ပစ္စယာကာရဝိဘင်္ဂမာတိကတ္ထဝဏ္ဏနာ

ပစ္စယာကာရဝိဘင်္ဂမာတိကာယ ပန အတ္ထတော တာဝ – အဝိဇ္ဇာပစ္စယာတိအာဒီသု အဝိန္ဒိယံ ကာယဒုစ္စရိတာဒိံ ဝိန္ဒတိ ပဋိလဘတိ၊ ဝိန္ဒိယံ ဝါ ကာယသုစရိတာဒိံ န ဝိန္ဒတိ၊ ဓမ္မာနံ ဝါ ယထာသဘာဝံ အဝိဒိတံ ကရောတိ၊ အန္တဝိရဟိတေ ဝါ သံသာရေ သတ္တေ ဇဝါပေတိ၊ အဝိဇ္ဇမာနေသု ဝါ ဇဝတိ၊ ဝိဇ္ဇမာနေသု ဝါ န ဇဝတီတိ အဝိဇ္ဇာ. ပဋိစ္စ ဖလမေတိ ဧတသ္မာတိ ပစ္စယော၊ ဓမ္မာနံ ဥပ္ပတ္တိယာ၊ ဌိတိယာ စ ဥပကာရကော ဓမ္မော. အဝိဇ္ဇာ စ သာ ပစ္စယော စာတိ အဝိဇ္ဇာပစ္စယော၊ တသ္မာ အဝိဇ္ဇာပစ္စယာ. သင်္ခတမဘိသင်္ခရောန္တီတိ သင်္ခါရာ.

ဣတော ပရံ သင်္ခါရပစ္စယာ ဝိညာဏန္တိအာဒီသု ဝုတ္တံ ဝုတ္တနယေနေဝ ဝေဒိတဗ္ဗံ. အဝုတ္တေသု ပန ဝိဇာနာတီတိ ဝိညာဏံ. နမတီတိ နာမံ၊ ရုပ္ပတီတိ ရူပံ၊ နာမဉ္စ ရူပဉ္စ နာမရူပဉ္စ နာမရူပန္တိ ဧကဒေသသရူပေကသေသနယေန ဝေဒိတဗ္ဗံ. အာယေ တနောတိ၊ အာယတဉ္စ နယတီတိ အာယတနံ၊ ဆဋ္ဌာယတနဉ္စ သဠာယတနဉ္စ သဠာယတနန္တိ ဧကသေသနယေန ဝေဒိတဗ္ဗံ. ဖုသတီတိ ဖဿော. ဝေဒယတီတိ ဝေဒနာ. ပရိတဿတီတိ တဏှာ. ဥပါဒိယတီတိ ဥပါဒါနံ. ဘဝတိ၊ ဘာဝယတိ စာတိ ဘဝေါ. ဇနနံ ဇာတိ. ဇီရဏံ ဇရာ. မရန္တိ ဧတေနာတိ မရဏံ. သောစနံ သောကော. ပရိဒေဝနံ ပရိဒေဝေါ. ဒုက္ခယတိ၊ ဥပ္ပါဒဋ္ဌိတိဝသေန ဒွိဓာ ခဏတီတိပိ ဒုက္ခံ. ဒုမ္မနဿ ဘာဝေါ ဒေါမနဿံ. ဘုသော အာယာသော ဥပါယာသော. သမ္ဘဝန္တီတိ နိဗ္ဗတ္တန္တိ. န ကေဝလဉ္စ သောကာဒီဟေဝ၊ အထ ခေါ အဝိဇ္ဇာပစ္စယာ သင်္ခါရာ သမ္ဘဝန္တီတိအာဒိနာ သဗ္ဗပဒေဟိပိ သမ္ဘဝန္တိ-သဒ္ဒဿ ယောဇနာ ကာတဗ္ဗာ. ဧဝံ ဟိ ပစ္စယပစ္စယုပ္ပန္နဝဝတ္ထာနံ ကတံ ဟောတိ.

ဧဝန္တိ နိဒ္ဒိဋ္ဌနယနိဒဿနံ၊ တေန အဝိဇ္ဇာဒီဟေဝ ကာရဏေဟိ၊ န ဣဿရနိမ္မာနာဒီဟီတိ ဒဿေတိ. ဧတဿာတိ ယထာဝုတ္တဿ. ကေဝလဿာတိ အသမ္မိဿဿ၊ သကလဿ ဝါ၊ ဒုက္ခက္ခန္ဓဿာတိ ဒုက္ခသမူဟဿ၊ န သတ္တဿ၊ န သုခသုဘာဒီနံ. သမုဒယောတိ နိဗ္ဗတ္တိ၊ ဟောတီတိ သမ္ဘဝတိ. အယံ တာဝေတ္ထ ပဒတ္ထော.

ဓမ္မဘေဒတော ပနေတ္ထ အဝိဇ္ဇာတိ သုတ္တန္တပရိယာယေန ဒုက္ခာဒီသု စတူသု၊ အဘိဓမ္မပရိယာယေန ပုဗ္ဗန္တာဒီဟိ သဒ္ဓိံ အဋ္ဌသု ဝါ ဌာနေသု အညာဏံ. သင်္ခါရာ ပန ပုညာပုညာနေဉ္ဇာဘိသင်္ခါရာ တယော၊ ကာယဝစီစိတ္တသင်္ခါရာ တယော စာတိ ဆဗ္ဗိဓာ. တတ္ထ အဋ္ဌ ကာမာဝစရကုသလစေတနာ၊ ပဉ္စ ရူပါဝစရကုသလစေတနာ စေတိ တေရသ စေတနာ ပုညာဘိသင်္ခါရော နာမ. ဒွါဒသ အကုသလစေတနာ အပုညာဘိသင်္ခါရော နာမ. စတဿော အရူပါဝစရကုသလစေတနာ အာနေဉ္ဇာဘိသင်္ခါရော နာမ. ဣမေသံ ပန တိဏ္ဏံ သင်္ခါရာနံ ဧဝ ဒွါရတော ပဝတ္တိဒဿနတ္ထံ အယံ သင်္ခါရာဒိတ္တိကော ဝုတ္တော.

အဋ္ဌ ကာမာဝစရကုသလစေတနာ စေဝ ဒွါဒသာကုသလစေတနာ စ ကာယဒွါရေ ပဝတ္တိယံ ကာယသင်္ခါရော၊ ဝစီဒွါရေ ပဝတ္တိယံ ဝစီသင်္ခါရော၊ ဧတာ စေဝ မနောဒွါရေ ပဝတ္တိယံ၊ မနောဒွါရေ ဧဝ ပဝတ္တနကာ ရူပါရူပကုသလစေတနာ စ စိတ္တသင်္ခါရောတိ ဝုစ္စန္တိ. အဘိညာစေတနာ၊ ပနေတ္ထ ဥဒ္ဓစ္စစေတနာ စ ပရတော ပဋိသန္ဓိဝိညာဏပစ္စယဘာဝေ အပနေတဗ္ဗာပိ အဝိဇ္ဇာပစ္စယာ သမ္ဘဝတော ဣဓ ဂဟေတဗ္ဗာဝါတိ အယံ တိကော ပုရိမတ္တိကမေဝ ပဝိသတီတိ အတ္ထတော လောကိယကုသလာကုသလစေတနာဝ အဝိဇ္ဇာပစ္စယာ သင်္ခါရာတိ ဝေဒိတဗ္ဗံ. ဣဒဉ္စ သုတ္တန္တဘာဇနီယနယေန၊ အဘိဓမ္မဘာဇနီယနယေန ပန လောကိယလောကုတ္တရေ ဧကေကစိတ္တက္ခဏေ ဒွါဒသင်္ဂဿ ပဋိစ္စသမုပ္ပါဒဿ ဂဟဏတော သဗ္ဗာပိ စေတနာ သင်္ခါရာတိ ဝေဒိတဗ္ဗံ. ဧဝံ ဝိညာဏနာမရူပါဒီသုပိ သဗ္ဗစိတ္တသမ္ပယုတ္တဝသေန စ ဓမ္မဘေဒေါ ဝေဒိတဗ္ဗော. သုတ္တန္တဘာဇနီယနယေနေဝ ပန ဒဿယိဿာမ.

သင်္ခါရပစ္စယာ ဝိညာဏဉ္စ စက္ခုဝိညာဏာဒိဆဗ္ဗိဓံ ဗာတ္တိံသလောကိယဝိပါကဝိညာဏမေဝ ဟောတိ၊ လောကုတ္တရာနိ ပန ဝဋ္ဋကထာယ န ယုဇ္ဇန္တီတိ န ဂဟိတာနိ. ဝိညာဏပစ္စယာ နာမရူပံ ပန သဗ္ဗလောကိယဝိညာဏသမ္ပယုတ္တာ တယော အရူပိနော ခန္ဓာ. ရူပံ သဗ္ဗာနိ ဘူတုပါဒါယရူပါနိ. သဠာယတနံ မနစ္ဆဋ္ဌာနိ ဣန္ဒြိယာနိ. ဖဿော စက္ခုသမ္ဖဿာဒိကော ဆဝိပါကဖဿော၊ တထာ ဝေဒနာပိ. တဏှာ ရူပတဏှာဒိဘေဒတော ဆဗ္ဗိဓော လောဘော. ဥပါဒါနံ ကာမုပါဒါနာဒိတော စတုဗ္ဗိဓာ လောဘဒိဋ္ဌိယောဝ. ဘဝေါ ပန ဒုဝိဓော ကမ္မဘဝေါ၊ ဥပပတ္တိဘဝေါတိ. တတ္ထ ကမ္မဘဝေါ တေဘူမကကုသလာကုသလစေတနာ စ တံသမ္ပယုတ္တာ အဘိဇ္ဈာဒယော စ. ဥပပတ္တိဘဝေါ ပန ကမ္မာဘိနိဗ္ဗတ္တာ ပဉ္စပိ ခန္ဓာ. သော ပဘေဒတော ကာမရူပါရူပဘဝါ တယော၊ သညာ အသညာ နေဝသညာနာသညာ ဘဝါ တယော၊ ဧကစတုပဉ္စဝေါကာရဘဝါ တယောတိ နဝဝိဓော နိဒ္ဒိဋ္ဌော. ဇာတိအာဒီနိ ပုဗ္ဗေ ဝုတ္တာနိ. တေသု ဇာတိဂ္ဂဟဏေန ဝိညာဏနာမရူပသဠာယတနဖဿဝေဒနာဝ ဂဟိတာ တဒဝိနာဘာဝတော. တထာ ဇရာမရဏဂ္ဂဟဏေနာပိ တေသညေဝ ပါကဘေဒတ္တာ. သောကာဒယော ပန ဇရာမရဏေန ဒွါဒသမေန အင်္ဂေန ဧကသင်္ခေပံ ကတွာ ဝုတ္တာ၊ န ဝိသုံ အင်္ဂဘာဝေန. ကိမတ္ထန္တိ စေ? ဘဝစက္ကဿ အဝိစ္ဆေဒဒဿနတ္ထံ. သောကာဒိတော ဟိ အဝိဇ္ဇာ သိဒ္ဓါ ဟောတိ အဝိဇ္ဇာဝိပ္ပယောဂတော၊ အဝိဇ္ဇာသမုပ္ပတ္တိတော စ. ဇရာမရဏဗ္ဘာဟတဿ ဟိ ဗာလဿေဝ တေ သမ္ဘဝန္တိ၊ တေဟိ စ အဝိဇ္ဇာယ သိဒ္ဓါယ ပုန အဝိဇ္ဇာပစ္စယာ သင်္ခါရာတိ ဧဝံ ဟေတုဖလပရမ္ပရာယ ဘဝစက္ကံ အဝိစ္ဆိန္နံ၊ အနာဒိကံ၊ အပရိယန္တံ၊ အပရိယောသာနဉ္စ ဟောတိ.

ယဒိ ဧဝံ၊ ကသ္မာ အဝိဇ္ဇာ အာဒိတော ဝုတ္တာတိ? ပဓာနဒဿနတ္ထံ ပန အာဒိတော ဝုတ္တာ. တိဏ္ဏံ ဟိ ဝဋ္ဋာနံ အဝိဇ္ဇာ ပဓာနော ဟေတု တဿာ ဘာဝေ ဘာဝတော၊ နိရောဓေန စ နိရုဇ္ဈနတော. ဧဝံ အဝိဇ္ဇာဒီဟိ ဒွါဒသဟိ အင်္ဂေဟိ သုတ္တန္တဘာဇနီယနယေန သဗ္ဗေ လောကိယဓမ္မာဝ ပစ္စယပစ္စယုပ္ပန္နဘာဝေန ဝုတ္တာတိ ဝေဒိတဗ္ဗာ. အဘိဓမ္မပရိယာယေန ပန လောကုတ္တရာပီတိ အယမေတ္ထ ဓမ္မဘေဒေါ.

ဝိဘင်္ဂနယတော ပနေတ္ထ ပဉှာပုစ္ဆကနယော နတ္ထိ၊ သုတ္တန္တဘာဇနီယနယာပိ ဓမ္မဘေဒေ ဝုတ္တနယေနေဝ ဝိတ္ထာရတော ဝိဘတ္တာတိ ဝေဒိတဗ္ဗော. အဘိဓမ္မဘာဇနီယေ ပန –

‘‘အဝိဇ္ဇာပစ္စယာ သင်္ခါရော၊ သင်္ခါရပစ္စယာ ဝိညာဏံ၊ ဝိညာဏပစ္စယာ နာမံ၊ နာမပစ္စယာ ဆဋ္ဌာယတနံ၊ ဆဋ္ဌာယတနပစ္စယာ ဖဿော၊ ဖဿပစ္စယာ ဝေဒနာ၊ ဝေဒနာပစ္စယာ တဏှာ၊ တဏှာပစ္စယာ ဥပါဒါနံ၊ ဥပါဒါနပစ္စယာ ဘဝေါ၊ ဘဝပစ္စယာ ဇာတိ၊ ဇာတိပစ္စယာ ဇရာမရဏံ၊ ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ.

‘‘အဝိဇ္ဇာပစ္စယာ သင်္ခါရော။ပေ။ ဝိညာဏပစ္စယာ နာမံ၊ နာမပစ္စယာ ဖဿော။ပေ။ သမုဒယော ဟောတိ.

‘‘အဝိဇ္ဇာပစ္စယာ။ပေ။ ဝိညာဏပစ္စယာ နာမရူပံ၊ နာမရူပပစ္စယာ ဆဋ္ဌာယတနံ၊ ဆဋ္ဌာယတနပစ္စယာ ဖဿော။ပေ။ သမုဒယော ဟောတိ.

‘‘အဝိဇ္ဇာပစ္စယာ ။ပေ။ ဝိညာဏပစ္စယာ နာမရူပံ၊ နာမရူပပစ္စယာ သဠာယတနံ၊ ဆဋ္ဌာယတနပစ္စယာ ဖဿော။ပေ။ သမုဒယော ဟောတီ’’တိ (ဝိဘ. ၂၄၃) –

ဧဝံ ပစ္စယစတုက္ကံ၊ ပုန ‘‘အဝိဇ္ဇာပစ္စယာ သင်္ခါရော အဝိဇ္ဇာဟေတုကော’’တိအာဒိနာ (ဝိဘ. ၂၄၄) ဝုတ္တနယေနေဝ ဟေတုစတုက္ကံ၊ ပုန ‘‘အဝိဇ္ဇာပစ္စယာ သင်္ခါရော အဝိဇ္ဇာသမ္ပယုတ္တော’’တိအာဒိနာ (ဝိဘ. ၂၄၅) သမ္ပယုတ္တစတုက္ကံ၊ ပုန ‘‘အဝိဇ္ဇာပစ္စယာ သင်္ခါရော၊ သင်္ခါရပစ္စယာပိ အဝိဇ္ဇာ’’တိအာဒိနာ (ဝိဘ. ၂၄၆) အညမညပစ္စယစတုက္ကန္တိ ဧဝံ အဝိဇ္ဇာမူလကာနိ စတ္တာရိ စတုက္ကာနိ ဝုတ္တာနိ. ဧဝံ ‘‘သင်္ခါရပစ္စယာ အဝိဇ္ဇာ’’တိအာဒိနာ သင်္ခါရာဒိမူလကာဒိဥပါဒါနမူလကပရိယောသာနာနိ အဋ္ဌသု ပဒေသု စတ္တာရိ စတ္တာရိ စတုက္ကာနီတိ ဗာတ္တိံသ စတုက္ကာနိ မာတိကံ ကတွာ နိက္ခိပိတွာ ပုန အကုသလကုသလဝိပါကကိရိယစိတ္တေသု လောကိယလောကုတ္တရေသု ဧကေကသ္မိံ စိတ္တေ ယထာနိက္ခိတ္တေဟိ ဆတ္တိံသဗာတ္တိံသမာတိကာစတုက္ကေဟိ ဝိတ္ထာရတော ယထာနုရူပံ ပစ္စယာကာရော ဝိဘတ္တော. ဣဒဉ္စ ယသ္မာ န ကေဝလံ အယံ ပစ္စယာကာရော နာနာစိတ္တေသု ဧဝ ဟောတိ၊ ဧကစိတ္တေပိ ဟောတိယေဝ. နာပိ ဝဋ္ဋစိတ္တေ ဧဝ ဟောတိ၊ တဏှာဘာဝတော ဝိဝဋ္ဋစိတ္တေပိ၊ တသ္မာ တံ နိပ္ပဒေသတော ဧကစိတ္တက္ခဏိကံ ပစ္စယာကာရံ ဒဿေတုံ ဝုတ္တံ. တေနေဝ ဟေတ္ထ ‘‘အဝိဇ္ဇာပစ္စယာ သင်္ခါရာ’’တိ အဝတွာ ‘‘အဝိဇ္ဇာပစ္စယာ သင်္ခါရော’’တိ ဧကဝစနေန ဝုတ္တံ ဧကစိတ္တက္ခဏေ ဗဟုစေတနာဘာဝါ. တတ္ထ ယဒေတံ ပဌမစတုက္ကံ၊ တတ္ထ ပဌမဝါရော နာမရူပဋ္ဌာနေ နာမံ၊ သဠာယတနဋ္ဌာနေ ဆဋ္ဌာယတနဉ္စ ဂဟေတွာ ရူပါရူပါဒိသဗ္ဗဘဝသာဓာရဏဝသေန၊ ဧကစိတ္တက္ခဏပရိယာပန္နဓမ္မဂ္ဂဟဏဝသေန စ ရူပံ ဆဍ္ဍေတွာ ဝုတ္တော ရူပဿ သဗ္ဗဘဝါသာဓာရဏတ္တာ၊ ဗဟုစိတ္တက္ခဏိကတ္တာ စ. ဒုတိယော နာမရူပဋ္ဌာနေ နာမံ၊ ‘‘နာမပစ္စယာ ဖဿော’’တိ သဠာယတနဋ္ဌာနေ ဖဿမေဝ ဂဟေတွာ ဖဿဿ သဠာယတနံ ဝိနာပိ ပစ္စယဝိသေသသမ္ဘဝဒဿနဝသေန စေဝ မဟာနိဒါနသုတ္တနယဒဿနဝသေန (ဒီ. နိ. ၂.၉၅ အာဒယော) စ ဝုတ္တော. တတိယော သဠာယတနဋ္ဌာနေ ဆဋ္ဌာယတနမေဝ ဂဟေတွာ ဂဗ္ဘသေယျကာနံ အပရိပုဏ္ဏာယတနာနံ၊ ရူပဘဝိကာဒီနဉ္စ ဝသေန ဝုတ္တော. စတုတ္ထော ‘‘နာမပစ္စယာ သဠာယတနံ၊ သဠာယတနပစ္စယာ ဖဿော’’တိ ဧဝံ ဣတရာယတနေဟိပိ သဠာယတနဿ ဝိသေသတော ဖဿပစ္စယတံဝ ဒဿေတွာ ဩပပါတိကာနံ၊ ပရိပုဏ္ဏာယတနာနံ ကာမဘဝိကာနဉ္စ ဝသေန ဝုတ္တော. ဧဝံ ဒုတိယစတုက္ကာဒီသုပိ.

သဗ္ဗတ္ထာပိ စေတ္ထ ယသ္မာ သောကာဒယော သဗ္ဗေ ဧကစိတ္တက္ခဏေ န သမ္ဘဝန္တိ၊ သဗ္ဗသ္မိဉ္စ စိတ္တေ၊ ဘဝေ စ နပ္ပဝတ္တန္တိ၊ တသ္မာ န ဂဟိတာ. ဇာတိဇရာမရဏာနိ ပနေတ္ထ အရူပဓမ္မာနံ လက္ခဏမတ္တာနိ၊ တာနိ စ အစိတ္တက္ခဏမတ္တာနိပိ သမာနာနိ စိတ္တက္ခဏေ အန္တောဂဓတ္တာ ပရိယာယတော ပစ္စယုပ္ပန္နေ ကတွာ အင်္ဂပရိပူရဏတ္ထံ ဂဟိတာနိ. ဘဝေါတိ စေတ္ထ ဥပါဒါနာဒိပစ္စယဝိရဟိတာ စတ္တာရော အရူပိနော ခန္ဓာ၊ တဏှာပစ္စယာ ဥပါဒါနန္တိ ဧတ္ထ ကာမုပါဒါနံ ဝဇ္ဇေတွာ တီဏိ ဥပါဒါနာနိ ဧဝ ဂဟေတဗ္ဗာနိ. ဒွိန္နမ္ပိ ဧကလက္ခဏာနံ ဓမ္မာနံ ဧကက္ခဏေ အသမ္ဘဝါ လောဘမူလဝိရဟိတေသု ဒေါသမောဟမူလေသု စေဝ ကုသလာဗျာကတေသု စ စိတ္တေသု ဝေဒနာပစ္စယာ ပဋိဃံ ဝိစိကိစ္ဆာ ဥဒ္ဓစ္စန္တိ ဧဝံ တဏှာဌာနေ ယထာယောဂံ ပဋိဃာဒယော တယော. တေသု ဝိစိကိစ္ဆာဝဇ္ဇိတေသု စေဝ ဒိဋ္ဌိဝိပ္ပယုတ္တေသု စ ဥပါဒါနဋ္ဌာနေ အဓိမောက္ခော ဂဟိတော. ဝိစိကိစ္ဆာယ ပန သဒ္ဓိံ အဓိမောက္ခဿာပိ အသမ္ဘဝါ ဝိစိကိစ္ဆာပစ္စယာ ဘဝေါတိ စ ဂဟိတော. ဥပါဒါနဋ္ဌာနေ စ အဓိမောက္ခော စ ဂဟိတော. လောကိယာနဉ္စေတ္ထ ကုသလာဗျာကတာနံ ဥပနိဿယဝသေန အဝိဇ္ဇာပစ္စယတာ ဝုတ္တာ. လောကုတ္တရာနံ ပန ယသ္မာ အပ္ပဟီနာဝိဇ္ဇော အဝိဇ္ဇာယ ပဟာနတ္ထံ၊ ပဋိပ္ပဿမ္ဘနတ္ထဉ္စ လောကုတ္တရံ ဘာဝေတိ၊ တသ္မာ သမတိက္ကမနဝသေန အဝိဇ္ဇာပစ္စယတာ ဝုတ္တာ၊ န သဟဇာတဝသေန. တေနေဝ တေသံ နိဒ္ဒေသဝါရေသု ‘‘တတ္ထ ကတမာ အဝိဇ္ဇာ’’တိ အဝိဘဇိတွာ ‘‘တတ္ထ ကတမော အဝိဇ္ဇာပစ္စယာ သင်္ခါရော’’တိ (ဝိဘ. ၂၄၀) ဝိဘတ္တံ. ကိရိယဓမ္မာနံ ပန ကေနစိ ပရိယာယေန အဝိဇ္ဇာမူလကတ္တံ နတ္ထီတိ ‘‘သင်္ခါရပစ္စယာ ဝိညာဏ’’န္တိအာဒိနာ သင်္ခါရမူလကာဒိကော နယော ဝုတ္တော၊ န အဝိဇ္ဇာမူလကော. အပိစ လောကိယကုသလာဒီသု တေသံ ဓမ္မာနံ ဒုက္ခသစ္စပရိယာပန္နတ္တာ ‘‘ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတီ’’တိ (ဝိဘ. ၂၂၅) ဧဝံ အပ္ပနာ ကတာ၊ လောကုတ္တရကုသလာဒီသု ‘‘ဧဝမေတေသံ ဓမ္မာန’’န္တိ. အယံ လောကိယတော လောကုတ္တရာနံ ဒေသနာယ ဝိသေသောတိ အယံ အဘိဓမ္မဘာဇနီယေ နယော.

ဣဒါနိ ပစ္စယနယာ၊ ကာရကာဒီဟိ သုညတော၊

မူလဒ္ဓသန္ဓိသင်္ခေပါကာရဝဋ္ဋဝိဘာဂတော.

ဝါရဏောပမတောပေတ္ထ၊ ဂမ္ဘီရနယဘေဒတော၊

ယထာရဟံ ဝိဇာနီယော၊ ပါဠိမုတ္တဝိနိစ္ဆယော.

တတ္ထ ပစ္စယနယော သာမညတော၊ ဝိသေသတော စာတိ ဒုဝိဓော ဟောတိ. တတ္ထ တဗ္ဘာဝဘာဝိမတ္တတာပကာသကော သာမညတော ပစ္စယနယော. ဝိသေသတော ပန ပဋ္ဌာနေ အာဂတေသု ဟေတုပစ္စယာဒိစတုဝီသတိယာ ပစ္စယေသု ယထာနုရူပံ ပစ္စယဝိသေသုပ္ပန္နမတ္တတာပကာသကော. သာ စ နေသံ စတုဝီသတိယာ ပစ္စယာနံ ဝိဘာဂတာ ပဋ္ဌာနမာတိကတ္ထသံဝဏ္ဏနာယ အာဝိ ဘဝိဿတိ. တတ္ထ သာမညတော သင်္ခါရာဒယော အဝိဇ္ဇာဒိပစ္စယဘာဝေ ဧဝ ဘာဝိနောတိ ဝေဒိတဗ္ဗာ. ယဿ ဟိ စတူသု သစ္စေသု၊ ပုဗ္ဗန္တာဒီသု စ အဝိဇ္ဇာ အပ္ပဟီနာ ဟောတိ၊ သော ဒုက္ခေ တာဝ ပုဗ္ဗန္တာဒီသု စ အညာဏေန တီသု ဘဝေသု ဇာတိဇရာရောဂမရဏာဒိအနေကာဒီနဝဝေါကိဏ္ဏံ ပုညဖလသင်္ခါတံ သင်္ခါရဝိပရိဏာမဒုက္ခံ ဒုက္ခတော အဇာနန္တော သုခသညာယ ပတ္ထေတွာ တီဟိ ဒွါရေဟိ ပုညာနေဉ္ဇာဘိသင်္ခါရေ အာရဘတိ. သမုဒယေ အညာဏေန ဒုက္ခဟေတုဘူတေသုပိ တဏှာပရိက္ခာရေသု ဒုက္ခဟေတုကံ အာပါယိကာဒိဒုက္ခံ၊ ဒုက္ခဟေတုဘူတေသု ကာမူပသေဝနာဒီသု စ အာဒီနဝံ အပဿန္တော သုခဟေတုသညာယ စေဝ ကိလေသာဘိဘူတတာယ စ တိဝိဓေပိ သင်္ခါရေ အာရဘတိ. နိရောဓေ၊ ပန မဂ္ဂေ စ အညာဏေန အနိရောဓဘူတေ ဂတိဝိသေသေ နိရောဓသညီ၊ နိရောဓဿ စ ဝါ အမဂ္ဂဘူတေသုပိ ယညာမရတပါဒီသုပိ နိရောဓမဂ္ဂသညီ ဟုတွာ တိဝိဓေပိ သင်္ခါရေ အာရဘတိ. ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏေန ‘‘အဟေတူ အပ္ပစ္စယာ သတ္တာ ဥပ္ပဇ္ဇန္တိ၊ န ဟောန္တိ ပရံ မရဏာ’’တိ ဝါ ‘‘အတ္တာဝ ဇာနာတိ ဝါ န ဇာနာတိ ဝါ၊ သောဝ သင်္ခါရေ သင်္ခရောတိ၊ သောဝ ပဋိသန္ဓိယံ ဥပ္ပဇ္ဇတိ၊ တဿ အဏုဣဿရာဒယော ကလလာဒိဘာဝေန သရီရံ သဏ္ဌာပေန္တာ ဣန္ဒြိယာနိ သမ္ပာဒေန္တိ၊ သောဝ ဣန္ဒြိယသမ္ပန္နော ဖုသတိ၊ ဝေဒယတိ၊ တဏှိယတိ၊ ဥပါဒါနာဒီနိ စ ကရောတီ’’တိ ဝါ ‘‘သဗ္ဗေ သတ္တာ နိယတိသင်္ဂတိဘဝပရိဏတာ’’တိ ဝါ ဝိကပ္ပေတိ. သော ဧဝံ အဝိဇ္ဇာယ အန္ဓီကတော –

‘‘ယထာပိ နာမ ဇစ္စန္ဓော၊ နရော အပရိဏာယကော၊

ဧကဒါ ယာတိ မဂ္ဂေန၊ ဥမ္မဂ္ဂေနာပိ ဧကဒါ.

‘‘သံသာရေ သံသရံ ဗာလော၊ တထာ အပရိဏာယကော၊

ကရောတိ ဧကဒါ ပုညံ၊ အပုညမပိ ဧကဒါ’’တိ. (ဝိဘ. အဋ္ဌ. ၂၂၆ သင်္ဂါရပဒနိဒ္ဒေသ) –

ဝုတ္တနယေန တိဝိဓေ သင်္ခါရေ အဘိသင်္ခရောတီတိ. ကိံ ပနေတ္ထ ဧကာဝ အဝိဇ္ဇာ သင်္ခါရာနံ ပစ္စယော ဟောတိ၊ နနု ဧကသ္မာ ကာရဏာ ဧကံဝ ကာရိယံ ဥပ္ပဇ္ဇတိ၊ အနေကံ ကာရိယံ န ဥပ္ပဇ္ဇတိ၊ အနေကသ္မာ ဝါ ဧကန္တိ၊ အနေကသ္မာ ကာရဏာ အနေကံ ကာရိယံ ဥပ္ပဇ္ဇတီတိ? သစ္စံ၊ ပဓာနတ္တပါကဋတ္တအသာဓာရဏတ္တဒီပနတ္ထံ ပနေတ္ထ အနေကေသု ကာရဏေသုပိ ဧကာ အဝိဇ္ဇာ ဧဝ ပစ္စယဘာဝေန နိဒ္ဒိဋ္ဌာ ‘‘ဖဿပစ္စယာ ဝေဒနာ (ဥဒါ. ၃)၊ သေမှသမုဋ္ဌာနာ အာဗာဓာ’’တိအာဒီသု (အ. နိ. ၁၀.၆၀၊ မဟာနိ. ၅၊ စူဠနိ. ခဂ္ဂဝိသာဏသုတ္တနိဒ္ဒေသ ၁၂၈) ဝိယ. အဝိဇ္ဇာ ဟိ ပဓာနော ဟေတု၊ သင်္ခါရာနံ ပါကဋော၊ အသာဓာရဏော စ တဏှာဒိဟေတူနမ္ပိ ဟေတုတ္တာ၊ န ဝတ္ထာရမ္မဏာဒီနိ ခီဏာသဝဿ တေသံ သမ္ဘဝေပိ သင်္ခါရာနံ အဘာဝါတိ. ဧဝံ တာဝေတ္ထ ဝဋ္ဋသင်္ခါရာနံ အဝိဇ္ဇာယ ဧဝ ဘာဝေ ဘာဝေါ ဝေဒိတဗ္ဗော. တထာ ဝိညာဏဿာပိ ဥပစိတကမ္မာဘာဝေ အဘာဝတော၊ သဗ္ဗတ္ထ သဗ္ဗေသဉ္စ သဗ္ဗဝိပါကဝိညာဏုပ္ပတ္တိပ္ပသင်္ဂတော စ သင်္ခါရာနံ ဧဝ ဘာဝေ ဘာဝေါ ဝေဒိတဗ္ဗော. ယထာ စေတ္ထ၊ ဧဝံ ဥပရိပိ နာမရူပါဒီနံ ဝိညာဏာဒိဘာဝေ ဘာဝေါ ယထာနုရူပံ အနုဘဝယုတ္တီဟိ ဉာတဗ္ဗောတိ အယံ သာမညတော ပစ္စယနယော.

ဝိသေသတော ပန အဝိဇ္ဇာ ပုညာဘိသင်္ခါရာနံ တာဝ အာရမ္မဏပစ္စယေန၊ ဥပနိဿယပစ္စယေန စာတိ ဒွိဓာ ပစ္စယော ဟောတိ. သာ ဟိ အဝိဇ္ဇံ အာရဗ္ဘ သမ္မသနာဒိဝသေန ဥပ္ပတ္တိယံ ကာမာဝစရာနံ၊ အဘိညာစိတ္တေန သမောဟစိတ္တဿ ဇာနနကာလေ ရူပါဝစရာနဉ္စ ပုညာဘိသင်္ခါရာနံ တာဝ အာရမ္မဏပစ္စယေန ပစ္စယော ဟောတိ၊ အဝိဇ္ဇာသမတိက္ကမနတ္ထာယ ပန အဝိဇ္ဇာသမ္မူဠှတာယ ကာမရူပဘဝသမ္ပတ္တိယော ပတ္ထေတွာဝ ကာမရူပါဝစရပုညာနိ ကရောန္တဿ ဥပနိဿယပစ္စယေန ပစ္စယော ဟောတိ. အပုညာဘိသင်္ခါရာနံ ပနေသာ အဝိဇ္ဇံ အာရဗ္ဘ ရာဂါဒီနံ ဥပ္ပဇ္ဇနကာလေ အာရမ္မဏာဒိပစ္စယေန အဝိဇ္ဇာသမ္မူဠှတာယ ပါဏာတိပါတာဒီနိ ကရောန္တဿ နိဿယပစ္စယေန၊ ဒုတိယဇဝနာဒီနံ အနန္တရူပနိဿယာသေဝနနတ္ထိဝိဂတပစ္စယေဟိ ယံ ကိဉ္စိ အကုသလံ ကရောန္တဿ ဟေတုသဟဇာတအညမညနိဿယသမ္ပယုတ္တအတ္ထိအဝိဂတပစ္စယေဟီတိ ဧဝံ အနေကဓာ ပစ္စယော ဟောတိ၊ အာနေဉ္ဇာဘိသင်္ခါရာနံ ပန ဧကေန ဥပနိဿယပစ္စယေနေဝ ပစ္စယော ဟောတိ.

သင်္ခါရပစ္စယာ ဝိညာဏပဒေ ပန တယောပိ သင်္ခါရာ ဝိညာဏဿ ယထာရဟံ တီသု ဘဝေသု ပဋိသန္ဓိပဝတ္တီသု ကမ္မပစ္စယေန စေဝ ဥပနိဿယပစ္စယေန စာတိ ဒွိဓာ ပစ္စယာ ဟောန္တိ. အဘိဓမ္မဘာဇနီယနယေန သဟဇာတဿ ဝိညာဏဿ သဟဇာတအညမညနိဿယသမ္ပယုတ္တကမ္မတ္ထိအဝိဂတာဒိပစ္စယေဟိ ပစ္စယာ ဟောန္တိ.

ဝိညာဏပစ္စယာ နာမရူပပဒေ ပန ဝိညာဏံ ဝိပါကဘူတံ၊ အဝိပါကဘူတဉ္စ နာမဿ ကေဝလဿ ဝါ ရူပမိဿကဿ ဝါ ပဋိသန္ဓိပဝတ္တီသု သဟဇာတအညမညနိဿယသမ္ပယုတ္တဝိပါကအာဟာရဣန္ဒြိယအတ္ထိအဝိဂတပစ္စယေဟိ ယထာရဟံ နဝဓာ၊ အဋ္ဌဓာ ဝါ ပစ္စယော ဟောတိ. ပဋိသန္ဓိယံ ဝိပါကဝိညာဏံ ဝတ္ထုရူပဿ သဟဇာတအညမညနိဿယဝိပါကအာဟာရဣန္ဒြိယဝိပ္ပယုတ္တအတ္ထိ အဝိဂတပစ္စယေဟိ နဝဓာ ပစ္စယော ဟောတိ. ဌပေတွာ ပန ဝတ္ထုရူပံ သေသရူပဿ တေဟေဝ အညမညပစ္စယရဟိတေဟိ အဋ္ဌဟိ ပစ္စယော ဟောတိ. အဘိသင်္ခါရဝိညာဏံ ပန ဧကဝေါကာရပဉ္စဝေါကာရဘဝေသု ကမ္မဇရူပဿ သုတ္တန္တိကပရိယာယေန ဥပနိဿယဝသေန ပစ္စယော ဟောတိ. ပဝတ္တိယံ ပန သဗ္ဗမ္ပိ ဝိညာဏံ တဿ တဿ နာမရူပဿ ယထာရဟံ ပစ္စယော ဟောတိ. တတ္ထ အရူပဘဝေ ဝိညာဏံ နာမဿေဝ၊ အသညိဘဝေ ရူပဿေဝ၊ ပဉ္စဝေါကာရဘဝေ နာမရူပဿ ပစ္စယော ဟောတီတိ ဝေဒိတဗ္ဗံ. တေနေဝ နာမဉ္စ ရူပဉ္စ နာမရူပဉ္စ နာမရူပန္တိ နိဗ္ဗစနံ ကတန္တိ.

နာမရူပပစ္စယာ သဠာယတနပဒေ ပန နာမံ ဝိပါကဘူတံ၊ အဝိပါကဘူတဉ္စ အရူပဘဝေ ဆဋ္ဌာယတနဿ အဝကံသတော သဟဇာတအညမညနိဿယသမ္ပယုတ္တဝိပါကအတ္ထိအဝိဂတဝသေန ယထာရဟံ သတ္တဓာ ပစ္စယော ဟောတိ. ဣတရေသံ ပနေတံ ပဉ္စန္နံ စက္ခာယတနာဒီနံ ပဉ္စဝေါကာရဘဝေ ပဋိသန္ဓိယံ စတုမဟာဘူတသဟာယံ ဟုတွာ သဟဇာတနိဿယဝိပါကဝိပ္ပယုတ္တအတ္ထိအဝိဂတဝသေန ဆဓာ ပစ္စယော ဟောတိ. ကိဉ္စိ ပနေတ္ထ ဟေတုပစ္စယေန၊ ကိဉ္စိ အာဟာရပစ္စယေန စာတိ တေသံ ဝသေန သဗ္ဗဝါရေသု ဥက္ကံသာဝကံသော ဝေဒိတဗ္ဗော. ပဝတ္တေ ပန စက္ခာဒီနံ ပဉ္စန္နံ ဝိပါကမဝိပါကမ္ပိ နာမံ ပစ္ဆာဇာတဝိပ္ပယုတ္တအတ္ထိအဝိဂတဝသေန စတုဓာ ပစ္စယော ဟောတီတိ. ဧဝံ တာဝ နာမမေဝ သဠာယတနဿ ပစ္စယော ဟောတီတိ ဝေဒိတဗ္ဗံ.

ရူပံ ပန ဝတ္ထုဘူတံ ပဋိသန္ဓိယံ ဆဋ္ဌာယတနဿ သဟဇာတအညမညနိဿယဝိပ္ပယုတ္တအတ္ထိအဝိဂတဝသေန ဆဓာ ပစ္စယော ဟောတိ. စတုမဟာဘူတရူပံ စက္ခာဒီနံ ပဉ္စန္နံ ပဋိသန္ဓိယံ၊ ပဝတ္တေ စ သဟဇာတနိဿယအတ္ထိအဝိဂတပစ္စယေဟိ စတုဓာ ပစ္စယော ဟောတိ. ရူပဇီဝိတိန္ဒြိယံ ပန ဣန္ဒြိယအတ္ထိအဝိဂတဝသေန တိဝိဓာ. တထာ အာဟာရော အာဟာရတ္ထိအဝိဂတဝသေန. သော စ အာဟာရူပဇီဝီနံ ပဝတ္တေယေဝ၊ နော ပဋိသန္ဓိယံ. တာနိ ပန ပဉ္စ စက္ခာယတနာဒီနိ ပဉ္စဝိညာဏသင်္ခါတဿ ဆဋ္ဌဿ မနာယတနဿ နိဿယပုရေဇာတဣန္ဒြိယဝိပ္ပယုတ္တအတ္ထိအဝိဂတဝသေန ဆဓာ ပစ္စယာ ဟောန္တိ ပဝတ္တေယေဝ၊ နော ပဋိသန္ဓိယံ. တထာ ပဉ္စဝိညာဏဝိရဟိတမနာယတနဿ ဝတ္ထုရူပံ နိဿယပုရေဇာတဝိပ္ပယုတ္တအတ္ထိအဝိဂတဝသေန ပဉ္စဓာ ပစ္စယော ဟောတီတိ. ဧဝံ ရူပမေဝ ဆဋ္ဌာယတနဿ၊ သဠာယတနဿ စ ပစ္စယော ဟောတီတိ ဝေဒိတဗ္ဗံ. ခန္ဓတ္တယဝတ္ထုရူပသင်္ခါတံ ပန နာမရူပံ ဆဋ္ဌာယတနဿ ပဋိသန္ဓိယံ သဟဇာတအညမညနိဿယသမ္ပယုတ္တဝိပ္ပယုတ္တဝိပါကအတ္ထိအဝိဂတာဒိဝသေန ယထာရဟံ ပစ္စယော ဟောတီတိ. ဧဝံ နာမဉ္စ ရူပဉ္စ နာမရူပဉ္စ ယထာရဟံ ဆဋ္ဌာယတနဿ၊ သဠာယတနဿ စ ပစ္စယော ဟောတီတိ ဝေဒိတဗ္ဗံ.

သဠာယတနပစ္စယာ ဖဿပဒေ ပန ဆဋ္ဌာယတနံ ဝိပါကံ၊ အဝိပါကဉ္စ သဗ္ဗတ္ထ သမ္ပယုတ္တဖဿဿ သဟဇာတာဒိဝသေန နဝဓာ၊ အဋ္ဌဓာ ဝါ ပစ္စယော ဟောတိ. စက္ခာယတနာဒီနိ ပဉ္စ ယထာက္ကမံ ပဝတ္တေ စက္ခုသမ္ဖဿာဒီနံ ပဉ္စန္နံ နိဿယပုရေဇာတဣန္ဒြိယဝိပ္ပယုတ္တအတ္ထိအဝိဂတဝသေန ဆဓာ၊ ရူပါယတနာဒီနိ ပဉ္စ တေသံ အာရမ္မဏပုရေဇာတအတ္ထိအဝိဂတဝသေန တိဓာ. မနောသမ္ဖဿဿ ပန တာနိ၊ ဓမ္မာရမ္မဏဉ္စ တထာ စ အာရမ္မဏာဓိပတိမတ္တေန စာတိ ဗဟုဓာ ပစ္စယာ ဟောန္တိ. ဧဝံ ဆဋ္ဌာယတနဉ္စ သဠာယတနဉ္စ ဆဗ္ဗိဓဿာပိ ဖဿဿ ပစ္စယော ဟောတီတိ ဝေဒိတဗ္ဗံ.

ဖဿပစ္စယာ ဝေဒနာပဒေ သဗ္ဗောပိ ဖဿော သဟဇာတာနံ ဝေဒနာနံ သဟဇာတအညမညနိဿယဝိပါကအာဟာရသမ္ပယုတ္တအတ္ထိအဝိဂတဝသေန အဋ္ဌဓာ၊ သတ္တဓာ ဝါ ပစ္စယော ဟောတိ၊ အသဟဇာတာနံ ဥပနိဿယဝသေနေဝါတိ.

ဝေဒနာပစ္စယာ တဏှာပဒေ ဝိပါကဝေဒနာ အနုသယပတိတာယ တဏှာယ ဥပနိဿယဝသေန၊ သဟဇာတာဒိဝသေန စ ပစ္စယော ဟောတိ. ယသ္မာ ပန –

ဒုက္ခီ သုခံ ပတ္ထယတိ၊ သုခီ ဘိယျောပိ ဣစ္ဆတိ၊

ဥပေက္ခာ ပန သန္တတ္တာ၊ သုခမိစ္စေဝ ဘာသိတာ၊

တဏှာယ ပစ္စယာ တသ္မာ၊ ဟောန္တိ တိဿောပိ ဝေဒနာတိ. (ဝိသုဒ္ဓိ. ၂.၆၄၄)၊

တဏှာပစ္စယာ ဥပါဒါနပဒေ တဏှာ အသဟဇာတာ စတုန္နမ္ပိ ဥပါဒါနာနံ ဥပနိဿယဝသေန စေဝ အနန္တရာဒိဝသေန စ၊ သဟဇာတာ ပန ကာမုပါဒါနဝဇ္ဇိတာနံ တိဏ္ဏံ ဟေတုသဟဇာတ အညမညနိဿယသမ္ပယုတ္တအတ္ထိအဝိဂတဝသေန သတ္တဓာ ပစ္စယော ဟောတိ.

ဥပါဒါနပစ္စယာ ဘဝပဒေ စတုဗ္ဗိဓမ္ပိ ဥပါဒါနံ အသဟဇာတဿ သဗ္ဗကမ္မဘဝဿ စေဝ ဥပပတ္တိဘဝဿ စ ဥပနိဿယဝသေနေဝ ပစ္စယော ဟောတိ၊ သဟဇာတဿ ပန ကမ္မဘဝဿ ဟေတုသဟဇာတာဒိဝသေန ပစ္စယော ဟောတိ.

ဘဝပစ္စယာ ဇာတိပဒေ ဘဝေါတိ ကမ္မဘဝေါဝ အဓိပ္ပေတော၊ သော စ ဇာတိယာ ကမ္မပစ္စယဥပနိဿယပစ္စယဝသေန ဒွိဓာ ပစ္စယော ဟောတိ.

ဇာတိပစ္စယာ ဇရာမရဏာဒိပဒေ ဇာတိ ပန ဇရာမရဏာနံ၊ သောကာဒီနဉ္စ တဗ္ဘာဝဘာဝီဘာဝမတ္တတော သုတ္တန္တိကနယေန ဥပနိဿယကောဋိယာဝ ပစ္စယော ဟောတီတိ အယံ တာဝေတ္ထ ပစ္စယနယော.

ကာရကာဒီဟိ သုညတော ပနေတေ အဝိဇ္ဇာဒယော ဒွါဒသ ဓမ္မာ ယသ္မာ ဧဝံ ပစ္စယပစ္စယုပ္ပန္နဘာဝေန အညမညံ ပဋိဗဒ္ဓါ အညနိရပေက္ခာ ဟုတွာ အဝိစ္ဆိန္နာ အနာဒိကာ ပဝတ္တန္တိ၊ တသ္မာ တတော အညေန ဗြဟ္မာဒိနာ ကာရကေန၊ ပကတိအဏုကာလာဒိဟေတုနာ ဝါ ကာရကဝေဒကရူပေန ပရပရိကပ္ပိတေန အတ္တနာ ဝါ ရဟိတာ. န စေတေ အတ္တာ၊ န အတ္တနိ၊ န အတ္တဝန္တော၊ သုညာ ဧတေ အတ္တေန ဝါ အတ္တနိယေန ဝါ ဓုဝဘာဝေန ဝါ သုဘဘာဝေန ဝါ သုခဘာဝေန ဝါတိ အယံ ကာရကာဒီဟိ သုညတာ.

မူလဒ္ဓသန္ဓိသင်္ခေပါကာရဝဋ္ဋဝိဘာဂတောတိ ဧတ္ထ မူလတော တာဝ အဝိဇ္ဇာ၊ တဏှာ စာတိ ဒွေ ဓမ္မာ မူလန္တိ ဝေဒိတဗ္ဗာ. အဒ္ဓတော ပနေတ္ထ အဝိဇ္ဇာ၊ သင်္ခါရာတိ ဒွေ အင်္ဂါနိ အတီတော အဒ္ဓါ၊ ဝိညာဏာဒီနိ ဘဝါဝသာနာနိ အဋ္ဌ ပစ္စုပ္ပန္နော အဒ္ဓါ၊ ဇာတိ စေဝ ဇရာမရဏဉ္စာတိ ဒွေ အနာဂတော အဒ္ဓါတိ တယော အဒ္ဓါ ဝေဒိတဗ္ဗာ. သန္ဓိတော ပန သင်္ခါရာနံ၊ ပဋိသန္ဓိဝိညာဏဿ စ အန္တရာ ဧကော ဟေတုဖလသန္ဓိ၊ ဝေဒနာယ စ တဏှာယ စ အန္တရာ ဧကော ဖလဟေတုသန္ဓိ၊ ဘဝဿ စ ဇာတိယာ စ အန္တရာ ဧကော ဟေတုဖလသန္ဓိ စာတိ တယော သန္ဓီ ဝေဒိတဗ္ဗာ. သင်္ခေပတော ပန သန္ဓီနံ အာဒိပရိယောသာနဝဝတ္ထိတာ စတ္တာရော သင်္ခေပါ ဟောန္တိ. သေယျထိဒံ – အဝိဇ္ဇာသင်္ခါရာ ဧကော သင်္ခေပေါ၊ ဝိညာဏနာမရူပသဠာယတနဖဿဝေဒနာ ဒုတိယော၊ တဏှုပါဒါနဘဝါ တတိယော၊ ဇာတိဇရာမရဏာနိ စတုတ္ထောတိ ဧဝံ စတ္တာရော သင်္ခေပါ ဝေဒိတဗ္ဗာ.

အာကာရတော ပနေတ္ထ –

အတီတေ ဟေတုယော ပဉ္စ၊ ဣဒါနိ ဖလပဉ္စကံ၊

ဣဒါနိ ဟေတုယော ပဉ္စ၊ အာယတိံ ဖလပဉ္စကန္တိ. –

ဧဝံ ဝီသတိ အာကာရာ ဟောန္တိ.

ဧတ္ထ ဟိ သရူပတော ဝုတ္တာ အဝိဇ္ဇာသင်္ခါရာ၊ တေသံ ဂဟဏေန တဒဝိနာဘာဝတော ဂဟိတာ တဏှုပါဒါနဘဝါတိ ဣမေ ပဉ္စ ဓမ္မာ အတီတေ ဟေတုယော နာမ၊ သရူပတော ဝုတ္တာ ဝိညာဏာဒယော ပဉ္စ ဓမ္မာ ဣဒါနိ ဖလပဉ္စကံ နာမ၊ သရူပတော ပန ဝုတ္တာ တဏှုပါဒါနဘဝါ၊ တေသံ ဂဟဏေန တဒဝိနာဘာဝတော ဂဟိတာ အဝိဇ္ဇာသင်္ခါရာတိ ဣမေ ပဉ္စ ဣဒါနိ ဟေတုယော နာမ. ဇာတိအာဒိအပဒေသေန ဝုတ္တာ ဝိညာဏာဒယော ပဉ္စ ဓမ္မာ အာယတိံ ဖလပဉ္စကံ နာမာတိ ဧဝံ ဝီသတိ အာကာရာ ဝေဒိတဗ္ဗာ. ဝဋ္ဋတော ပနေတ္ထ သင်္ခါရဘဝါ ကမ္မဝဋ္ဋံ၊ အဝိဇ္ဇာတဏှုပါဒါနာ ကိလေသဝဋ္ဋံ၊ သေသာနိ ဝိပါကဝဋ္ဋန္တိ တီဏိ ဝဋ္ဋာနိ ဟောန္တိ. ယာဝ စ တေသု ကိလေသဝဋ္ဋံ အရိယမဂ္ဂေန န ဥပစ္ဆိဇ္ဇတိ၊ တာဝ ဣဒံ ဘဝစက္ကံ အနုပစ္ဆိန္နံ ပဝတ္တတီတိ အယမေတ္ထ မူလဒ္ဓသန္ဓိသင်္ခေပါကာရဝဋ္ဋဝိဘာဂေါ.

ဝါရဏောပမတောတိ ဧတ္ထ ဝါရဏတော တာဝ – ‘‘အဝိဇ္ဇာပစ္စယာ သင်္ခါရာ’’တိ ဣဒမဟေတုကဝိသမဟေတုကဒဿနနိဝါရဏံ၊ ‘‘သင်္ခါရပစ္စယာ ဝိညာဏ’’န္တိ ဥစ္ဆေဒအတ္တသင်္ကန္တိဒဿနနိဝါရဏံ၊ ‘‘ဝိညာဏပစ္စယာ နာမရူပ’’န္တိ အတ္တာတိ ပရိကပ္ပိတဝတ္ထုဘေဒဒဿနတော ဃနသညာနိဝါရဏံ၊ ‘‘နာမရူပပစ္စယာ သဠာယတန’’န္တိအာဒိ အတ္တာ ပဿတိ။ပေ။ ဝိဇာနာတိ ဖုသတိ၊ ဝေဒယတိ၊ တဏှိယတိ၊ ဥပါဒိယတိ၊ ဘဝတိ၊ ဇာယတိ၊ ဇီယတိ၊ မီယတီတိ ဧဝမာဒိဒဿနနိဝါရဏန္တိ ဣဒမေတ္ထ မိစ္ဆာဒဿနနိဝါရဏံ.

ဥပမာတော ပနေတ္ထ အန္ဓော ဝိယ အဝိဇ္ဇာ၊ တဿ ဥပက္ခလနံ ဝိယ သင်္ခါရာ၊ ပတနံ ဝိယ ဝိညာဏံ၊ တေန ဂဏ္ဍပါတုဘာဝေါ ဝိယ နာမရူပံ၊ တဿ ဂဏ္ဍဘေဒပီဠကာ ဝိယ သဠာယတနံ၊ တဿ သင်္ဃဋ္ဋနံ ဝိယ ဖဿော၊ တဇ္ဇနိတဒုက္ခံ ဝိယ ဝေဒနာ၊ ဒုက္ခဿ ပဋိကာရာဘိလာသော ဝိယ တဏှာ၊ အသပ္ပါယဂ္ဂဟဏံ ဝိယ ဥပါဒါနံ၊ အသပ္ပါယာလေပနံ ဝိယ ဘဝေါ၊ တေန ဂဏ္ဍဝိကာရပါတုဘာဝေါ ဝိယ ဇာတိ၊ တဗ္ဗိကာရဘေဒေါ ဝိယ ဇရာမရဏံ. ယထာသဘာဝဒဿနနိဝါရဏာဒိတော ဝါ ဧတေ အဝိဇ္ဇာဒယော အက္ခိပဋလာဒိ ဥပမာဟိပိ ဝေဒိတဗ္ဗာတိ အယမေတ္ထ ဥပမာ.

ဂမ္ဘီရနယဘေဒတောတိ ဧတ္ထ ဂမ္ဘီရဘေဒေါ တာဝ ဣမေသံ အဝိဇ္ဇာဒီနံ ပစ္စေကံ ဓမ္မတ္ထဒေသနာပဋိဝေဓဂမ္ဘီရတာ ဝေဒိတဗ္ဗာ. ဣမေ ဟိ အဝိဇ္ဇာဒယော ဓမ္မာ ယေနာကာရေန ယဒဝတ္ထာ စ သင်္ခါရာဒီနံ ဖလာနံ ပစ္စယာ ဟောန္တိ၊ သော နေသံ ပစ္စယဋ္ဌော ဒုရဝဗောဓတော ဂမ္ဘီရောတိ အယမေတ္ထ ဓမ္မဂမ္ဘီရတာ. ဓမ္မောတိ ဟေတု ‘‘ဟေတုမှိ ဉာဏံ ဓမ္မပဋိသမ္ဘိဒါ’’တိ (ဝိဘ. ၇၂၀) ဝစနတော. ဇရာမရဏာဒီနံ ဖလာနံ ဇာတိအာဒီဟိ ပစ္စယေဟိ သမ္ဘူတသမုဒါဂတဋ္ဌော ဒုရဝဗောဓတော ဂမ္ဘီရောတိ အယံ အတ္ထဂမ္ဘီရတာ. အတ္ထောတိ ဖလံ ‘‘ဟေတုဖလေ ဉာဏံ အတ္ထပဋိသမ္ဘိဒါ’’တိ (ဝိဘ. ၇၂၀) ဝစနတော. တေသံ ပန ဟေတူနံ၊ ဖလာနဉ္စ တေန တေနာကာရေန အဝိပရီတတော ဒေသနာပိ သဗ္ဗညုတညာဏဿေဝ ဂေါစရတော ဂမ္ဘီရာတိ အယံ ဒေသနာဂမ္ဘီရတာ. ယော ပနေသံ အဝိဇ္ဇာသင်္ခါရာဒီနံ အဒဿနာယူဟနာဒိသဘာဝေါ၊ သော မန္ဒပညေဟိ ဒုပ္ပရိယောဂါဟတ္တာ ဂမ္ဘီရောတိ အယံ ပဋိဝေဓဂမ္ဘီရတာတိ အယမေတ္ထ ဂမ္ဘီရဘေဒေါ.

နယဘေဒေါ ပနေတ္ထ ဧကတ္တနယော နာနတ္တနယော အဗျာပါရနယော ဧဝံဓမ္မတာနယောတိ ဣမေသံ စတုန္နံ အတ္ထနယာနံ ဝသေန ဝေဒိတဗ္ဗော. တတ္ထ ဟိ ‘‘အဝိဇ္ဇာပစ္စယာ သင်္ခါရာ၊ သင်္ခါရပစ္စယာ ဝိညာဏ’’န္တိ ဧဝံ ဗီဇဿ အင်္ကုရာဒိဘာဝေန ရုက္ခဘာဝပ္ပတ္တိ ဝိယ သန္တာနာနုပစ္ဆေဒေါ ဧကတ္တနယော နာမ. ယံ သမ္မာ ပဿန္တော ဟေတုဖလသမ္ဗန္ဓေန သန္တာနာနုပစ္ဆေဒါဝဗောဓတော ဥစ္ဆေဒဒိဋ္ဌိံ ပဇဟတိ၊ မိစ္ဆာ ပဿန္တော ဟေတုဖလသမ္ဗန္ဓေန ပဝတ္တမာနဿ သန္တာနာနုပစ္ဆေဒဿ ဧကတ္တဂ္ဂဟဏတော သဿတဒိဋ္ဌိံ ဥပါဒိယတိ.

အဝိဇ္ဇာဒီနံ ပန ယထာသကံ လက္ခဏဝဝတ္ထာနံ နာနတ္တနယော နာမ. ယံ သမ္မာ ပဿန္တော နဝနဝါနံ ဥပ္ပါဒဒဿနတော သဿတဒိဋ္ဌိံ ပဇဟတိ၊ မိစ္ဆာ ပဿန္တော ဧကသန္တာနပတိတဿ ဘိန္နသန္တာနဿေဝ နာနတ္တဂ္ဂဟဏတော ဥစ္ဆေဒဒိဋ္ဌိံ ဥပါဒိယတိ.

အဝိဇ္ဇာယ ပန ‘‘သင်္ခါရာ မယာ ဥပ္ပါဒေတဗ္ဗာ၊ သင်္ခါရာနံ ဝါ ဝိညာဏံ အမှေဟီ’’တိ ဧဝမာဒိဗျာပါရာဘာဝေါ အဗျာပါရနယော နာမ. ယံ သမ္မာ ပဿန္တောကာရကဿ အဘာဝါဝဗောဓတော အတ္တဒိဋ္ဌိံ ပဇဟတိ၊ မိစ္ဆာ ပဿန္တော ယော အသတိပိ ဗျာပါရေ အဝိဇ္ဇာဒီနံ သဘာဝနိယမသိဒ္ဓေါ ဟေတုဘာဝေါ၊ တဿ အဂ္ဂဟဏတော အကိရိယဒိဋ္ဌိံ ဥပါဒိယတိ.

အဝိဇ္ဇာဒီဟိ ပန ကာရဏေဟိ သင်္ခါရာဒီနံယေဝ သမ္ဘဝေါ ခီရာဒီဟိ ဒဓိအာဒီနံ ဝိယ၊ န အညေသန္တိ အယံ ဧဝံဓမ္မတာနယော နာမ. ယံ သမ္မာ ပဿန္တော ပစ္စယာနုရူပတော ဖလာဝဗောဓတော အဟေတုကဒိဋ္ဌိံ၊ အကိရိယဒိဋ္ဌိဉ္စ ပဇဟတိ၊ မိစ္ဆာ ပဿန္တော ပစ္စယာနုရူပံ ဖလပ္ပဝတ္တိံ အဂ္ဂဟေတွာ ယတော ကုတောစိ ယဿ ကဿစိ အသမ္ဘဝဂ္ဂဟဏတော အဟေတုကဒိဋ္ဌိံ စေဝ နိယတဝါဒဉ္စ ဥပါဒိယတီတိ အယမေတ္ထ နယဘေဒေါတိ ဧဝံ ဝိဇာနီယော ပါဠိမုတ္တဝိနိစ္ဆယော.

ပစ္စယာကာရဝိဘင်္ဂမာတိကတ္ထဝဏ္ဏနာ နိဋ္ဌိတာ.