မဂ္ဂင်္ဂဝိဘင်္ဂမာတိကတ္ထဝဏ္ဏနာ

မဂ္ဂင်္ဂဝိဘင်္ဂမာတိကာယ ပန အတ္ထတော တာဝ – အရိယောတိ တံတံမဂ္ဂဝဇ္ဈကိလေသေဟိ အာရကတ္တာ၊ အရိယဘာဝကရတ္တာ စ အရိယော၊ အဋ္ဌ အင်္ဂါနိ အဿာတိ အဋ္ဌင်္ဂိကော၊ နိဗ္ဗာနတ္ထိကေဟိ မဂ္ဂီယတိ၊ နိဗ္ဗာနံ ဝါ မဂ္ဂတိ၊ ကိလေသေ ဝါ မာရေန္တော ဂစ္ဆတီတိ မဂ္ဂေါ. သေယျထိဒန္တိ သော ကတမောတိ စေ၊ ဣဒါနိ သွာယံ မဂ္ဂေါ စတုရင်္ဂိနီ ဝိယ သေနာ အင်္ဂမတ္တမေဝ ဟောတိ၊ အင်္ဂဝိနိမုတ္တော နတ္ထီတိ ဒဿေန္တော ‘‘သမ္မာဒိဋ္ဌိ။ပေ။ သမ္မာသမာဓီ’’တိ အာဟ. တတ္ထ သမ္မာ ပဿတီတိ သမ္မာဒိဋ္ဌိ၊ ပညာ. သမ္မာ သင်္ကပ္ပေတိ တက္ကေတီတိ သမ္မာသင်္ကပ္ပေါ၊ ဝိတက္ကော. သေသံ သုဝိညေယျမေဝ. တတော ဓမ္မဘေဒေါပိ ဝိဘင်္ဂနယောပိ ဗောဇ္ဈင်္ဂေသု ဝုတ္တသဒိသော.

အဘိဓမ္မဘာဇနီယေ ပန ဝိရတိတ္တယဝဇ္ဇိတော ပဉ္စင်္ဂိကောပိ မဂ္ဂေါ ဝိဘတ္တော၊ တဉ္စ ပဉ္စန္နံ အင်္ဂါနံ ကိစ္စာဓိကတံ၊ ဝိရတီနဉ္စ အဝုတ္တသိဒ္ဓတံ သန္ဓာယ၊ ဝိရတိဝဇ္ဇိတဿ ပန လောကုတ္တရမဂ္ဂဿ အဘာဝါ သောပိ အဋ္ဌင်္ဂိကောဝါတိ ဝေဒိတဗ္ဗော.

ပဉှာပုစ္ဆကေပိ သမ္မာသင်္ကပ္ပေါ သုခါယ ဝေဒနာယ သမ္ပယုတ္တောဝ၊ သေသာ ဒွီဟိ. သမ္မာသင်္ကပ္ပေါ အဝိတက္ကဝိစာရမတ္တော၊ ပီတိသဟဂတော သုခသဟဂတောဝ၊ န ဥပေက္ခာသဟဂတော၊ သေသာ တိဓာပိ. သမ္မာဒိဋ္ဌိ ဟေတု၊ သေသာ နဟေတူတိ အယံ ဝိသေသော. သေသံ သမမေဝ. ဣဒါနိ ပန –

ကမတော ကိစ္စဘေဒတော၊ ဘူမိဘေဒဝိဝေကတော၊

မဂ္ဂင်္ဂေသု ဝိဇာနီယော၊ ပါဠိမုတ္တဝိနိစ္ဆယော.

တတ္ထ ကမတော တာဝ အယမ္ပိ ဒေသနာက္ကမောဝ. ဘဂဝတာ ဟိ နိဗ္ဗာနာဓိဂမာယ ပဋိပန္နဿ ပညာပဇ္ဇောတပညာသတ္ထတာယ အဝိဇ္ဇန္ဓကာရဝိဓမနတော ဗဟူပကာရတ္တာ ပဌမံ သမ္မာဒိဋ္ဌိ ဒေသိတာ. တတော ဟေရညိကဿ ကဟာပဏပရိဝတ္တကဟတ္ထော ဝိယ ယထာသဘာဝဒဿနဿ သမ္မာဒိဋ္ဌိယာ ဗဟူပကာရတ္တာ သမ္မာသင်္ကပ္ပေါ. သွာယံ ယထာ သမ္မာဒိဋ္ဌိယာ၊ ဧဝံ သမ္မာဝါစာယပိ ဥပကာရကော. ယထာဟ ‘‘ပုဗ္ဗေ ခေါ၊ ဂဟပတိ၊ တက္ကေတွာ ဝိစာရေတွာ ပစ္ဆာ ဝါစံ ဘိန္ဒတီ’’တိ (မ. နိ. ၁.၄၆၃)၊ တသ္မာ တဒနန္တရံ သမ္မာဝါစာ. ယသ္မာ ပန ဝါစာယ သံဝိဒဟိတွာ လောကေ ကမ္မန္တေ ပယောဇေန္တိ၊ တသ္မာ တဒနန္တရံ သမ္မာကမ္မန္တော. ကာယဝစီဒုစ္စရိတံ ပဟာယ ဥဘယသုစရိတံ ပူရေန္တဿေဝ ယသ္မာ အာဇီဝဋ္ဌမကံ သီလံ ပူရတိ၊ န ဣတရဿ၊ တသ္မာ တဒုဘယာနန္တရံ သမ္မာအာဇီဝေါ ဝုတ္တော. ဧဝံ ‘‘ဝိသုဒ္ဓဒိဋ္ဌိသီလေနာပိ ဧတ္တာဝတာ ပရိတောသံ အကတွာ ဣဒံ ဝီရိယံ အာရဘိတဗ္ဗ’’န္တိ ဒဿေတုံ တဒနန္တရံ သမ္မာဝါယာမော. အာရဒ္ဓဝီရိယေနာပိ ကာယာဒီသု သတိ သူပဋ္ဌိတာ ကာတဗ္ဗာတိ ဒဿနတ္ထံ တဒနန္တရံ သမ္မာသတိ. သူပဋ္ဌိတာယ သတိယာ ဧကတ္တာရမ္မဏေ စိတ္တံ သမာဓာတုံ သက္ကာတိ တဒနန္တရံ သမ္မာသမာဓိ ဝုတ္တောတိ အယံ တာဝေတ္ထ ကမော.

ကိစ္စတော ပနေသံ ဧကေကဿ တီဏိ တီဏိ ကိစ္စာနိ၊ သေယျထိဒံ – သမ္မာဒိဋ္ဌိ တာဝ အညေဟိပိ အတ္တနော ပစ္စနီကကိလေသေဟိ သဒ္ဓိံ မိစ္ဆာဒိဋ္ဌိံ ပဇဟတိ၊ အာရမ္မဏတော နိရောဓသစ္စံ သစ္ဆိကရောတိ၊ အသမ္မောဟတော သေသသစ္စာနိ ပဋိဝိဇ္ဈတိ. ဧဝံ သမ္မာသင်္ကပ္ပါဒီနံ မိစ္ဆာသင်္ကပ္ပပဇဟနာဒိဝသေန ယထာနုရူပန္တိ ကိစ္စတာ ဝေဒိတဗ္ဗာ. ဝိသေသတော ပနေတ္ထ သမ္မာသင်္ကပ္ပေါ သဟဇာတဓမ္မေ အဘိနိရောပေတိ၊ သမ္မာဝါစာ ပရိဂ္ဂဏှာတိ၊ သမ္မာကမ္မန္တော သမုဋ္ဌာပေတိ၊ သမ္မာအာဇီဝေါ ဝေါဒါပေတိ၊ သမ္မာဝါယာမော ပဂ္ဂဏှာတိ၊ သမ္မာသတိ ဥပဋ္ဌာပေတိ၊ သမ္မာသမာဓိ သမာဒဟတီတိ ဣဒမေတ္ထ ကိစ္စံ.

ဘေဒတော ပန ပုဗ္ဗဘာဂေ သမ္မာဒိဋ္ဌိ ‘‘ဒုက္ခေ ဉာဏ’’န္တိအာဒိနာ စတူသု သစ္စေသု ဉာဏဝသေန နာနက္ခဏာ နာနာရမ္မဏာ နာနာနာမာ ဟောတိ၊ ဒုတိယော ပန နေက္ခမ္မအဗျာပါဒအဝိဟိံသာသင်္ကပ္ပဝသေန၊ ဝိရတိယော စတုဗ္ဗိဓဝစီဒုစ္စရိတတိဝိဓကာယဒုစ္စရိတမိစ္ဆာဇီဝဝိရမဏသင်္ခါတစေတနာဝသေနပိ ဝိရတိဝသေနပိ၊ ဆဋ္ဌသတ္တမာ စတုဗ္ဗိဓသမ္မပ္ပဓာနသတိပဋ္ဌာနဝသေန နာနက္ခဏာ နာနာရမ္မဏာ နာနာနာမာ ဟောန္တိ. မဂ္ဂကာလေ ပနေတေ သမ္မာဒိဋ္ဌိအာဒယော ဧကက္ခဏာ ဧကာရမ္မဏာ. ကိစ္စတော ပန တာနိ ပုဗ္ဗဘာဂေ နာနာနာမာနိ လဘန္တိ၊ သမ္မာသမာဓိ ပန ပုဗ္ဗဘာဂေပိ မဂ္ဂက္ခဏေပိ စတုက္ကပဉ္စကဇ္ဈာနဝသေန နာနက္ခဏော နာနာနာမော၊ မဂ္ဂက္ခဏေ ပန ဧကာရမ္မဏော ဟောတိ. ဧကဿ ဟိ ပဌမမဂ္ဂေါ ပါဒကဇ္ဈာနာဒိနိယမတော ပဌမဇ္ဈာနာဒိကော ဝါ ဒုတိယဇ္ဈာနာဒီသု အညတရဇ္ဈာနိကော ဝါ၊ ဒုတိယမဂ္ဂါဒယောပိဿ ပဌမမဂ္ဂသဒိသဇ္ဈာနိကာ ဝါ ဝိသဒိသဇ္ဈာနိကာ ဝါတိ သော မဂ္ဂကာလေပိ နာနက္ခဏော နာနာနာမော ဝါတိ အယမေတ္ထ ဘေဒေါ.

ဘူမိတော စ ဝိဝေကတော စ ဝိနိစ္ဆယော ဗောဇ္ဈင်္ဂေသု ဝုတ္တာနုသာရေန ဝေဒိတဗ္ဗောတိ ဧဝံ ဝိဇာနီယော ပါဠိမုတ္တဝိနိစ္ဆယော.

မဂ္ဂင်္ဂဝိဘင်္ဂမာတိကတ္ထဝဏ္ဏနာ နိဋ္ဌိတာ.