆန္ဒိဒ္ဓိပါဒေါ’’တိအာဒိနာ လောကုတ္တရကုသလစိတ္တသမ္ပယုတ္တဆန္ဒဝီရိယစိတ္တဝီမံသာ ဧဝ ဣဒ္ဓိပါဒါတိ ဝုတ္တာ. တထာ ပဉှာပုစ္ဆကေပိ ကုသလာ ဧဝ၊ အနိဒဿနအပ္ပဋိဃာ ဧဝ၊ ဝီမံသိဒ္ဓိပါဒေါ ဟေတု၊ သေသာ န ဟေတူ။ပေ။ စိတ္တိဒ္ဓိပါဒေါ န ဝတ္တဗ္ဗော၊ သေသာ စိတ္တသမ္ပယုတ္တာ။ပေ။ အနုတ္တရာဝ၊ အရဏာဝါတိ. သေသမေတ္ထ သတိပဋ္ဌာနေ ဝုတ္တသဒိသမေဝ. ပါဠိမုတ္တကနယော ပနေတ္ထာပိ န ဥဒ္ဓဋောတိ.

ဣဒ္ဓိပါဒဝိဘင်္ဂမာတိကတ္ထဝဏ္ဏနာ နိဋ္ဌိတာ.