ခုဒ္ဒကဝတ္ထုဝိဘင်္ဂမာတိကတ္ထဝဏ္ဏနာ

ခုဒ္ဒကဝတ္ထုဝိဘင်္ဂမာတိကာယ ပနာယံ နိက္ခေပပရိစ္ဆေဒေန သဒ္ဓိံ အတ္ထတော ဝိနိစ္ဆယော. မာတိကာယ ဟိ အာဒိတော တာဝ – ဇာတိမဒေါတိအာဒယော တေသတ္တတိ ဧကကာ နိက္ခိတ္တာ၊ တတော ကောဓော စ ဥပနာဟော စာတိအာဒယော အဋ္ဌာရသ ဒုကာ၊ အကုသလမူလာဒယော ပဉ္စတိံသ တိကာ၊ အာသဝစတုက္ကာဒယော စုဒ္ဒသ စတုက္ကာ၊ ဩရမ္ဘာဂိယသံယောဇနာဒယော ပန္နရသ ပဉ္စကာ၊ ဝိဝါဒမူလာဒယော စုဒ္ဒသ ဆက္ကာ၊ အနုသယာဒယော သတ္တ သတ္တကာ၊ ကိလေသဝတ္ထုအာဒယော အဋ္ဌ အဋ္ဌကာ၊ အာဃာတဝတ္ထုအာဒယော နဝ နဝကာ၊ ကိလေသဝတ္ထုအာဒယော သတ္တ ဒသကာ၊ ဆန္နံ အဋ္ဌာရသကာနံ ဝသေန အဋ္ဌသတတဏှာဝိစရိတာနိ စ ယထာက္ကမံ နိက္ခိပိတွာ အန္တေ ဒွါသဋ္ဌိ ဒိဋ္ဌိဂတာနိ ဗြဟ္မဇာလသုတ္တေ အတိဒဿိတာနီတိ သဗ္ဗာနိပိ တေသဋ္ဌိအဓိကာနိ အဋ္ဌကိလေသသတာနိ နိက္ခိတ္တာနီတိ ဝေဒိတဗ္ဗာနိ. အယံ တာဝ နိက္ခေပပရိစ္ဆေဒေါ.

အတ္ထတော ပန ‘‘ဇာတိမဒေါ’’တိအာဒီသု ဇာတိဥစ္စာကုလီနတံ နိဿာယ ‘‘ခတ္တိယာဒီနံ စတုန္နမ္ပိ ဝဏ္ဏာနံ အဟံ ဥတ္တမဇာတိကော၊ ဣမေ န ဥတ္တမဇာတိကာ’’တိ ဧဝံ အတ္တုက္ကံသနပရဝမ္ဘနဝသေန ဥပ္ပန္နော မဇ္ဇနာကာရပ္ပဝတ္တော မာနော ဇာတိမဒေါ နာမ. သေသပဒေသုပိ ဧသေဝ နယော. တတ္ထ အာဒိစ္စဂေါတ္တကဿပဂေါတ္တာဒိဥတ္တမဂေါတ္တံ နိဿာယ ဂေါတ္တမဒေါ. နိရာဗာဓတံ၊ ယောဗ္ဗညံ၊ ‘‘စိရံ သုခံ ဇီဝိံ ဇီဝါမိ ဇီဝိဿာမီ’’တိ ဧဝံ ဇီဝိတံ၊ ဗဟုလာဘဉ္စ နိဿာယ ယထာက္ကမံ အာရောဂျမဒါဒယော ဝုတ္တာ. သုကတပဏီတပစ္စယလာဘံ၊ မာနနဝန္ဒနာဒိဂရုကာရံ မညေဝ ပမုခံ ကတွာ ပဉှံ ပုစ္ဆန္တိ၊ ပရိဝါရေတွာ ဂစ္ဆန္တီတိ ဧဝံ ပုရေက္ခာရံ၊ မဟာပရိဝါရံ၊ သုစိပရိဝါရဉ္စ နိဿာယ ယထာက္ကမံ သက္ကာရမဒါဒယော စ ဝေဒိတဗ္ဗာ. ဘောဂေါ ပန ကိဉ္စာပိ လာဘဂ္ဂဟဏေနေဝ ဂဟိတော၊ နိဟိတဓနဝသေန ပနေတ္ထ လာဘော ဝေဒိတဗ္ဗော၊ ‘‘အန္နပါနဝတ္ထာဘရဏမာလာဂန္ဓာဒိဥပဘောဂသမိဒ္ဓိဝသေနာပိ ဝတ္တုံ ဝဋ္ဋတီ’’တိပိ ဝဒန္တိ. သရီရဝဏ္ဏံ၊ ဂုဏဝဏ္ဏဉ္စ နိဿာယ ဝဏ္ဏမဒေါ. ဗာဟုသစ္စံ၊ ပဋိဘာနံ၊ ‘‘ဝဏ္ဏံ ဗုဒ္ဓဝံသံ ရာဇဝံသံ ဇနပဒဝံသံ ဂါမဝံသံ ရတ္တိန္ဒိဝပရိစ္ဆေဒံ နက္ခတ္တမုဟုတ္တယောဂံ ဇာနာမီ’’တိ ဧဝံ ရတ္တညုတံ ဝါ နိဿာယ ယထာက္ကမံ သုတမဒါဒယော စ ဝေဒိတဗ္ဗာ. ဇာတိပိဏ္ဍပါတိကတံ၊ အနဝညာတတံ၊ ဣရိယာပထပါသာဒိကတံ၊ မဟိဒ္ဓိကတဉ္စ နိဿာယ ယထာက္ကမံ ပိဏ္ဍပါတိကမဒါဒယော. ကိဉ္စာပိ ပရိဝါရ-ဂ္ဂဟဏေန ယသော ဂဟိတော. ပရိဝါရဿ ပန သဝသဝတ္တကဘာဝေန ပတ္ထဋတံ ကိတ္တိယသညေဝ ဝါ နိဿာယ ယသမဒေါ. ပရိသုဒ္ဓသီလံ၊ ဥပစာရပ္ပနာဈာနံ၊ သိပ္ပကောသလ္လံ၊ သရီရဿ အာရောဟသမ္ပဒံ၊ ပရိဏာဟသမ္ပဒံ၊ အနူနနိဒ္ဒေါသအင်္ဂပစ္စင်္ဂတာယ သရီရပါရိပူရိဉ္စ နိဿာယ သီလမဒါဒယော ဝေဒိတဗ္ဗာ.

ဣမိနာ ဧတ္တကေန ဌာနေန သဝတ္ထုကံ မာနံ ဒဿေတွာ ဣဒါနိ အဝတ္ထုကမေဝ သာမညတော မာနံ ဒဿေန္တော ‘‘မဒေါ’’တိ အာဟ. ပမာဒေါတိအာဒီသု ပဉ္စကာမဂုဏေသု စိတ္တဝေါဿဂ္ဂသင်္ခါတော သုစရိတာသေဝနာယ၊ ဒုစ္စရိတသေဝနာယ စ ဟေတုဘူတော ပမဇ္ဇနာကာရပ္ပဝတ္တော အကုသလစိတ္တုပ္ပါဒေါ ပမာဒေါ နာမ၊ သွာယံ သတိဝေါဿဂ္ဂလက္ခဏော. ဝါတဘရိတဘတ္တာ ဝိယ မာတာပိတူသုပိ အနောဏတဘာဝသင်္ခါတော ကက္ခဠမာနော ထမ္ဘော နာမ၊ သွာယံ စိတ္တဿ ဥဒ္ဓုမာတဘာဝလက္ခဏော. အညေသံ ဂေဟာဒိဥပကရဏသမ္ပဒံ၊ ဝိဇ္ဇာသမ္ပဒံ ဝါ ဒိသွာ တဒ္ဒိဂုဏသမာရမ္ဘနဝသပ္ပဝတ္တော အကုသလစိတ္တုပ္ပါဒေါ သာရမ္ဘော နာမ. ဂန္ထောပိ ဟိ သာရမ္ဘဝသေန ဥဂ္ဂဟေတုံ န ဝဋ္ဋတိ၊ အကုသလမေဝ ဟောတိ. သွာယံ ကရဏုတ္တရိယလက္ခဏော.

အတြ အတြ ဝိသယေ ဣစ္ဆာ အဿာတိ အတြိစ္ဆော၊ ပုဂ္ဂလော၊ တဿ ဘာဝေါ အတြိစ္ဆတာ. ဧဝံ မဟိစ္ဆတာဒီသုပိ အတ္ထော ဝေဒိတဗ္ဗော. တတ္ထ ယံ ယံ လဒ္ဓံ၊ တေန တေန အသန္တုဿိတွာ အပရဿ အပရဿ ပတ္ထနာဝသေန ပဝတ္တော လောဘော အတြိစ္ဆတာ. ယာယ အတ္တနာ လဒ္ဓံ ပဏီတမ္ပိ လာမကံ ဝိယ ခါယတိ၊ ပရေန လဒ္ဓံ လာမကမ္ပိ ပဏီတံ ဝိယ ခါယတိ. သာယံ အပရာပရလာဘပတ္ထနာလက္ခဏာ. သန္တဂုဏဝိဘာဝနာဝသပ္ပဝတ္တော စေဝ တဒုပ္ပန္နေဟိ အတိမဟန္တေဟိပိ ဝတ္ထူဟိ အသန္တုဿနာကာရပ္ပဝတ္တော စ လောဘော မဟိစ္ဆတာ. ယာယ သမန္နာဂတော ပုဂ္ဂလော ပစ္စယေဟိ ဒုပ္ပူရော အဂ္ဂိ ဝိယ ဥပါဒါနေန၊ သမုဒ္ဒေါ ဝိယ စ ဥဒကေန. ယာ စာယံ သန္တဂုဏသမ္ဘာဝနတာ၊ ပဋိဂ္ဂဟဏေ စ ပရိဘောဂေ စ အမတ္တညုတာ၊ ဧတံ မဟိစ္ဆတာလက္ခဏံ.

အသန္တာနံ ပန သဒ္ဓါသီလာနံ၊ မဂ္ဂဖလာဒီနဉ္စ လောကိယလောကုတ္တရာနံ ဂုဏာနံ ဝိဘာဝနာဝသပ္ပဝတ္တော စေဝ တဒုပ္ပန္နေဟိ အတိမဟန္တေဟိပိ ပစ္စယေဟိ အသန္တုဿနာကာရပ္ပဝတ္တော စ လောဘော ပါပိစ္ဆတာ. ယာ စာယံ အသန္တဂုဏသမ္ဘာဝနတာ၊ ပဋိဂ္ဂဟဏေ စ ပရိဘောဂေ စ အမတ္တညုတာ ဧတံ ပါပိစ္ဆတာလက္ခဏံ.

သိင်္ဂန္တိ ဝိဇ္ဈနဋ္ဌေန သိင်္ဂံ၊ နာဂရိကဘာဝသင်္ခါတဿ ကိလေသသိင်္ဂဿေတံ အဓိဝစနံ၊ တံ အတ္ထတော သိင်္ဂါရကရဏဝသပ္ပဝတ္တော လောဘောဝ. တိန္တိဏန္တိ ခီယနံ၊ တံ အတ္ထတော နိဝါသဋ္ဌာနေ သုနခါနံ ဝိယ အညမညံ သတ္တာနံ ‘‘တဝ သန္တကံ၊ မမ သန္တက’’န္တိ ခိယျနာကာရပ္ပဝတ္တော ဒေါသောဝ. စာပလျန္တိ စပလတာ၊ တံ ပတ္တစီဝရာဒိပရိက္ခာရာနံ၊ အတ္တဘာဝဿ စ မဏ္ဍနဝိဘူသနကေဠာယနဝသပ္ပဝတ္တော ရာဂေါဝ၊ ယေန သမန္နာဂတော ဇိဏ္ဏောပိ ဒဟရော ဝိယ ဟောတိ. အသဘာဂဝုတ္တီတိ ဝိသဘာဂဝုတ္တိ ဝိသဘာဂကိရိယာ၊ သာ ဂရုဋ္ဌာနိယေသုပိ အနာဒရဝသေန ဝိပစ္စနီကဂ္ဂါဟိတာဝသပ္ပဝတ္တော ဒေါသောဝ၊ ယာယ သမန္နာဂတော ဂိလာနေပိ မာတာပိတုအာစရိယုပဇ္ဈာယာဒိကေ န ဩလောကေတိ၊ တေဟိ သဒ္ဓိံ လာဘသက္ကာရကာရဏာ ကလဟံ ကရောတိ၊ တေသု ဟိရောတ္တပ္ပံ၊ စေတိယာဒီသု စိတ္တီကာရဉ္စ န ပစ္စုပဋ္ဌပေတိ. အရတီတိ ပန္တေသု သေနာသနေသု၊ သမထဝိပဿနာသု စ အနဘိရမဏာ ဥက္ကဏ္ဌိတတာ၊ သာ တထာပဝတ္တော အကုသလစိတ္တုပ္ပါဒေါ. တန္ဒီတိ အာလသျံ. ဝိဇမ္ဘိတာတိ ကာယဿ အာနမနာဒိအာကာရေန ဖန္ဒနာ ဝိဇမ္ဘနာ. ဘတ္တသမ္မဒေါတိ ဘတ္တမုစ္ဆာယ ကာယဿ အကမ္မညတာ. စေတသော စ လီနတ္တန္တိ စိတ္တသင်္ကောစော. အတ္ထတော ပနေတာနိ သဗ္ဗာနိပိ ထိနမိဒ္ဓဝသေန စိတ္တဿ ဂိလာနာကာရောဝ.

ကုဟနာတိအာဒီသု လာဘသက္ကာရသိလောကသန္နိဿိတဿ ပါပိစ္ဆဿ တေန တေန ဥပါယေန ဝိမှာပနာ ကုဟနာ နာမ. သာ တိဝိဓာ ပစ္စယပဋိသေဝနသာမန္တဇပ္ပနဣရိယာပထသဏ္ဌာပနဝသေန. တတ္ထ စီဝရာဒီဟိ နိမန္တိတဿ တဒတ္ထိကဿေဝ သတော ပါပိစ္ဆတံ နိဿာယ ပဋိက္ခိပနေန၊ တေ စ ဂဟပတိကေ အတ္တနိ သုပ္ပတိဋ္ဌိတသဒ္ဓေ ဉတွာ ပုန တေသံ ‘‘အဟော အယျော အပ္ပိစ္ဆော န ကိဉ္စိ ပဋိဂ္ဂဏှိတုံ ဣစ္ဆတိ၊ သုလဒ္ဓံ ဝတ နော အဿ၊ သစေ အပ္ပမတ္တကံ ကိဉ္စိ ပဋိဂ္ဂဏှေယျာ’’တိ နာနာဝိဓေဟိ ဥပါယေဟိ ပဏီတာနိ စီဝရာဒီနိ ဥပနာမေန္တာနံ တဒနုဂ္ဂဟကာမတညေဝ အာဝိကတွာ ပဋိဂ္ဂဟဏေန စ တတော ပဘုတိ အပိ သကဋဘာရေဟိ ဥပနာမနဟေတုဘူတံ ဝိမှာပနံ ပစ္စယပဋိသေဝနသင်္ခါတာ ကုဟနာ နာမ. ပါပိစ္ဆဿေဝ ပန သတော ‘‘ယော ဧဝရူပံ စီဝရံ ဓာရေတိ၊ သော သမဏော မဟေသက္ခော’’တိအာဒိနာ ဥတ္တရိမနုဿဓမ္မာဓိဂမပရိဒီပနဝါစာယ တထာ တထာ ဝိမှာပနံ သာမန္တဇပ္ပနသင်္ခါတာ ကုဟနာ နာမ. ပါပိစ္ဆဿေဝ ပန သတော သမာဟိတဿေဝ သမ္ဘာဝနာဓိပ္ပါယကတေန ပဏိဓာယ သဏ္ဌပိတေန ဂမနာဒိဣရိယာပထေန ဝိမှာပနံ ဣရိယာပထသဏ္ဌပနသင်္ခါတာ ကုဟနာ နာမ.

အာလပနာတိအာဒိနာ ပန ဝုတ္တပစ္စယပဋိသံယုတ္တာ ဝါစာယေဝ ဒဿိတာ. အနုပ္ပိယဘာဏိတာ၊ စာဋုကမျတာ၊ မုဂ္ဂသူပျတာ၊ ပါရိဘဋယတာ စ အာလပနာ နာမ. တတ္ထ အာလပနာတိအာဒိတောဝ လပနာ. အနုပ္ပိယဘာဏိတာတိ သစ္စာနုရူပံ၊ ဓမ္မာနုရူပံ ဝါ အနပလောကေတွာ ပုနပ္ပုနံ ပိယဘဏနံ. စာဋုကမျတာတိ နီစဝုတ္တိတာ၊ အတ္တာနံ ဟေဋ္ဌတော ဌပေတွာ ပဝတ္တနံ. မုဂ္ဂသူပျတာတိ မုဂ္ဂသူပသဒိသတာ၊ အပက္ကမုဂ္ဂသဒိသေန အပ္ပသစ္စေန သမန္နာဂတဝစနတာ. ပါရိဘဋယတာတိ ကုလဒါရကာနံ အင်္ကေန ပရိဟရဏာဒိကံ ပရိဘဋဿ ကိစ္စံ. ဧဝမယံ သဗ္ဗောပိ ကိရိယာဘေဒေါ ‘‘လပနာ’’တွေဝ ဝုစ္စတိ. ပရေသံ ပန ပစ္စယဒါနသညာဇနကံ ကာယဝစီကမ္မံ နေမိတ္တိကတာ နာမ၊ ယာ ‘‘ပရိကထောဘာသနိမိတ္တကမ္မ’’န္တိ ဝုစ္စတိ. အက္ကောသနဝမ္ဘနဂရဟဏာဒီဟိ ယထာ ဒါယကော အဝဏ္ဏံ ဘာယတိ၊ ဧဝံ တံ နိပ္ပီဠနံ နိပ္ပေသိကတာ နာမ. အယံ ဟိ ယသ္မာ ဝေဠုပေသိကာယ ဝိယ အဗ္ဘင်္ဂံ ဣမာယ ပရဿ ဂုဏံ နိပ္ပေသေတိ နိပုဉ္ဆတိ၊ ယသ္မာ ဝါ ဂန္ဓဇာတံ ပိသိတွာ ဂန္ဓမဂ္ဂနာ ဝိယ ပရဂုဏေ နိပ္ပိသိတွာ ဝိစုဏ္ဏေတွာ ဧသာ လာဘမဂ္ဂနာ ဟောတိ၊ တသ္မာ ‘‘နိပ္ပေသိကတာ’’တိ ဝုစ္စတိ. ဧကသ္မိံ ပန ကုလေ လဒ္ဓါမိသံ အညတ္ထ ဒါနဝသေန လာဘေန လာဘဿ ပတ္ထနာ လာဘေန လာဘံ နိဇိဂီသနာ နာမ. ဣမေ စ ကုဟနာဒယော ပဉ္စပိ တထာ တထာ ပဝတ္တာ လောဘာဒိအကုသလစိတ္တုပ္ပါဒါတိ ဝေဒိတဗ္ဗာ. ‘‘သေယျောဟမသ္မီ’’တိအာဒယော ဒွါဒသ မာနာ ဟေဋ္ဌာ သံယောဇနဂေါစ္ဆကေ ဝုတ္တာနုသာရေန သုဝိညေယျာဝ. တတ္ထ စ အာဒိတော တယော မာနာ ပုဂ္ဂလံ အနိဿာယ ဇာတိဂေါတ္တရူပဘောဂသိပ္ပသုတာဒိမာနဝတ္ထုဝသေနေဝ ကထိတာ၊ တတော ပရံ ပန နဝ မာနာ သေယျသဒိသဟီနပုဂ္ဂလေ နိဿာယ ကထိတာ.

ဧဝမေတေဟိ ဒွါဒသဟိ ပဒေဟိ သဝတ္ထုကေ မာနေ ကထေတွာ ဣဒါနိ အဝတ္ထုကံ ဒဿေတုံ ‘‘မာနော’’တိအာဒိ ဝုတ္တံ. တတော ပရံ အတိမာနောတိအာဒီသု ‘‘ဇာတိအာဒီဟိ မယာ သဒိသော နတ္ထီ’’တိ အတိက္ကမိတွာ မညနာဝသေန ပဝတ္တော မာနော အတိမာနော နာမ. ‘‘ဣမေ မယာ ပုဗ္ဗေ သဒိသာ၊ ဣဒါနိ အဟံ သေဋ္ဌော၊ ဣမေ ဟီနတရာ’’တိ ဥပ္ပန္နော မာနော ဘာရာတိဘာရော ဝိယ မာနာတိမာနော နာမ. အတ္တာနံ ပန အဝမညနာဝသေန ပဝတ္တော မာနော ဩမာနော နာမ၊ သော ‘‘ဟီနောဟမသ္မီ’’တိ ပဝတ္တဟီနမာနသဒိသောဝ. အနဓိဂတေသု အရိယဓမ္မေသု ‘‘အဓိဂတာ မယာ’’တိ ဥပ္ပန္နော မာနော အဓိကမာနတ္တာ အဓိမာနော နာမ၊ အယံ ပန သောတာပန္နာဒိအရိယသာဝကာနံ ‘‘အဟံ သကဒါဂါမီ’’တိအာဒိနာ န ဥပ္ပဇ္ဇတိ တေသံ မဂ္ဂဖလနိဗ္ဗာနပဟီနကိလေသာဝသိဋ္ဌကိလေသပစ္စဝေက္ခဏေန အရိယဂုဏပဋိဝေဓေ နိက္ကင်္ခတ္တာ. ဒုဿီလဿ ပန န ဥပ္ပဇ္ဇတေဝ၊ သီလဝတောပိ ပရိစ္စတ္တကမ္မဋ္ဌာနဿ န ဥပ္ပဇ္ဇတိ၊ ပရိသုဒ္ဓသီလဿေဝ ပန သုဒ္ဓသမထလာဘိနော၊ သုဒ္ဓဝိပဿနာလာဘိနော၊ တဒုဘယလာဘိနော ဝါ ဥပ္ပဇ္ဇတိ. တေသု တဒုဘယလာဘီ အရဟတ္တေ ဧဝ အဓိမညိတွာ ပတိဋ္ဌာတိ သုဝိက္ခမ္ဘိတကိလေသတ္တာ၊ ပရိမဒ္ဒိတသင်္ခါရတ္တာ စ၊ ဣတရေ သောတာပန္နာဒီသုပီတိ ဝေဒိတဗ္ဗာ. ပဉ္စသု ပန ခန္ဓေသု ‘‘အဟမသ္မီ’’တိအာဒိနာ ပဝတ္တော မာနော အသ္မိမာနော နာမ. ပါပကေန ပန ပရူပဃာတကေန ကမ္မာယတနသိပ္ပါယတနဝိဇ္ဇာဋ္ဌာနာဒိနာ အတ္တာနံ သေယျာဒိတော ဇပ္ပနဝသေန ပဝတ္တော မာနော မိစ္ဆာမာနော နာမ.

ဉာတိဝိတက္ကောတိအာဒီသု ‘‘မယှံ ဉာတကာ သုခဇီဝိနော သမ္ပတ္တိယုတ္တာ’’တိ ဧဝံ ဂေဟသိတပေမေန ဉာတကေ ဥဒ္ဒိဿ ဥပ္ပန္နော ဝိတက္ကော ဉာတိဝိတက္ကော နာမ၊ ‘‘ဉာတကာ ခယံ ဂတာ ဝယံ ဂတာ သဒ္ဓါ ပသန္နာ’’တိအာဒိနာ ပန နေက္ခမ္မသိတော ဉာတိဝိတက္ကော နာမ န ဟောတိ. ဧဝံ ဇနပဒဝိတက္ကေပိ၊ တဿ ပန ‘‘အမှာကံ ဇနပဒေါ သုဘိက္ခော သုန္ဒရော’’တိအာဒိနာ ပဝတ္တိအာကာရော ဝေဒိတဗ္ဗော. အမရတ္ထာယ ဝိတက္ကော၊ အမရော ဝါ ဝိတက္ကောတိ အမရဝိတက္ကော. တတ္ထ ယော ဥက္ကုဋိကပ္ပဓာနာဒီဟိ ဒုက္ခေ နိဇ္ဇိဏ္ဏေ သမ္ပရာယေ အတ္တာ သုခီ အမရော ဟောတီတိ ဧဝံ ပဝတ္တော၊ သော အမရတ္ထာယ ဝိတက္ကော နာမ. ယော ပန ဒိဋ္ဌိဂတိကဿ ဧကသ္မိံ ပက္ခေ အသဏ္ဌဟိတွာ ‘‘ဧဝမ္ပိ မေ နော၊ တထာပိ မေ နော၊ အညထာပိ မေ နော’’တိအာဒိနာ အမရမစ္ဆော ဝိယ ဂဟေတုံ အသက္ကုဏေယျတာယ ပဝတ္တော၊ သော အမရော ဝိတက္ကော နာမ. တံ ဒုဝိဓမ္ပိ ဧကတော ကတွာ ဣဓ ‘‘အမရဝိတက္ကော’’တိ ဝုတ္တော.

အနုဒ္ဒယတာ ပတိရူပကေန ပန ဂိဟီဟိ သဟသောကိသဟနန္ဒိတာဒိဝသေန ဂေဟသိတပေမေန ယုတ္တော ပရာနုဒ္ဒယတာပဋိသံယုတ္တော ဝိတက္ကော နာမ. လာဘေန စေဝ သက္ကာရေန စ ကိတ္တိသဒ္ဒေန စ သဒ္ဓိံ အာရမ္မဏကရဏဝသေန ယုတ္တော ဂေဟသိတော ဝိတက္ကော လာဘသက္ကာရသိလောကပဋိသံယုတ္တော ဝိတက္ကော နာမ၊ တဿ ပန ‘‘အဟော ဝတ မေ လာဘာဒယော ဥပ္ပဇ္ဇေယျု’’န္တိအာဒိနာ ပဝတ္တိအာကာရော ဝေဒိတဗ္ဗော. ‘‘အဟော ဝတ မံ ပရေ န အဝဇာနေယျု’’န္တိ ဥပ္ပန္နော ဂေဟသိတော ဝိတက္ကော အနဝညတ္တိပဋိသံယုတ္တော ဝိတက္ကော နာမ. ဧကကံ.

ဒုကာဒီသု ကောဓာဒယော ဟေဋ္ဌာ ဝုတ္တတ္ထေ ဝဇ္ဇေတွာ အဝသေသာနညေဝ ဝဏ္ဏနာ ဟောတိ. တတ္ထ ဒုကေသု တာဝ ဥပနာဟောတိအာဒီသု ပုဗ္ဗဘာဂေ ကောဓော ‘‘အက္ကောစ္ဆိမ’’န္တိအာဒိနာ အာသေဝနေန အပရကာလေ ဝေရစိတ္တေ ဒဠှတရံ အာဗဒ္ဓေါ ဥပနာဟော နာမ၊ ယေန သမန္နာဂတော ဝေရံ နိဿဇ္ဇိတုံ န သက္ကောတိ ဝသာတေလမက္ခိတပိလောတိကာ ဝိယ၊ သောဓိယမာနမ္ပိဿ စိတ္တံ န ပရိသုဇ္ဈတိ၊ သွာယံ ဝေရုပနိဗန္ဓနလက္ခဏော.

ပရဂုဏံ ပန ဝိနာသေတွာ တတ္ထ ဒေါသမက္ခနဝသေန ပဝတ္တော ကောဓော မက္ခော နာမ. အယံ ဟိ ပဌမတရံ အတ္တနော စိတ္တံ ဂူထော ဝိယ ဂူထဂ္ဂါဟကံ ဟတ္ထံ မက္ခေတိ၊ ပစ္ဆာ ပရန္တိ ‘‘မက္ခော’’တိ ဝုတ္တော၊ သွာယံ ပရဂုဏမက္ခနလက္ခဏော. ပဠာသေတီတိ ပဠာသော၊ ပရဿ ဂုဏေ ဒဿေတွာ အတ္တနော ဂုဏေဟိ သမေ ကရောတီတိ အတ္ထော. တထာပဝတ္တော လောဘော၊ သွာယံ ယုဂဂ္ဂါဟလက္ခဏော.

ဒွါရတ္တယေပိ ဝိဇ္ဇမာနဿေဝ ဒေါသဿ ပဋိစ္ဆာဒနတော စက္ခုမောဟနမာယာ ဝိယာတိ မာယာ၊ သာ ကတဒေါသပဋိစ္ဆာဒနလက္ခဏာ. သဌဿ ဘာဝေါ၊ ကမ္မံ ဝါ သာဌေယျံ၊ ကေရာဋိယံ၊ တံ အဝိဇ္ဇမာနဂုဏပ္ပကာသနလက္ခဏံ.

အနဇ္ဇဝါဒယော ဟေဋ္ဌာ ဝုတ္တအဇ္ဇဝါဒိပဋိပက္ခအကုသလဝသေန ဝေဒိတဗ္ဗာ. အဇ္ဈတ္တသံယောဇနန္တိအာဒီသု အဇ္ဈတ္တန္တိ ကာမဘဝေါ၊ တတ္ထ သတ္တေ ဗန္ဓနဝသေန ပဝတ္တာနိ ပဉ္စောရမ္ဘာဂိယသံယောဇနာနိ အဇ္ဈတ္တသံယောဇနံ နာမ. ဗဟိဒ္ဓါတိ ရူပါရူပဘဝေါ. တတ္ထ ဗန္ဓနဝသေန ပဝတ္တာနိ ပဉ္စ ဥဒ္ဓမ္ဘာဂိယသံယောဇနာနိ ဗဟိဒ္ဓါသံယောဇနံ နာမ. ကာမဘဝေ ဟိ သတ္တာနံ အာလယော ဗဟုကော၊ န ဣတရေသု၊ တသ္မာ သော အဇ္ဈတ္တံ ဣတရေ စ ဗဟိဒ္ဓါတိ ဝေဒိတဗ္ဗာ. ဒုကံ.

တိကေသု ပန လောဘာဒီနိ တီဏိ အကုသလမူလာနိ နာမ. ကာမဗျာပါဒဝိဟိံသာသမ္ပယုတ္တာ ဝိတက္ကာ တယော အကုသလဝိတက္ကာ နာမ. တေ ဧဝ သညာသီသေန တိဿော အကုသလသညာ. သဘာဝဋ္ဌေန တိဿော အကုသလဓာတုယောတိ စ ဝုစ္စန္တိ. ကာယဝစီမနောဒုစ္စရိတာနိ တီဏိ ဒုစ္စရိတာနိ နာမ၊ တာနိ ဒွါရတ္တယပ္ပဝတ္တာနံ ပါဏာတိပါတာဒီနံ၊ သဗ္ဗာကုသလာနံ ဝါ ဝသေန ယောဇေတဗ္ဗာနိ. သုတ္တန္တပရိယာယေန ပန ဒိဋ္ဌာသဝဝဇ္ဇိတာ ကာမာသဝါဒယော တယော အာသဝါ နာမ. သက္ကာယဒိဋ္ဌိဝိစိကိစ္ဆာသီလဗ္ဗတပရာမာသာ တီဏိ သံယောဇနာနိ နာမ.

ကာမတဏှာ ဘဝတဏှာ ဝိဘဝတဏှာ စ တိဿော တဏှာ နာမ. တတ္ထ သဿတဒိဋ္ဌိသဟဂတော ရာဂေါ ဘဝတဏှာ၊ ဥစ္ဆေဒဒိဋ္ဌိသဟဂတော ရာဂေါ ဝိဘဝတဏှာ၊ အဝသေသာ ပန သဗ္ဗာပိ တဏှာ ကာမတဏှာ. ကာမဓာတုပဋိသံယုတ္တော ဝါ ရာဂေါ ကာမတဏှာ၊ ရူပါရူပဓာတုပဋိသံယုတ္တော ဘဝတဏှာ၊ ဥစ္ဆေဒဒိဋ္ဌိသဟဂတော ဝိဘဝတဏှာတိ ဝေဒိတဗ္ဗာ. ကာမတဏှာ ရူပတဏှာ အရူပတဏှာ စ အပရာပိ တိဿော တဏှာ နာမ. ရူပတဏှာ အရူပတဏှာ နိရောဓတဏှာ စ ပုန အပရာပိ တိဿော တဏှာ နာမ. တတ္ထ နိရောဓတဏှာတိ ဥစ္ဆေဒဒိဋ္ဌိသဟဂတော. ကာမေသနာ ဘဝေသနာ ဗြဟ္မစရိယေသနာ စ တိဿော ဧသနာ နာမ. တတ္ထ ဗြဟ္မစရိယေသနာတိ သဿတုစ္ဆေဒဒိဋ္ဌိသင်္ခါတဗြဟ္မစရိယဿ ဂဝေသနာ. ‘‘သေယျောဟမသ္မီတိ ဝိဓာ၊ သဒိသောဟမသ္မီတိ ဝိဓာ၊ ဟီနောဟမသ္မီတိ ဝိဓာ’’တိ ဧဝံ ဝုတ္တမာနဝိဓာ တိဿော ဝိဓာ နာမ. မာနော ဟိ သေယျာဒိဝသေန ဝိဒဟနတော မညနတော ‘‘ဝိဓာ’’တိ ဝုစ္စတိ. ဇာတိဇရာမရဏာနိ ပဋိစ္စ ဥပ္ပန္နာနိ ဘယာနိ တီဏိ ဘယာနိ နာမ. ‘‘အတီတံ ဝါ အဒ္ဓါနံ အာရဗ္ဘာ’’တိအာဒိနာ ဝုတ္တာနိ တီဏိ၊ ဗုဒ္ဓါဒီသု ကင်္ခနဝိစိကိစ္ဆနဝသေန ပဝတ္တာ တိဿော အဝိဇ္ဇာ တီဏိ တမာနိ နာမ. ဝိစိကိစ္ဆာသီသေန တဿ ဝိဘင်္ဂေ တံသမ္ပယုတ္တာ အဝိဇ္ဇာဝ ဝုတ္တာ၊ တဿာ ဧဝ ပဋိစ္ဆာဒကတ္တေနပိ တမဘာဝတောတိ ဒဋ္ဌဗ္ဗံ.

ယံ ကိဉ္စိ ပန သတ္တဿ သုခါဒိကံ ဥပ္ပဇ္ဇတိ၊ တံ သဗ္ဗံ ပုဗ္ဗေကတဟေတူတိ ဧကံ တိတ္ထာယတနံ၊ ဣဿရနိမ္မာနဟေတူတိ ဒုတိယံ၊ အဟေတုအပ္ပစ္စယာတိ တတိယန္တိ ဣမာနိ တီဏိ တိတ္ထာယတနာနိ နာမ. တတ္ထ ပဌမဝါဒီ ကုသလာကုသလကိရိယဥတုစိတ္တာဟာရာဒိကံ၊ ဂတိဥပဓိအာဒိကံ၊ သပ္ပုရိသူပနိဿယသဒ္ဓမ္မဿဝနာဒိကဉ္စ သဗ္ဗံ ပစ္စယပစ္စယုပ္ပန္နံ ပဋိက္ခိပိတွာ ဧကံ ကမ္မဝိပါကမေဝ သမ္ပဋိစ္ဆတိ၊ ဣတရေ ပန ဒွေပိ သဗ္ဗံ ဟေတုံ ပဋိက္ခိပိတွာ ဣဿရဟေတုကံ၊ အဟေတုကဉ္စ သမ္ပဋိစ္ဆန္တိ၊ တေသံ တိဏ္ဏံ ဝါဒါနံ ဝသေနေဝ ပယောဇနာဘာဝါဒိတော ယထာနုရူပံ ဒေါသော ဉာတဗ္ဗော. ဂန္ထဝိတ္ထာရဘယေန ပနေတ္ထ န ဝိတ္ထာရယိမှ.

ရာဂဒေါသမောဟာ ပန တယော ပလိဗောဓဋ္ဌေန ကိဉ္စနာ နာမ. တေ ဧဝ ဟိ ကိလေသဋ္ဌေန အင်္ဂဏာနိ၊ မလီနဘာဝကရဏဋ္ဌေန မလာနိ၊ ပက္ခလနပါတဟေတုတော ဝိသမာနိ စ ဟောန္တိ. ပါဏာတိပါတာဒီနိ ကာယဝစီမနောဝိသမာနိ အပရာနိပိ တီဏိ ဝိသမာနိ နာမ. ရာဂဒေါသမောဟာ အနုဒဟနဋ္ဌေန တယော အဂ္ဂီ၊ ကသဋနိရောဇဋ္ဌေန ကသာဝါ စ ဟောန္တိ. ပါဏာတိပါတာဒီနိ ကာယကသာဝါဒယော ပန အပရေပိ တယော ကသာဝါ နာမ. အဿာဒဒိဋ္ဌိတ္တိကေ ကာမပရိဘောဂေ ‘‘နတ္ထိ ကာမေသု ဒေါသော’’တိ ဧဝံ ပဝတ္တာ သဿတဒိဋ္ဌိ အဿာဒဒိဋ္ဌိ နာမ. ဝီသတိဝတ္ထုကာ ပန အတ္တဒိဋ္ဌိ အတ္တာနံ အနုဂတတ္တာ အတ္တာနုဒိဋ္ဌိ နာမ. တဿာ ပန ‘‘ရူပံ အတ္တတော သမနုပဿတိ၊ ရူပဝန္တံ ဝါ အတ္တာနံ၊ အတ္တနိ ဝါ ရူပံ၊ ရူပသ္မိံ ဝါ အတ္တာနံ သမနုပဿတီ’’တိ ဧဝံ ရူပက္ခန္ဓေ စတဿော ဒိဋ္ဌိယော. ဧဝံ သေသက္ခန္ဓေသုပီတိ ဝီသတိဝတ္ထုကတာ ဝေဒိတဗ္ဗာ.

တတ္ထ စ ရူပံ အတ္တတောဒိအာဒိနာ ပဉ္စက္ခန္ဓေ အတ္တတော ဂဟဏဝသေန ပဝတ္တာ ပဉ္စ ဥစ္ဆေဒဒိဋ္ဌိယော၊ သေသာ ပန သဿတဒိဋ္ဌိယောတိ ဝေဒိတဗ္ဗာ. ‘‘နတ္ထိ ဒိန္န’’န္တိအာဒိနယပ္ပဝတ္တာ ပန နတ္ထိကဒိဋ္ဌိ မိစ္ဆာဒိဋ္ဌိ နာမ၊ လာမကဒိဋ္ဌီတိ အတ္ထော. အရတိတ္တိကေ ပါဏိလေဍ္ဍုဒဏ္ဍာဒီဟိ သတ္တာနံ ဝိဟိံသနာ ဝိဟေသာ နာမ. ဒွါရတ္တယပ္ပဝတ္တအကုသလဓမ္မဿ စရိယာ အဓမ္မစရိယာ နာမ. ဒေါဝစဿတာတိကေ သာဝ ကာမဗျာပါဒဝိဟိံသာသညာ နာနာရမ္မဏေသု ပဝတ္တိတော၊ နာနာဘူတတ္တာ စ နာနတ္တသညာ နာမ. ဥဒ္ဓစ္စတ္တိကေ ကုသီတဿ ဘာဝေါ ကောသဇ္ဇံ၊ ပမာဒေါဝ. အနာဒရိယတ္တိကေ ဩဝါဒဿ အနာဒိယနဝသပ္ပဝတ္တော ကောဓော အနာဒရိယံ နာမ. အဿဒ္ဓိယတ္တိကေ ရတနတ္တယကမ္မဖလာနံ အသဒ္ဒဟနဝသပ္ပဝတ္တာ အကုသလဓမ္မာ အဿဒ္ဓိယံ နာမ. ပဉ္စဝိဓမစ္ဆရိယဝသေန ‘‘ဒေဟီ’’တိ ဝစနဿ အဇာနနာ အဝဒညုတာ နာမ.

ဥဒ္ဓစ္စတ္တိကေ မနစ္ဆဋ္ဌေသု ဣန္ဒြိယေသု အဂုတ္တဒွါရတာ အသံဝရော နာမ. ကာယိကဝါစသိကဝီတိက္ကမော ဒုဿီလျံ နာမ. အရိယတ္တိကေ ဗုဒ္ဓပစ္စေကဗုဒ္ဓသာဝကာနံ ဒဿနောပါသနာဒီသု အနိစ္ဆာ အရိယာနံ အဒဿနကမျတာ နာမ. ဗောဓိပက္ခိကသဒ္ဓမ္မဿ သဝနဓာရဏာဒီသု အနိစ္ဆာ သဒ္ဓမ္မံ အသောတုကမျတာ နာမ. ပရဿ ဒေါသာရောပနေ ရန္ဓဂဝေသိတာသင်္ခါတော ဥပါရမ္ဘောဝ ဥပါရမ္ဘစိတ္တတာ နာမ. မုဋ္ဌဿစ္စတ္တိကေ ဥဒ္ဓစ္စံ စေတသော ဝိက္ခေပေါ နာမ. အယောနိသောမနသိကာရတ္တိကေ ‘‘အနိစ္စေ နိစ္စ’’န္တိအာဒိနာ၊ သစ္စပဋိပက္ခဝသေန ဝါ အနုပါယမနသိကာရသင်္ခါတံ အာဝဇ္ဇနစိတ္တံ အယောနိသောမနသိကာရော နာမ. မိစ္ဆာဒိဋ္ဌိမိစ္ဆာသင်္ကပ္ပါဒယော အဋ္ဌ မိစ္ဆာမဂ္ဂါ ကုမ္မဂ္ဂေါ နာမ၊ မိစ္ဆာမဂ္ဂဿ အာသေဝနာ ကုမ္မဂ္ဂသေဝနာ နာမ. ထိနမိဒ္ဓံ စေတသော စ လီနတ္တံ နာမ. တိကံ.

စတုက္ကေသု စီဝရာဒီသု စတူသု ပစ္စယေသု ‘‘ကတ္ထ မနာပံ လဘိဿာမီ’’တိ တဏှာယ ဥပ္ပါဒေါ စတ္တာရော တဏှုပ္ပါဒါ နာမ. န ဂစ္ဆန္တိ ဧတာဟိ အရိယာတိ အဂတိယော၊ ဆန္ဒဒေါသမောဟဘယာ. တာ ဟိ အဂန္တဗ္ဗမဂ္ဂဂမနာနိ အကတ္တဗ္ဗကရဏာနိ စတ္တာရိ အဂတိဂမနာနိ နာမ. တတ္ထ ဆန္ဒောတိ ပက္ခပါတရာဂေါ. ဘယန္တိ တထာပဝတ္တော ဒေါသော. အနိစ္စာဒီသု ‘‘နိစ္စံ သုခံ အတ္တာ သုဘ’’န္တိ ဧဝံ ပဝတ္တာ စတ္တာရော ဝိပရိယာသာ ဝိပရီတတော ဓမ္မေ ဧသနတော. တေသု ဝါ အာသနတော ပဝိသနတော စတ္တာရော ဝိပရိယာသာ နာမ. တေ သညာစိတ္တဒိဋ္ဌိဝိပရိယာသဝသေန ပစ္စေကံ တယော တယော ဟုတွာ ဒွါဒသ ဟောန္တိ. တေသု အနိစ္စေ နိစ္စံ၊ အနတ္တနိ အတ္တာတိ သညာစိတ္တဒိဋ္ဌိဝိပရိယာသာ ဆ၊ ဒုက္ခေ သုခံ၊ အသုဘေ သုဘန္တိ ဒိဋ္ဌိဝိပရိယာသာ ဒွေ စာတိ အဋ္ဌ သောတာပတ္တိမဂ္ဂေန ပဟီယန္တိ၊ အသုဘေ သုဘန္တိ သညာစိတ္တဝိပရိယာသာ ဒွေ အနာဂါမိမဂ္ဂေန၊ ဒုက္ခေ သုခန္တိ သညာစိတ္တဝိပရိယာသာ ဒွေ အရဟတ္တမဂ္ဂေနာတိ ဝေဒိတဗ္ဗာ.

အဒိဋ္ဌေ ဒိဋ္ဌံ၊ အသုတေ သုတံ၊ အမုတေ မုတံ၊ အဝိညာတေ ဝိညာတန္တိ ဧဝံ ပဝတ္တာ စတ္တာရော အနရိယဝေါဟာရာ နာမ. ဒိဋ္ဌာဒီသု ပန အဒိဋ္ဌံ အသုတံ အမုတံ အဝိညာတန္တိ ဧဝံ ပဝတ္တာ အပရေပိ စတ္တာရော အနရိယဝေါဟာရာ နာမ. ဣမေ စ ပုရိမေဟိ သဒ္ဓိံ အဋ္ဌ အနရိယဝေါဟာရာတိပိ ဝုစ္စန္တိ. ပါဏာတိပါတအဒိန္နာဒါနကာမေသုမိစ္ဆာစာရမုသာဝါဒါ စတ္တာရိ ဒုစ္စရိတာနိ နာမ. မုသာဝါဒါဒိဝစီဒုစ္စရိတာနိ အပရာနိပိ စတ္တာရိ ဝစီဒုစ္စရိတာနိ နာမ. ဇာတိဇရာဗျာဓိမရဏဘယာနိ စတ္တာရိ ဘယာနိ နာမ. ရာဇစောရအဂ္ဂိဥဒကဘယာနိ စတ္တာရိ၊ သမုဒ္ဒံ ဩရောဟန္တဿ ပန ဥပ္ပဇ္ဇနကာနိ ဦမိကုမ္ဘီလအာဝဋ္ဋသုသုကာဘယာနိ စ စတ္တာရိ၊ အတ္တာနုဝါဒပရာနုဝါဒဒဏ္ဍဒုဂ္ဂတိဘယာနိ စတ္တာရိ စာတိ ဣမာနိ ဝါ အပရာနိ တီဏိ စတုက္ကာနိ စတ္တာရိ ဘယာနိ နာမ. တတ္ထ သုသုကာတိ စဏ္ဍမစ္ဆာ. သဗ္ဗာနိပိ စေတာနိ ဘယာနိ ပဋိဃစိတ္တာနီတိ ဝေဒိတဗ္ဗာနိ. သဗ္ဗံ သုခဒုက္ခာဒိကံ သယံကတံ ပရံကတံ ဥဘယကတံ အဓိစ္စသမုပ္ပန္နန္တိ ဧဝံ ဥပ္ပဇ္ဇမာနာ ဣမာ စတဿော ဒိဋ္ဌိယော နာမ. စတုက္ကံ.

ပဉ္စကေသု ပဉ္စောရမ္ဘာဂိယာတိအာဒီသု ဩရံ ဝုစ္စတိ ကာမဓာတု ဟေဋ္ဌာဘာဝတော၊ တတ္ထ ဥပပတ္တိနိပ္ဖါဒနတော တံ ဩရံ ဘဇန္တီတိ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသကာမရာဂပဋိဃာ ပဉ္စ ဩရမ္ဘာဂိယသံယောဇနာနိ နာမ. ဥဒ္ဓန္တိ ရူပါရူပဓာတု ဥပရိဘာဝတော၊ တံ ဝုတ္တနယေန ဘဇန္တီတိ ရူပရာဂအရူပရာဂမာနဥဒ္ဓစ္စအဝိဇ္ဇာ ပဉ္စ ဥဒ္ဓမ္ဘာဂိယသံယောဇနာနိ နာမ. ရာဂဒေါသမောဟမာနဒိဋ္ဌိယော ပဉ္စ လဂ္ဂနဋ္ဌေန သင်္ဂါ နာမ. တေ ဧဝ ပဉ္စ အနုပဝိသနဋ္ဌေန၊ တုဒနဋ္ဌေန စ ပဉ္စ သလ္လာ နာမ. သတ္ထုဓမ္မသံဃသိက္ခာသု ကင်္ခနာနိ စတ္တာရိ၊ သဗြဟ္မစာရီသု ကုပိတစိတ္တတာ စာတိ ဣမေ ပဉ္စ စိတ္တဿ ထဒ္ဓကစဝရခါဏုကဘာဝကရဏတ္တာ စေတောခိလာ နာမ. ကာမေသု အဝီတရာဂေါ. ကာယေ။ပေ။ ရူပေ။ပေ။ ယာဝဒတ္ထံ ဘုဉ္ဇိတွာ သေယျသုခံ ပဿသုခံ မိဒ္ဓသုခံ အနုယုတ္တော ဝိဟရတိ၊ အညတရံ ဒေဝနိကာယံ ပဏိဓာယ ဗြဟ္မစရိယံ စရတီတိ ဧဝံ ပဝတ္တာ ပဉ္စ ဓမ္မာ စိတ္တံ ဗန္ဓိတွာ မုဋ္ဌိယံ ကတွာ ဝိယ ဂဟဏတော စေတသောဝိနိဗန္ဓာ နာမ. တတ္ထ ကာယေတိ အဇ္ဈတ္တိကေ ကာယေ၊ ရူပေတိ ဗဟိဒ္ဓါရူပေ. သညီ အတ္တာ၊ အသညီ အတ္တာ၊ နေဝသညီနာသညီ အတ္တာ၊ သံဝိဇ္ဇမာနော ပန အတ္တာ ဥစ္ဆိဇ္ဇတိ၊ ဒိဋ္ဌဓမ္မနိဗ္ဗာနံ ဝါ ပါပုဏာတီတိ ဧဝံ ပဝတ္တာ ပဉ္စ ဒိဋ္ဌိယော နာမ.

ပါဏာတိပါတာဒိမဇ္ဇပါနပရိယောသာနာ ပဉ္စ ဝေရကရဏဋ္ဌေန ဝေရာ နာမ. ဉာတိဘောဂရောဂသီလဒိဋ္ဌိဗျသနာနိ ပဉ္စ ဗျသနာ နာမ. တတ္ထ ဗျသနာတိ ဝိနာသသဟဇာတာ၊ တတော ဥပ္ပန္နာ အကုသလာ. ဗဟုဇနဿ အပ္ပိယတာ၊ ဝေရဗဟုလတာ၊ ဝဇ္ဇဗဟုလတာ၊ သမ္မူဠှမရဏံ၊ အပါယဂမနန္တိ ဣမေ ပဉ္စ အက္ခန္တိယာ အာဒီနဝါ၊ အနဓိဝါသနာယ ဒေါသာတိ အတ္ထော. အာဇီဝကဘယံ အသိလောကဘယံ ပရိသသာရဇ္ဇဘယံ မရဏဘယံ ဒုဂ္ဂတိဘယန္တိ ဣမာနိ ပဉ္စ ဘယာနိ နာမ. ယာဝဒတ္ထံ ပဉ္စကာမဂုဏပရိဘောဂေန စေဝ ပဌမဇ္ဈာနာဒီဟိ စတူဟိ ဈာနေဟိ စာတိ ပဉ္စဟိ ကာရဏေဟိ အတ္တာ ပရမဒိဋ္ဌဓမ္မနိဗ္ဗာနပ္ပတ္တော ဟောတီတိ ပဝတ္တာ ဝါဒါ ပဉ္စ ဒိဋ္ဌဓမ္မနိဗ္ဗာနဝါဒါ နာမ. ပဉ္စကံ.

ဆက္ကေသု ပန ကောဓော မက္ခော ဣဿာ သာဌေယျံ ပါပိစ္ဆတာ သန္ဒိဋ္ဌိပရာမာသိတာတိ ဣမာနိ ဆ ဝိဝါဒမူလာနိ. မနာပိယေသု ရူပါဒီသု ဆသု အာရမ္မဏေသု ဆန္ဒရာဂေါတိ ဣမေ ဆ ဆန္ဒရာဂါ ဂေဟသိတာ ဓမ္မာ နာမ. အမနာပိယေသု ဆသု အာရမ္မဏေသု ပဋိဃော ဆ ဝိရောဓဝတ္ထူနိ နာမ. ဝိရောဓော ဧဝ ဝတ္ထု ဝိရောဓဝတ္ထု. ဆသု အာရမ္မဏေသု တဏှာဝ ဆ တဏှာကာယာ နာမ. သတ္ထုဓမ္မသံဃသိက္ခာသု၊ အပ္ပမာဒေ၊ ပဋိသန္ထာရေ စ အဂါရဝါ ဆ အဂါရဝါ နာမ. ကမ္မာရာမတာ၊ ဘဿနိဒ္ဒါသင်္ဂဏိကသံသဂ္ဂပပဉ္စာရာမတာ စ ဆ ပရိဟာနိယာ ဓမ္မာ နာမ၊ ပရိဟာနိကရာတိ အတ္ထော. တတ္ထ သဝနဒဿနသမုလ္လပနပရိဘောဂကာယသံသဂ္ဂေသု ပဉ္စသု ယုတ္တပယုတ္တတာ သံသဂ္ဂါရာမတာ. တဏှာမာနဒိဋ္ဌိပပဉ္စေသု ယုတ္တပယုတ္တတာ ပပဉ္စာရာမတာတိ ဝေဒိတဗ္ဗံ. ကမ္မဘဿနိဒ္ဒါသင်္ဂဏိကာရာမတာ စတ္တာရော၊ ဒေါဝစဿတာ၊ ပါပမိတ္တတာ ဒွေ စာတိ ဣမေ အပရေပိ ဆ ပရိဟာနိယာ ဓမ္မာ နာမ.

သောမနဿဋ္ဌာနိယေသု ရူပါဒီသု ဆသု အာရမ္မဏေသု ဥပ္ပန္နာ ဂေဟသိတသောမနဿသမ္ပယုတ္တာ ဝိစာရာ သောမနဿုပဝိစာရာ နာမ၊ ဝိတက္ကာဒယော ဓမ္မာ၊ တံသမ္ပယုတ္တာ စာတိ ဂဟေတဗ္ဗာ. ဧသ နယော ဣတရဒွယေပိ. အညာဏသဟိတာ ပနေတ္ထ ဝေဒနုပေက္ခာ ဥပေက္ခာတိ ဝေဒိတဗ္ဗာ၊ ယာ ‘‘အညာဏုပေက္ခာ’’တိပိ ဝုစ္စတိ. ဣဋ္ဌာနိဋ္ဌမဇ္ဈတ္တေသု ဆသု အာရမ္မဏေသု ယထာက္ကမံ ဥပ္ပန္နာ ဝေဒနာ ‘‘ဆ ဂေဟသိတာနိ သောမနဿာနီ’’တိအာဒိနာ ဆက္ကတ္တယေန ဝုတ္တာ. ‘‘အတ္ထိ မေ အတ္တာ’’တိ ဝါ၊ ‘‘နတ္ထိ မေ အတ္တာ’’တိ ဝါ၊ ‘‘အတ္တနာ ဝါ အတ္တာနံ သဉ္ဇာနာမီ’’တိ ဝါ၊ ‘‘အတ္တနာ ဝါ အနတ္တာနံ သဉ္ဇာနာမီ’’တိ ဝါ၊ ‘‘အတ္တနာ ဝါ အတ္တာနံ သဉ္ဇာနာမီ’’တိ ဝါ၊ ‘‘သော မေ အယံ အတ္တာ ကာရကော ဝေဒကော နိစ္စော ဓုဝေါ’’တိ ဧဝံ ဥပ္ပဇ္ဇမာနာ ဣမာ ဆ ဒိဋ္ဌိယော နာမ. တတ္ထ အတ္ထီတိ သဿတဒိဋ္ဌိ. နတ္ထီတိ ဥစ္ဆေဒဒိဋ္ဌိ. ပဉ္စပိ ခန္ဓေ ‘‘အတ္တာ’’တိ ဂဟေတွာ သညာက္ခန္ဓေန သေသာနံ ဇာနနဝသေန အတ္တနာ ဝါ အတ္တာနံ သဉ္ဇာနာမီတိ ဒိဋ္ဌိ၊ သညာက္ခန္ဓံ ပန ‘‘အတ္တာ’’တိ၊ ဣတရေ စ ‘‘အနတ္တာ’’တိ ဂဟေတွာ အတ္တနာ ဝါ အနတ္တာနံ သဉ္ဇာနာမီတိ ဒိဋ္ဌိ၊ သညာက္ခန္ဓံ ပန ‘‘အနတ္တာ’’တိ၊ ဣတရေ စ ‘‘အတ္တာ’’တိ ဂဟေတွာ အနတ္တနာ ဝါ အတ္တာနံ သဉ္ဇာနာမီတိ ဒိဋ္ဌိ စ ဝေဒိတဗ္ဗာ. ဆက္ကံ.

သတ္တကေသု ပန ကာမရာဂပဋိဃမာနဒိဋ္ဌိဝိစိကိစ္ဆာဘဝရာဂအဝိဇ္ဇာ သတ္တ ထာမဂတဋ္ဌေန၊ အပ္ပဟီနဋ္ဌေန စ စိတ္တသန္တာနေ အနု အနု သယနတော အနုသယာ နာမ. တေ ဧဝ သတ္တေ ဝဋ္ဋသ္မိံ သံယောဇနတော သံယောဇနာနိ. သမုဒါစာရဝသေန ပရိယုဋ္ဌာနတော ပရိယုဋ္ဌာနာတိ ဝေဒိတဗ္ဗာ. အဿဒ္ဓိယံ အဟိရိကံ အနောတ္တပ္ပံ အပ္ပဿုတတာ ကောသဇ္ဇံ မုဋ္ဌဿစ္စံ ဒုပ္ပညတာတိ ဣမေ သတ္တ အသတံ အသပ္ပုရိသာနံ၊ အသန္တာ ဝါ လာမကာ ဓမ္မာတိ အသဒ္ဓမ္မာ နာမ. ပါဏာတိပါတာဒယော ကာယဝစီဒုစ္စရိတာနိ သတ္တ ဒုစ္စရိတာနိ နာမ. မာနော အတိမာနော မာနာတိမာနော ဩမာနော အဓိမာနော အသ္မိမာနော မိစ္ဆာမာနောတိ ဣမေ သတ္တ မာနာ နာမ. ‘‘မနုဿလောကေ မာတာပေတ္တိကသမ္ဘဝေါ အတ္တာ ဥစ္ဆိဇ္ဇတိ၊ တထာ ဆသု ဒေဝလောကေသု ဒိဗ္ဗော ကဗဠီကာရဘက္ခော အတ္တာ၊ ရူပလောကေ ရူပီ မနောမယော အတ္တာ၊ စတူသု အရူပဘဝေသု စတုဗ္ဗိဓော အရူပီ အတ္တာ တတ္ထ တတ္ထ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ’’တိ ဧဝံ ပဝတ္တာ သတ္တ ဥစ္ဆေဒဒိဋ္ဌိယော သတ္တ ဒိဋ္ဌိယော နာမ. ဧတ္ထ စ အာဒိတော တိဿော ဒိဋ္ဌိယော ရူပက္ခန္ဓံ အတ္တတော ဂဟေတွာ ပဝတ္တာ ဥစ္ဆေဒဒိဋ္ဌိယော၊ သေသာ စတဿော အရူပက္ခန္ဓေတိ ဉာတဗ္ဗာ. သတ္တကံ.

အဋ္ဌကေသု ပန လောဘော ဒေါသော မောဟော မာနော ဒိဋ္ဌိ ဝိစိကိစ္ဆာ ထိနံ ဥဒ္ဓစ္စဉ္စာတိ အဋ္ဌ ကိလေသဝတ္ထူနိ နာမ. ‘‘ယံ ကိဉ္စိ ကမ္မံ ကတ္တဗ္ဗံ မေ’’တိ ဧကံ၊ တထာ ‘‘ကတံ မေ’’တိ၊ ‘‘မဂ္ဂေါ မေ ဂန္တဗ္ဗော’’တိ၊ ‘‘ဂတော’’တိ၊ ‘‘အပ္ပကံ မေ ဘုတ္တ’’န္တိ၊ ‘‘သုဘုတ္တ’’န္တိ၊ ‘‘အာဗာဓော မေ ဥပ္ပန္နော’’တိ၊ ‘‘အစိရဝုဋ္ဌိတော ဂေလညာ’’တိ ဧကန္တိ ဣမာနိ အဋ္ဌ ကုသီတဝတ္ထူနိ နာမ၊ ကုသီတဿ ကောသဇ္ဇကာရဏာနီတိ အတ္ထော. လာဘေ အလာဘေ စ ယသေ အယသေ စ ပသံသာယ နိန္ဒာယ စ သုခေ ဒုက္ခေ စ ယထာက္ကမံ ရာဂဒေါသေဟိ စိတ္တဿ ပဋိဟနနံ အဋ္ဌသု လောကဓမ္မေသု စိတ္တဿ ပဋိဃာတော နာမ. ဟေဋ္ဌာ ဒွီဟိ စတုက္ကေဟိ ဝုတ္တာ အဋ္ဌ အနရိယဝေါဟာရာ နာမ. မိစ္ဆာဒိဋ္ဌိမိစ္ဆာသင်္ကပ္ပါဒယော အဋ္ဌ မိစ္ဆတ္တာ နာမ. ဘိက္ခူဟိ ဝိဇ္ဇမာနာယ အာပတ္တိယာ စောဒိယမာနဿ ‘‘န သရာမီ’’တိ နိဗ္ဗေဌနံ ဧကံ၊ ‘‘တွံ ဗာလော’’တိအာဒိနာ စောဒကပဋိပ္ဖရဏံ ဧကံ၊ တထာ ‘‘တုဝံ စေတမာပန္နော’’တိ စောဒကဿ ပစ္စာရောပနံ၊ အညေနညံ ပဋိစရဏံ၊ သံဃေ ဗာဟာဝိက္ခေပဘဏနံ၊ တုဏှီဘာဝေန ဝိဟေဌနံ၊ သံဃံ၊ စောဒကဉ္စ အနာဒိယိတွာ ပက္ကမနံ၊ စောဒနာဘယာ သိက္ခာပစ္စက္ခာနန္တိ ဣမေ အဋ္ဌ ပုရိသဒေါသာ နာမ. အသညီ အတ္တာ ရူပီ၊ အရူပီ၊ ရူပီ စ အရူပီ စ၊ နေဝရူပီနာရူပီ၊ အန္တဝါ၊ အနန္တဝါ၊ အန္တဝါ စ အနန္တဝါ စ၊ နေဝန္တဝါနာနန္တဝါတိ ဧဝံ ပဝတ္တာ အဋ္ဌ အသညီဝါဒါ နာမ. နေဝသညီနာသညီ အတ္တာ ရူပီ အရူပီတိအာဒိနာ ပဝတ္တာ အဋ္ဌ နေဝသညီနာသညီဝါဒါ နာမ. အဋ္ဌကံ.

နဝကေသု ပန ‘‘အနတ္ထံ မေ အစရိ၊ စရတိ၊ စရိဿတိ၊ ပိယဿ မေ အနတ္ထံ အစရိ၊ စရတိ၊ စရိဿတိ၊ အပ္ပိယဿ မေ အတ္ထံ အစရိ၊ စရတိ၊ စရိဿတီ’’တိ ဧဝံ ပဝတ္တာ နဝ အာဃာတာ ဧဝ အာဃာတဝတ္ထူနိ နာမ. ကောဓော မက္ခော ဣဿာ မစ္ဆရိယံ မာယာ သာဌေယျံ မုသာဝါဒေါ ပါပိစ္ဆတာ မိစ္ဆာဒိဋ္ဌီတိ ဣမာနိ နဝ ပုရိသမလာနိ နာမ. ‘‘သေယျဿ သေယျောဟမသ္မီ’’တိအာဒယော နဝဝိဓာ မာနာ နာမ. ‘‘တဏှံ ပဋိစ္စ ပရိယေသနာ၊ ပရိယေသနံ ပဋိစ္စ လာဘော၊ တံ ပဋိစ္စ ဝိနိစ္ဆယော၊ တံ ပဋိစ္စ ဆန္ဒရာဂေါ၊ တံ ပဋိစ္စ အဇ္ဈောသာနံ၊ တထာ ပရိဂ္ဂဟော၊ မစ္ဆရိယံ၊ အာရက္ခော၊ အာရက္ခာဓိကရဏံ ဒဏ္ဍာဒါနသတ္ထာဒါနကလဟဝိဂ္ဂဟဝိဝါဒါဒိအနေကေ ပါပကာ ဓမ္မာ’’တိ ဧဝံ ဝုတ္တာ ဣမေ နဝ တဏှာမူလကာ ဓမ္မာ နာမ. တတ္ထ ဝိနိစ္ဆယောတိ ဉာဏတဏှာဒိဋ္ဌိဝိတက္ကဝသေန စတူသု ဝိနိစ္ဆယေသု ဝိတက္ကဝိနိစ္ဆယော ဣဓ အဓိပ္ပေတော. လာဘံ ဟိ လဘိတွာ ‘‘ဣဒံ ရူပါရမ္မဏတ္ထာယ၊ ဣဒံ သဒ္ဒါရမ္မဏာဒိအတ္ထာယာ’’တိ ဧဝံ ဝိတက္ကေနေဝ ဝိနိစ္ဆယော. ဆန္ဒရာဂေါ ဒုဗ္ဗလရာဂေါ၊ အဇ္ဈောသာနန္တိ ဗလဝသန္နိဋ္ဌာနံ. ပရိဂ္ဂဟောတိ တဏှာဒိဋ္ဌိဝသေန ပရိဂ္ဂဟကရဏန္တိ ဝေဒိတဗ္ဗံ. ‘‘အသ္မီ’’တိ၊ ‘‘အဟမသ္မီ’’တိ၊ ‘‘အယမဟမသ္မီ’’တိ၊ ‘‘ဘဝိဿ’’န္တိ၊ ‘‘ရူပီ ဘဝိဿ’’န္တိ၊ ‘‘အရူပီ ဘဝိဿ’’န္တိ၊ ‘‘သညီ ဘဝိဿ’’န္တိ၊ ‘‘အသညီ ဘဝိဿ’’န္တိ၊ ‘‘နေဝသညီနာသညီ ဘဝိဿ’’န္တိ ဧဝံ ဝုတ္တာနိ ဣမာနိ နဝ စလနဋ္ဌေန ဣဉ္ဇိတာနိ နာမ. ဣမာနေဝ မညနဋ္ဌေန မညိတာနိ၊ ဝိပ္ဖန္ဒနတော ဝိပ္ဖန္ဒိတာနိ၊ ပပဉ္စနတော ပပဉ္စိတာနိ၊ တာနေဝ တေဟိ တေဟိ ကာရဏေဟိ သင်္ခတတ္တာ သင်္ခတာနိ စ နာမ ဟောန္တိ. သဗ္ဗေဟိ တေဟိ ပဉ္စဟိ နဝကေဟိ မာနော ဧဝ ကထိတော. သောပိ ဟိ ‘‘အသ္မီ’’တိအာဒီဟိ သညီဟိ စ အာကာရေဟိ ဒိဋ္ဌိ ဝိယ ပဝတ္တတီတိ. နဝကံ.

ဒသကေသု ပန လောဘော ဒေါသော မောဟော မာနော ဒိဋ္ဌိ ဝိစိကိစ္ဆာ ထိနံ ဥဒ္ဓစ္စံ အဟိရိကံ အနောတ္တပ္ပန္တိ ဣမေ ဒသ ကိလေသာ ဧဝ ကိလေသဝတ္ထူနိ နာမ. ‘‘အနတ္ထံ မေ အစရီ’’တိအာဒယော နဝ ခါဏုကဏ္ဋကာဒီသု အဋ္ဌာနအာဃာတေန သဒ္ဓိံ ဒသ အာဃာတဝတ္ထူနိ နာမ. ပါဏာတိပါတာဒယော ဒသ အကုသလကမ္မပထာ နာမ. ကာမရာဂသံယောဇနံ ပဋိဃမာနဒိဋ္ဌိဝိစိကိစ္ဆာသီလဗ္ဗတပရာမာသဘဝရာဂဣဿာမစ္ဆရိယအဝိဇ္ဇာသံယောဇနန္တိ ဣမာနိ ဒသ သံယောဇနာနိ နာမ. မိစ္ဆာဒိဋ္ဌိမိစ္ဆာသင်္ကပ္ပါဒယော အဋ္ဌ၊ မိစ္ဆာဉာဏမိစ္ဆာဝိမုတ္တီဟိ သဒ္ဓိံ ဒသ မိစ္ဆတ္တာ နာမ. တတ္ထ မိစ္ဆာဉာဏန္တိ ပါပကိရိယာသု ဥပါယစိန္တာဝသေန စေဝ ပါပကံ ကတွာ ‘‘သုကတံ မယာ’’တိ ပစ္စဝေက္ခဏဝသေန စ ပဝတ္တော မောဟော. မိစ္ဆာဝိမုတ္တီတိ အဝိမုတ္တဿေဝ သတော ဝိမုတ္တသညိတာ. ‘‘နတ္ထိ ဒိန္နံ၊ နတ္ထိ ယိဋ္ဌ’’န္တိအာဒီဟိ ဒသဟိ အာကာရေဟိ ပဝတ္တံ နတ္ထိကဒဿနံ ဒသဝတ္ထုကာ မိစ္ဆာဒိဋ္ဌိ နာမ. ‘‘သဿတော လောကော၊ တထာ အသဿတော၊ အန္တဝါ၊ အနန္တဝါ၊ တံ ဇီဝံ တံ သရီရ’’န္တိ ဝါ၊ ‘‘အညံ ဇီဝံ အညံ သရီရ’’န္တိ ဝါ၊ ‘‘ဟောတိ တထာဂတော ပရံ မရဏာ’’တိ ဝါ၊ ‘‘န ဟောတိ။ပေ။ ဟောတိ စ န ဟောတိ စ၊ နေဝ ဟောတိ န န ဟောတိ တထာဂတော ပရံ မရဏာ’’တိ ဝါ ဧဝံ ပဝတ္တာ ဒသဝတ္ထုကာ အန္တဂ္ဂါဟိကာ ဒိဋ္ဌိ နာမ. တတ္ထ လောကောတိ ခန္ဓာဒယော၊ ‘‘အန္တဝါ’’တိ ဣဒံ ပရိတ္တံ ကသိဏဇ္ဈာနံ သန္ဓာယ ဝုတ္တံ. ‘‘အနန္တဝါ’’တိ ဣဒံ ဝိပုလန္တိ ဂဟေတဗ္ဗံ. တထာဂတောတိ သတ္တော. ဒသကံ.

အဋ္ဌာရသကေသု တဏှာဝိစရိတာနီတိ တဏှာသမုဒါစာရာ တဏှာပဝတ္တိယော. အဇ္ဈတ္တိကဿုပါဒါယာတိ အဇ္ဈတ္တိကံ ခန္ဓပဉ္စကံ ဥပါဒါယ. ဣဒံ ဟိ ဥပယောဂတ္ထေ သာမိဝစနံ. တတ္ထ ‘‘အသ္မီတိ ဟောတိ၊ ဣတ္ထသ္မီတိ ဟောတိ၊ ဧဝသ္မီတိ ဟောတိ၊ အညထာသ္မီတိ ဟောတိ၊ တထာ ဘဝိဿန္တိ၊ ဣတ္ထံ ဘဝိဿန္တိ၊ ဧဝံ ဘဝိဿန္တိ၊ အညထာ ဘဝိဿန္တိ ဟောတိ၊ တထာ အသ္မီတိ၊ သာတသ္မီတိ ဟောတိ၊ တထာ သိယန္တိ၊ ဣတ္ထံ သိယန္တိ၊ ဧဝံ သိယန္တိ၊ အညထာ သိယန္တိ ဟောတိ၊ တထာ အပါဟံ သိယန္တိ၊ အပါဟံ ဣတ္ထံ သိယန္တိ၊ အပါဟံ ဧဝံ သိယန္တိ၊ အပါဟံ အညတာ သိယန္တိ ဟောတီ’’တိ ဧဝံ ဝုတ္တာနိ ဣမာနိ အဇ္ဈတ္တိကဿုပါဒါယ အဋ္ဌာရသ တဏှာဝိစရိတာနိ နာမ.

တတ္ထ အသ္မီတိ ဟောတီတိ အဇ္ဈတ္တိကေသု ခန္ဓပဉ္စကေသု သမူဟတော ‘‘အဟမသ္မီ’’တိ ဂဟဏေ သတီတိ အတ္ထော. ဧဝံ ပန ဂဟဏေ သတိ တတော ပရံ အနုပနိဓာယ၊ ဥပနိဓာယ ဝါတိ ဒွိဓာ ဂဟဏံ ဟောတိ. တတ္ထ အနုပနိဓာယာတိ အညံ အာကာရံ အနုပနိဓာယ အနုပဂမ္မ သကဘာဝမေဝါရမ္မဏံ ကတွာ ဣတ္ထသ္မီတိ ဟောတိ. တဿ ‘‘ခတ္တိယာဒီသု ဣဒံပကာရော အဟ’’န္တိ တဏှာမာနဒိဋ္ဌိဝသေန ဂဟဏံ ဟောတီတိ အတ္ထော. ဥပနိဓာယ ဂဟဏံ ပန ဒုဝိဓံ ဟောတိ သမတော စ အသမတော စ. တတ္ထ သမတော ဂဟဏံ ဧဝသ္မီတိ ဣဒံ၊ တဿ ယထာ အယံ ခတ္တိယော၊ ဗြာဟ္မဏာဒယော ဝါ ဒေဝမနုဿရူပီအရူပိအာဒယော ဝါ၊ ဧဝမဟမသ္မီတိ အတ္ထော. အညထာသ္မီတိ ဣဒံ ပန အသမတော ဂဟဏံ၊ တဿ ယထာ ဣမေ ခတ္တိယာဒယော၊ တတော အညထာ အဟံ ဟီနော ဝါ အဓိကော ဝါတိ အတ္ထော. ဣမာနိ တာဝ ပစ္စုပ္ပန္နဝသေန စတ္တာရိ တဏှာဝိစရိတာနိ၊ ဘဝိဿန္တိအာဒီနိ ပန စတ္တာရိ အနာဂတဝသေန ဝုတ္တာနိ. တေသံ ပုရိမစတုက္ကေ ဝုတ္တနယဝသေန အတ္ထော ဝေဒိတဗ္ဗော. တတ္ထ အသ္မီတိအာဒိဒွယံ သဿတုစ္ဆေဒဂ္ဂါဟဝသေန ဝုတ္တံ. တတ္ထ ဟိ အသ္မီတိ သဿတံ၊ သီဒတီတိ သာတံ၊ အသဿတံ၊ ဣတော ပရာနိ သိယန္တိအာဒီနိ စတ္တာရိ သံသယပရိဝိတက္ကဝသေန ဝုတ္တာနိ. အပါဟံ သိယန္တိအာဒီနိ စတ္တာရိ ‘‘အပိ နာမာဟံ ဘဝေယျ’’န္တိ ဧဝံ ပဝတ္တပတ္ထနာကပ္ပနဝသေန ဝုတ္တာနီတိ ဒဋ္ဌဗ္ဗံ. အဋ္ဌာရသကံ ပဌမံ.

ဒုတိယေ ဗာဟိရဿုပါဒါယာတိ ဗာဟိရံ ခန္ဓပဉ္စကံ ဥပါဒါယ. တတ္ထ ‘‘ဣမိနာ အသ္မီတိ ဟောတိ၊ ဣမိနာ ဣတ္ထသ္မီတိ ဟောတိ၊ ဣမိနာ ဧဝသ္မီတိ ဟောတိ၊ ဣမိနာ အညထာသ္မီတိ ဟောတီ’’တိအာဒိနာ အနန္တရေ ဝုတ္တနယေန ဗာဟိရဿုပါဒါယ အဋ္ဌာရသ တဏှာဝိစရိတာနီတိ ဝေဒိတဗ္ဗာနိ. ‘‘ဣမိနာ’’တိ ပဒမတ္တမေဝ ဟေတ္ထ ပုရိမေဟိ ဝိသေသော. တတ္ထ ဣမိနာတိ ဣမိနာ ဗာဟိရေန ရူပေန ဝါ။ပေ။ ဝိညာဏေန ဝါတိ အတ္ထော. တတ္ထ စ ဆတ္တခဂ္ဂဗီဇနိအန္နပါနဓနဓညာဒိဥပကရဏဝသေန ဗာဟိရံ ရူပံ ဝေဒိတဗ္ဗံ. ဒါသဒါသိဉာတိပရိဇနဟတ္ထိအဿာဒိဥပကရဏဝသေန ဝေဒနာဒယော ဝေဒိတဗ္ဗာ. ဣမေဟိ ဗာဟိရေဟိ ရူပါဒီဟိ ‘‘ဣတ္ထသ္မီတိ ဧဝသ္မီ’’တိအာဒိနာ သဗ္ဗတ္ထ ယောဇနာ ဝေဒိတဗ္ဗာ. အဋ္ဌာရသကံ ဒုတိယံ.

ဣတရေသု ပန တဒေကဇ္ဈံ အဘိသံယူဟိတွာတိအာဒီသု တဒုဘယံ အဋ္ဌာရသကံ ဧကတော ယောဇေတွာ ဆတ္တိံသတဏှာဝိစရိတာနိ ဟောန္တိ၊ ဧဝံ ဧကေကဿ ပုဂ္ဂလဿ အတီတကာလေ ဒွိန္နံ အဋ္ဌာရသကာနံ ဝသေန ဆတ္တိံသ၊ တထာ အနာဂတေ ဆတ္တိံသ ဟောန္တိ. ပစ္စုပ္ပန္နေ ပန ဧကဿ ယထာလာဘဝသေန တာနိပိ လဗ္ဘန္တိ၊ သဗ္ဗသတ္တာနံ ဝသေန ပစ္စုပ္ပန္နေပိ ဆတ္တိံသ လဗ္ဘန္တိ. ဣတိ ဧဝံ ဝုတ္တေန ပကာရေန တံ သဗ္ဗံ ဧကတော ကတွာ သဗ္ဗသတ္တာနံ ကာလတ္တယေပိ ဆန္နံ အဋ္ဌာရသကာနံ ဝသေန အဋ္ဌသတံ တဏှာဝိစရိတာနိ ဟောန္တီတိ အတ္ထော. အဋ္ဌတဏှာဝိစရိတသတံ ဟောတီတိ ဧတ္ထာပိ ဧဝမေဝ အတ္ထော ဒဋ္ဌဗ္ဗော.

တဏှာဝိစရိတာနိ နိဋ္ဌိတာနိ.

ယာနိ စာတိအာဒီသု ယာနိ စေတ္ထ ဒွါသဋ္ဌိ ဒိဋ္ဌိဂတာနိ ဝတ္တဗ္ဗာနိ၊ တာနိ ဗြဟ္မဇာလနာမကေ ဒီဃနိကာယဿ ပဌမသုတ္တန္တေ (ဒီ. နိ. ၁.၂၉ အာဒယော) သတ္ထာရာ သယံ အာဟစ္စ ဘာသိတာနီတိ အတ္ထော. ဗြဟ္မဇာလေ ဟိ စတ္တာရော သဿတဝါဒါ၊ စတ္တာရော ဧကစ္စသဿတိကာ၊ စတ္တာရော အန္တာနန္တိကာ၊ စတ္တာရော အမရာဝိက္ခေပိကာ၊ ဒွေ အဓိစ္စသမုပ္ပန္နိကာ၊ သောဠသ သညီဝါဒါ၊ အဋ္ဌ အသညီဝါဒါ၊ အဋ္ဌ နေဝသညီနာသညီဝါဒါ၊ သတ္တ ဥစ္ဆေဒဝါဒါ၊ ပဉ္စ ဒိဋ္ဌဓမ္မနိဗ္ဗာနဝါဒါတိ ဣမာနိ ဒွါသဋ္ဌိ ဒိဋ္ဌိဂတာနိ သနိဒါနာနိ နာနာနယတော ဝုတ္တာနိ၊ တတ္ထ ဝုတ္တနယေနေဝ နေသံ ဝိဘာဂေါ ဝေဒိတဗ္ဗော. အယံ တာဝေတ္ထ ပဒတ္ထာနုသာရတော ဝိနိစ္ဆယော၊ သေသောပေတ္ထ ဝိနိစ္ဆယော ပဒတ္ထေ ဝုတ္တာနုသာရတောဝ သုဝိညေယျောတိ.

ခုဒ္ဒကဝတ္ထုဝိဘင်္ဂမာတိကတ္ထဝဏ္ဏနာ နိဋ္ဌိတာ.