၃. ပဌမသံဘေဇ္ဇသုတ္တံ

၁၁၂၃. ‘‘သေယျထာပိ၊ ဘိက္ခဝေ၊ ယတ္ထိမာ မဟာနဒိယော သံသန္ဒန္တိ သမေန္တိ၊ သေယျထိဒံ – ဂင်္ဂါ၊ ယမုနာ၊ အစိရဝတီ၊ သရဘူ၊ မဟီ၊ တတော ပုရိသော ဒွေ ဝါ တီဏိ ဝါ ဥဒကဖုသိတာနိ ဥဒ္ဓရေယျ. တံ ကိံ မညထ၊ ဘိက္ခဝေ ကတမံ နု ခေါ ဗဟုတရံ – ယာနိ ဒွေ ဝါ တီဏိ ဝါ ဥဒကဖုသိတာနိ ဥဗ္ဘတာနိ၊ ယံ ဝါ သံဘေဇ္ဇဥဒက’’န္တိ? ‘‘ဧတဒေဝ၊ ဘန္တေ၊ ဗဟုတရံ၊ ယဒိဒံ – သံဘေဇ္ဇဥဒကံ၊ အပ္ပမတ္တကာနိ ဒွေ ဝါ တီဏိ ဝါ ဥဒကဖုသိတာနိ ဥဗ္ဘတာနိ. သင်္ခမ္ပိ န ဥပေန္တိ၊ ဥပနိဓမ္ပိ န ဥပေန္တိ၊ ကလဘာဂမ္ပိ န ဥပေန္တိ သံဘေဇ္ဇဥဒကံ ဥပနိဓာယ ဒွေ ဝါ တီဏိ ဝါ ဥဒကဖုသိတာနိ ဥဗ္ဘတာနီ’’တိ. ‘‘ဧဝမေဝ ခေါ၊ ဘိက္ခဝေ၊ အရိယသာဝကဿ။ပေ။ ယောဂေါ ကရဏီယော’’တိ. တတိယံ.