၇. အာနာပါနဝဂ္ဂေါ

၁. အဋ္ဌိကမဟပ္ဖလသုတ္တံ

၂၃၈. သာဝတ္ထိနိဒါနံ. ‘‘အဋ္ဌိကသညာ၊ ဘိက္ခဝေ၊ ဘာဝိတာ ဗဟုလီကတာ မဟပ္ဖလာ ဟောတိ မဟာနိသံသာ. ကထံ ဘာဝိတာ စ၊ ဘိက္ခဝေ၊ အဋ္ဌိကသညာ ကထံ ဗဟုလီကတာ မဟပ္ဖလာ ဟောတိ မဟာနိသံသာ? ဣဓ၊ ဘိက္ခဝေ၊ ဘိက္ခု အဋ္ဌိကသညာသဟဂတံ သတိသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ။ပေ။ အဋ္ဌိကသညာသဟဂတံ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ဧဝံ ဘာဝိတာ ခေါ၊ ဘိက္ခဝေ၊ အဋ္ဌိကသညာ ဧဝံ ဗဟုလီကတာ မဟပ္ဖလာ ဟောတိ မဟာနိသံသာ’’တိ.

အညတရဖလသုတ္တံ

‘‘အဋ္ဌိကသညာယ၊ ဘိက္ခဝေ၊ ဘာဝိတာယ ဗဟုလီကတာယ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ. ကထံ ဘာဝိတာယ စ ခေါ၊ ဘိက္ခဝေ၊ အဋ္ဌိကသညာယ ကထံ ဗဟုလီကတာယ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ? ဣဓ၊ ဘိက္ခဝေ၊ ဘိက္ခု အဋ္ဌိကသညာသဟဂတံ သတိသမ္ဗောဇ္ဈင်္ဂံ ဘာဝေတိ။ပေ။ အဋ္ဌိကသညာသဟဂတံ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ဧဝံ ဘာဝိတာယ ခေါ၊ ဘိက္ခဝေ၊ အဋ္ဌိကသညာယ ဧဝံ ဗဟုလီကတာယ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ’’တိ.

မဟတ္ထသုတ္တံ

‘‘အဋ္ဌိကသညာ၊ ဘိက္ခဝေ၊ ဘာဝိတာ ဗဟုလီကတာ မဟတော အတ္ထာယ သံဝတ္တတိ. ကထံ ဘာဝိတာ စ၊ ဘိက္ခဝေ၊ အဋ္ဌိကသညာ ကထံ ဗဟုလီကတာ မဟတော အတ္ထာယ သံဝတ္တတိ? ဣဓ၊ ဘိက္ခဝေ၊ ဘိက္ခု အဋ္ဌိကသညာသဟဂတံ သတိသမ္ဗောဇ္ဈင်္ဂံ ဘာဝေတိ။ပေ။ အဋ္ဌိကသညာသဟဂတံ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ဧဝံ ဘာဝိတာ ခေါ၊ ဘိက္ခဝေ၊ အဋ္ဌိကသညာ ဧဝံ ဗဟုလီကတာ မဟတော အတ္ထာယ သံဝတ္တတီ’’တိ.

ယောဂက္ခေမသုတ္တံ

‘‘အဋ္ဌိကသညာ၊ ဘိက္ခဝေ၊ ဘာဝိတာ ဗဟုလီကတာ မဟတော ယောဂက္ခေမာယ သံဝတ္တတိ. ကထံ ဘာဝိတာ စ၊ ဘိက္ခဝေ၊ အဋ္ဌိကသညာ ကထံ ဗဟုလီကတာ မဟတော ယောဂက္ခေမာယ သံဝတ္တတိ? ဣဓ၊ ဘိက္ခဝေ၊ ဘိက္ခု အဋ္ဌိကသညာသဟဂတံ သတိသမ္ဗောဇ္ဈင်္ဂံ ဘာဝေတိ။ပေ။ အဋ္ဌိကသညာသဟဂတံ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ဧဝံ ဘာဝိတာ ခေါ၊ ဘိက္ခဝေ၊ အဋ္ဌိကသညာ ဧဝံ ဗဟုလီကတာ မဟတော ယောဂက္ခေမာယ သံဝတ္တတီ’’တိ.

သံဝေဂသုတ္တံ

‘‘အဋ္ဌိကသညာ၊ ဘိက္ခဝေ၊ ဘာဝိတာ ဗဟုလီကတာ မဟတော သံဝေဂါယ သံဝတ္တတိ. ကထံ ဘာဝိတာ စ၊ ဘိက္ခဝေ၊ အဋ္ဌိကသညာ ကထံ ဗဟုလီကတာ မဟတော သံဝေဂါယ သံဝတ္တတိ? ဣဓ၊ ဘိက္ခဝေ၊ ဘိက္ခု အဋ္ဌိကသညာသဟဂတံ သတိသမ္ဗောဇ္ဈင်္ဂံ ဘာဝေတိ။ပေ။ အဋ္ဌိကသညာသဟဂတံ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ဧဝံ ဘာဝိတာ ခေါ၊ ဘိက္ခဝေ၊ အဋ္ဌိကသညာ ဧဝံ ဗဟုလီကတာ မဟတော သံဝေဂါယ သံဝတ္တတီ’’တိ.

ဖာသုဝိဟာရသုတ္တံ

‘‘အဋ္ဌိကသညာ၊ ဘိက္ခဝေ၊ ဘာဝိတာ ဗဟုလီကတာ မဟတော ဖာသုဝိဟာရာယ သံဝတ္တတိ. ကထံ ဘာဝိတာ စ၊ ဘိက္ခဝေ၊ အဋ္ဌိကသညာ ကထံ ဗဟုလီကတာ မဟတော ဖာသုဝိဟာရာယ သံဝတ္တတိ? ဣဓ၊ ဘိက္ခဝေ၊ ဘိက္ခု အဋ္ဌိကသညာသဟဂတံ သတိသမ္ဗောဇ္ဈင်္ဂံ ဘာဝေတိ။ပေ။ အဋ္ဌိကသညာသဟဂတံ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ဧဝံ ဘာဝိတာ ခေါ၊ ဘိက္ခဝေ၊ အဋ္ဌိကသညာ ဧဝံ ဗဟုလီကတာ မဟတော ဖာသုဝိဟာရာယ သံဝတ္တတီ’’တိ. ပဌမံ.

၂. ပုဠဝကသုတ္တံ

၂၃၉. ‘‘ပုဠဝကသညာ [ပုဠုဝကသညာ (က.)]၊ ဘိက္ခဝေ၊ ဘာဝိတာ။ပေ။ ဒုတိယံ.

၃. ဝိနီလကသုတ္တံ

၂၄၀. ‘‘ဝိနီလကသညာ၊ ဘိက္ခဝေ။ပေ။ တတိယံ.

၄. ဝိစ္ဆိဒ္ဒကသုတ္တံ

၂၄၁. ‘‘ဝိစ္ဆိဒ္ဒကသညာ၊ ဘိက္ခဝေ။ပေ။ စတုတ္ထံ.

၅. ဥဒ္ဓုမာတကသုတ္တံ

၂၄၂. ‘‘ဥဒ္ဓုမာတကသညာ၊ ဘိက္ခဝေ။ပေ။ ပဉ္စမံ.

၆. မေတ္တာသုတ္တံ

၂၄၃. ‘‘မေတ္တာ၊ ဘိက္ခဝေ၊ ဘာဝိတာ။ပေ။ ဆဋ္ဌံ.

၇. ကရုဏာသုတ္တံ

၂၄၄. ‘‘ကရုဏာ၊ ဘိက္ခဝေ၊ ဘာဝိတာ။ပေ။ သတ္တမံ.

၈. မုဒိတာသုတ္တံ

၂၄၅. ‘‘မုဒိတာ၊ ဘိက္ခဝေ၊ ဘာဝိတာ။ပေ။ အဋ္ဌမံ.

၉. ဥပေက္ခာသုတ္တံ

၂၄၆. ‘‘ဥပေက္ခာ၊ ဘိက္ခဝေ၊ ဘာဝိတာ။ပေ။ နဝမံ.

၁၀. အာနာပါနသုတ္တံ

၂၄၇. ‘‘အာနာပါနဿတိ၊ ဘိက္ခဝေ၊ ဘာဝိတာ။ပေ။ ဒသမံ.

အာနာပါနဝဂ္ဂေါ သတ္တမော.

တဿုဒ္ဒါနံ –

အဋ္ဌိကပုဠဝကံ ဝိနီလကံ၊ ဝိစ္ဆိဒ္ဒကံ ဥဒ္ဓုမာတေန ပဉ္စမံ၊

မေတ္တာ ကရုဏာ မုဒိတာ ဥပေက္ခာ၊ အာနာပါနေန တေ ဒသာတိ.