သိက္ခာပဒဝိဘင်္ဂမာတိကတ္ထဝဏ္ဏနာ

သိက္ခာပဒဝိဘင်္ဂမာတိကာယ ပန အတ္ထတော တာဝ – သိက္ခာပဒါနီတိ သိက္ခိတဗ္ဗပဒါနိ၊ သိက္ခာကောဋ္ဌာသာတိ အတ္ထော. အပိစ သဗ္ဗေပိ ကုသလာ ဓမ္မာ သိက္ခိတဗ္ဗတော သိက္ခာ၊ တာသံ ပတိဋ္ဌာနဋ္ဌေန ပဒံ၊ ပဉ္စသု ပန သီလင်္ဂေသု ယံ ကိဉ္စိ အင်္ဂံ. ပါဏာတိပါတာဒီသု ပါဏဿ အတီဝ ပါတော ပါဏာတိပါတော၊ ပါဏဝဓောတိ အတ္ထော. ပါဏောတိ စေတ္ထ ဝေါဟာရတော သတ္တော၊ ပရမတ္ထတော ဇီဝိတိန္ဒြိယံ၊ တသ္မိံ ပန ပါဏေ ပါဏသညိနော ဇီဝိတိန္ဒြိယုပစ္ဆေဒကဥပက္ကမသမုဋ္ဌာပိကာ ကာယဝစီဒွါရာနံ အညတရဒွါရပ္ပဝတ္တာ ဝဓကစေတနာ ပါဏာတိပါတော၊ တသ္မာ ပါဏာတိပါတာ. ဝေရမဏီတိ ဝိရတိ၊ သာ ဧဝ ဝုတ္တနယေန သိက္ခာပဒန္တိ ဝေရမဏိသိက္ခာပဒံ. အဒိန္နန္တိ န ဒိန္နံ၊ ပရပရိဂ္ဂဟိတံ၊ ပရပရိဂ္ဂဟိတဿ အဒိန္နဿ အာဒါနံ အဒိန္နာဒါနံ. ပရဿ ဟရဏံ ထေယျံ စောရိကာတိ ဝုတ္တံ ဟောတိ. အတ္ထတော ပန ပရပရိဂ္ဂဟိတေ တထာသညိနော တဒါဒါယကဥပက္ကမသမုဋ္ဌာပိကာ ထေယျစေတနာ အဒိန္နာဒါနံ. ကာမေသူတိ ဝတ္ထုကာမေသု. မိစ္ဆာစာရာတိ ကိလေသကာမဝသေန လာမကာစာရာ၊ ပုရိသဿ မာတုရက္ခိတာဒိသင်္ခါတာသု၊ ဣတ္ထိယာ အတ္တနော နိယမိတပုရိသတော ပရပုရိသသင်္ခါတေသု စ အဂမနီယဋ္ဌာနေသု ဝီတိက္ကမာစာရာတိ ဝုတ္တံ ဟောတိ. အတ္ထတော ပန အဂမနီယဝတ္ထူသု မဂ္ဂေနမဂ္ဂပ္ပဋိပါဒနောပက္ကမသမုဋ္ဌာပိကာ၊ အဓိဝါသနာကာရပ္ပဝတ္တာ ဝါ မေထုနစေတနာ ကာမေသုမိစ္ဆာစာရော. မုသာတိ အဘူတံ အတစ္ဆံ ဝတ္ထု၊ ဝါဒေါတိ တဿ အဘူတတံ ဉတွာဝ ဘူတတော တစ္ဆတော ဝိညာပနံ. လက္ခဏတော ပန အတထံ ဝတ္ထုံ ဉတွာ တထတော ပရံ ဝိညာပေတုကာမဿ အတ္ထဘဉ္ဇကကာယဝစီပယောဂသမုဋ္ဌာပိကာ စေတနာ မုသာဝါဒေါ. သုရာတိ ပိဋ္ဌသုရာ ပူဝသုရာ ဩဒနသုရာ ကိဏ္ဏပက္ခိတ္တာ သမ္ဘာရသံယုတ္တာတိ ပဉ္စ သုရာ. မေရယန္တိ ပုပ္ဖါသဝေါ ဖလာသဝေါ ဂုဠာသဝေါ မဓွာသဝေါ သမ္ဘာရသံယုတ္တောတိ ပဉ္စ အာသဝါ. တဒုဘယမ္ပိ မဒနီယဋ္ဌေန မဇ္ဇံ၊ ယာယ စေတနာယ တံ မဇ္ဇံ ပိဝတိ၊ သာ ပမာဒကာရဏတ္တာ ပမာဒဋ္ဌာနံ၊ တသ္မာ သုရာမေရယမဇ္ဇပမာဒဋ္ဌာနာ. သေသံ သုဝိညေယျမေဝါတိ အယံ တာဝေတ္ထ ပဒတ္ထော.

ဓမ္မဘေဒေါ ပန ဝိဘင်္ဂနယေ ပါကဋော ဘဝိဿတိ. ဧဝံ ဥပရိပိ. ဝိဘင်္ဂနယေသု စေတ္ထ သုတ္တန္တဘာဇနီယံ နတ္ထိ၊ အဘိဓမ္မဘာဇနီယေ ပနေတာနိ ပဉ္စ သိက္ခာပဒါနိ ကာမာဝစရကုသလစိတ္တသမ္ပယုတ္တာနံ ဝိရတီနံ ဝသေန နာနပ္ပကာရတော ပဌမဝါရေ ဝိဘတ္တာနိ၊ တထာ ဒုတိယဝါရေ စေတနာဝသေန၊ ဝိရတိစေတနာသမ္ပယုတ္တာ ပနေတ္ထ ဓမ္မာ န သိက္ခာပဒါနိ၊ သိက္ခာပဒသမ္ပယုတ္တာ ပန ဟောန္တိ၊ တထာ တတိယနယေ ဖဿာဒီနံ သဗ္ဗေသံ ဓမ္မာနံ ဝသေန နာနပ္ပကာရတော ဝိဘတ္တာတိ.

ပဉှာပုစ္ဆကေ ပန စေတနာယ၊ ဖဿာဒီနဉ္စ ပရိယာယသိက္ခာပဒတ္တာ နိပ္ပရိယာယသိက္ခာပဒဘူတာနံ ဝိရတီနံ ဝသေနေဝ ဝိဘတ္တာနိ. တတ္ထ ဟိ ပဉ္စ သိက္ခာပဒါနိ ကုသလာ ဧဝ၊ သိယာ သုခါယ၊ သိယာ အဒုက္ခမသုခါယ သမ္ပယုတ္တာ။ပေ။ ပရိတ္တာရမ္မဏာဝ၊ ပစ္စုပ္ပန္နာရမ္မဏာဝ၊ ဗဟိဒ္ဓါရမ္မဏာဝ၊ အနိဒဿနအပ္ပဋိဃာဝ၊ န ဟေတူ၊ သဟေတုကာ၊ နော စိတ္တာ၊ စေတသိကာ၊ ကာမာဝစရာ၊ သဥတ္တရာဝ၊ အရဏာဝါတိ. ဧတ္ထ စ ယာနိ သိက္ခာပဒါနိ သတ္တာရမ္မဏာနိ ဝုတ္တာနိ၊ တာနိ စ ဝိရတိသဘာဝတ္တာ ယသ္မာ ‘‘သတ္တော’’တိ သင်္ခံ ဂတေ ပရိတ္တဓမ္မေ ဧဝ ပစ္စုပ္ပန္နေ ဧဝ ဓမ္မေ အာရမ္မဏံ ကရောန္တိ၊ တသ္မာ ပရိတ္တာရမ္မဏာတိ စ ဝုတ္တာတိ ဝေဒိတဗ္ဗာ. ဣဒါနိ ဝိရမိတဗ္ဗပါဏာတိပါတာဒီနံ –

ဓမ္မကမ္မပထာလမ္ဗ-ဝေဒနာမူလကမ္မတော၊

သာဝဇ္ဇင်္ဂါဒိတော ဉေယျော၊ ပါဠိမုတ္တဝိနိစ္ဆယော.

တတ္ထ ဓမ္မတော တာဝ – ပဉ္စပေတေ ပါဏာတိပါတာဒယော စေတနာသဘာဝါဝ ဟောန္တိ. ကမ္မပထတော ပဉ္စ ကမ္မပထာဝ. အာရမ္မဏတော ပန ပါဏာတိပါတော ဇီဝိတိန္ဒြိယာရမ္မဏော၊ အဒိန္နာဒါနံ သတ္တာရမ္မဏံ၊ သင်္ခါရာရမ္မဏံ ဝါ၊ တထာ မုသာဝါဒေါ၊ မိစ္ဆာစာရော ဣတ္ထိပုရိသာရမ္မဏော၊ သုရာပါနံ သင်္ခါရာရမ္မဏံ. ဝေဒနာတော ပန ပါဏာတိပါတော ဒုက္ခဝေဒနော၊ အဒိန္နာဒါနံ တိဝေဒနံ၊ တထာ မုသာဝါဒေါ၊ မိစ္ဆာစာရော ပန သုခမဇ္ဈတ္တဝသေန ဒွိဝေဒနော၊ တထာ သုရာပါနံ. မူလတော ပန ပဌမော ဒေါသမောဟမူလော၊ ဒုတိယံ သိယာ လောဘမောဟမူလံ၊ သိယာ ဒေါသမောဟမူလံ၊ တထာ မုသာဝါဒေါ၊ မိစ္ဆာစာရော ပန လောဘမောဟမူလောဝ၊ တထာ သုရာပါနံ. ကမ္မတော ပနေတ္ထ မုသာဝါဒေါ ဝစီကမ္မံ၊ သေသာ ကာယကမ္မမေဝ.

သာဝဇ္ဇတော ပန ပါဏာတိပါတော တာဝ အမနုဿကေ ပါဏေ အပ္ပသာဝဇ္ဇော၊ မနုဿကေ မဟာသာဝဇ္ဇော. တေသု စ ခုဒ္ဒကသရီရေ အပ္ပသာဝဇ္ဇော၊ မဟာသရီရေ မဟာသာဝဇ္ဇော. ကသ္မာ? ပယောဂမဟန္တတာယ. ပယောဂသမတ္တေပိ အပ္ပဂုဏေ အပ္ပသာဝဇ္ဇော၊ မဟာဂုဏေ မဟာသာဝဇ္ဇော. သရီရဂုဏာနံ သမဘာဝေ သတိ ကိလေသာနံ၊ ဥပက္ကမာနဉ္စ မုဒုတိဗ္ဗတာယ အပ္ပမဟာသာဝဇ္ဇော ဟောတိ၊ ခီဏာသဝေ ပန မဟာသာဝဇ္ဇတရောတိ. အဒိန္နာဒါနံ ဝတ္ထုနော ဟီနပ္ပဏီတတာယ စေဝ ဂုဏဝိရဟိတတဗ္ဗန္တသန္တကတာယ စ. တတ္ထာပိ တံ တံ ဥပါဒါယုပါဒါယ စ အပ္ပမဟာသာဝဇ္ဇံ၊ ခီဏာသဝသန္တကေ မဟာသာဝဇ္ဇတရန္တိ ဝေဒိတဗ္ဗံ. မိစ္ဆာစာရော ဒုဿီလသီလဝန္တဝတ္ထုဝီတိက္ကမနေန. တတ္ထာပိ တံ တံ ဥပါဒါယုပါဒါယ စ အပ္ပမဟာသာဝဇ္ဇော၊ ခီဏာသဝဝတ္ထုဝီတိက္ကမနေ မဟာသာဝဇ္ဇတရောတိ စ ဝေဒိတဗ္ဗော. မုသာဝါဒေါ ယမတ္ထံ ဘဉ္ဇတိ၊ တဿ အပ္ပမဟန္တတံ၊ ဝတ္ထုသာမိနော ဂုဏဝိရဟိတတံ၊ တဗ္ဗန္တတဉ္စ ဥပါဒါယုပါဒါယ အပ္ပမဟာသာဝဇ္ဇော ဟောတိ. အပိစ အတ္တနော သန္တကံ အဒါတုကာမတာယ၊ ဟသာဓိပ္ပါယေန ဝါ ‘‘နတ္ထေတ’’န္တိအာဒိနယပ္ပဝတ္တော အပ္ပသာဝဇ္ဇော၊ အဒိဋ္ဌံ ‘‘ဒိဋ္ဌ’’န္တိအာဒိနာ ကူဋသက္ခိအာဒိဘာဝေန ဝါ ပဝတ္တော မဟာသာဝဇ္ဇော၊ မုသာ ဝတွာ ပန သံဃဘေဒနေ မဟာသာဝဇ္ဇတရော. သုရာပါနံ ဗိန္ဒုမတ္တတော ပဋ္ဌာယ တံ တံ ဥပါဒါယုပါဒါယ အပ္ပသာဝဇ္ဇံ၊ ဗဟုကေ မဟာသာဝဇ္ဇံ၊ ကာယဝိကာရဇနနပဟောနကပါနေ ပန မဟာသာဝဇ္ဇတရမေဝ.

အင်္ဂါဒိတော ပန ပါဏာတိပါတဿ ပါဏော ပါဏသညိတာ ဝဓကစိတ္တံ ဥပက္ကမော တေန မရဏန္တိ ပဉ္စ အင်္ဂါနိ. သာဟတ္ထိကော အာဏတ္တိကော နိဿဂ္ဂိကော ထာဝရော ဝိဇ္ဇာမယော ဣဒ္ဓိမယောတိ ဆ ပယောဂါ. အဒိန္နာဒါနဿ ပရပရိဂ္ဂဟိတတာ တထာသညိတာ ထေယျစိတ္တံ ဥပက္ကမော တေန ဟရဏန္တိ ပဉ္စ အင်္ဂါနိ. သာဟတ္ထိကာဒယော ဆ ဧဝ ပယောဂါ. တေ စ ခေါ ယထာနုရူပံ ထေယျာဝဟာရာဒီနံ ဝသေန ပဝတ္တာ. မိစ္ဆာစာရဿ အဂမနီယဝတ္ထုတာ သေဝနစိတ္တံ မဂ္ဂေန မဂ္ဂပ္ပဋိပတ္တီတိ တီဏိ အင်္ဂါနိ. သာဟတ္ထိကော ဧကောဝ ပယောဂေါ. ဧဝံ သေသာနမ္ပိ ပယောဂေါ ဝေဒိတဗ္ဗော. မုသာဝါဒဿ အတထံ ဝတ္ထု၊ ဝိသံဝါဒနစိတ္တံ၊ တဇ္ဇော ဝါယာမော၊ ပရဿ တဒတ္ထဝိဇာနနန္တိ စတ္တာရိ အင်္ဂါနိ. သုရာပါနဿ သုရာဒီနံ အညတရတာ အဇ္ဈောဟရဏန္တိ ဒွေ အင်္ဂါနီတိ.

ဧဝံ ပါဏာတိပါတာဒီနံ ဓမ္မာဒိတော ဝိနိစ္ဆယံ ဉတွာ ဣဒါနိ ပါဏာတိပါတာဝေရမဏိအာဒီနံ ပဉ္စန္နမ္ပိ –

ဓမ္မကမ္မပထာလမ္ဗ-သမာဒါနပယောဂတော၊

ခဏ္ဍတော စ ဝိဇာနီယော၊ ပါဠိမုတ္တဝိနိစ္ဆယော.

တတ္ထ ဓမ္မကမ္မပထတော ဝိနိစ္ဆယော ဝုတ္တနယောဝ. အာရမ္မဏတော ပနေတာနိ ဇီဝိတိန္ဒြိယာဒိတံတံဝီတိက္ကမိတဗ္ဗဝတ္ထာရမ္မဏာနိ. သမာဒါနတော ဧကဿ သန္တိကေ ဝါ သယမေဝ ဝါ ‘‘ပဉ္စ သီလာနိ အဓိဋ္ဌဟာမီ’’တိ ဧကတော ဝါ ပါဋိဧက္ကံ ဝါ သမာဒိယန္တေန ဧတာနိ သမာဒိန္နာနေဝ ဟောန္တိ. ပယောဂတော ပန သဗ္ဗာနိပိ သာဟတ္ထိကပယောဂါနေဝ. ခဏ္ဍတော ဂဟဋ္ဌာ ယံ ယံ ဝီတိက္ကမန္တိ၊ တံ တဒေဝ ခဏ္ဍံ ဟောတိ၊ နေတရေ. ဂဟဋ္ဌာ အနိဗဒ္ဓသီလာ ဟောန္တိ၊ ယံ ယံ သက္ကောန္တိ၊ တံ တဒေဝ ဂေါပေန္တိ. သာမဏေရာနံ ပန ဧကသ္မိံ ဝီတိက္ကမိတေ သဗ္ဗာနိပိ ဘိဇ္ဇန္တီတိ ဧဝံ ဝိဇာနီယော ပါဠိမုတ္တဝိနိစ္ဆယော.

သိက္ခာပဒဝိဘင်္ဂမာတိကတ္ထဝဏ္ဏနာ နိဋ္ဌိတာ.