၁. ဗောဓာယသုတ္တံ

၂၀၂. အထ ခေါ အညတရော ဘိက္ခု ယေန ဘဂဝါ တေနုပသင်္ကမိ။ပေ။ ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ –

‘‘‘ဗောဇ္ဈင်္ဂါ၊ ဗောဇ္ဈင်္ဂါ’တိ၊ ဘန္တေ၊ ဝုစ္စန္တိ. ကိတ္တာဝတာ နု ခေါ၊ ဘန္တေ၊ ‘ဗောဇ္ဈင်္ဂါ’တိ ဝုစ္စန္တီ’’တိ? ‘‘‘ဗောဓာယ သံဝတ္တန္တီ’တိ ခေါ၊ ဘိက္ခု၊ တသ္မာ ဗောဇ္ဈင်္ဂါတိ ဝုစ္စန္တိ. ဣဓ၊ ဘိက္ခု၊ သတိသမ္ဗောဇ္ဈင်္ဂံ ဘာဝေတိ ဝိဝေကနိဿိတံ။ပေ။ ဥပေက္ခာသမ္ဗောဇ္ဈင်္ဂံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါဿဂ္ဂပရိဏာမိံ. ‘ဗောဓာယ သံဝတ္တန္တီ’တိ ခေါ၊ ဘိက္ခု၊ တသ္မာ ‘ဗောဇ္ဈင်္ဂါ’တိ ဝုစ္စန္တီ’’တိ. ပဌမံ.