၇. ဝိတက္ကသုတ္တံ

၁၀၇၇. ‘‘မာ၊ ဘိက္ခဝေ၊ ပါပကေ အကုသလေ ဝိတက္ကေ ဝိတက္ကေယျာထ [ဝိတက္ကေထ (သီ. သျာ. ကံ.)]၊ သေယျထိဒံ – ကာမဝိတက္ကံ၊ ဗျာပါဒဝိတက္ကံ၊ ဝိဟိံသာဝိတက္ကံ. တံ ကိဿ ဟေတု? နေတေ၊ ဘိက္ခဝေ၊ ဝိတက္ကာ အတ္ထသံဟိတာ နာဒိဗြဟ္မစရိယကာ န နိဗ္ဗိဒါယ န ဝိရာဂါယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တန္တိ.

‘‘ဝိတက္ကေန္တာ စ ခေါ တုမှေ၊ ဘိက္ခဝေ၊ ‘ဣဒံ ဒုက္ခ’န္တိ ဝိတက္ကေယျာထ၊ ‘အယံ ဒုက္ခသမုဒယော’တိ ဝိတက္ကေယျာထ၊ ‘အယံ ဒုက္ခနိရောဓော’တိ ဝိတက္ကေယျာထ၊ ‘အယံ ဒုက္ခနိရောဓဂါမိနီ ပဋိပဒါ’တိ ဝိတက္ကေယျာထ. တံ ကိဿ ဟေတု? ဧတေ၊ ဘိက္ခဝေ၊ ဝိတက္ကာ အတ္ထသံဟိတာ ဧတေ အာဒိဗြဟ္မစရိယကာ ဧတေ နိဗ္ဗိဒါယ ဝိရာဂါယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တန္တိ.

‘‘တသ္မာတိဟ၊ ဘိက္ခဝေ၊ ‘ဣဒံ ဒုက္ခ’န္တိ ယောဂေါ ကရဏီယော။ပေ။ ‘အယံ ဒုက္ခနိရောဓဂါမိနီ ပဋိပဒါ’တိ ယောဂေါ ကရဏီယော’’တိ. သတ္တမံ.