၂. ဗြာဟ္မဏသုတ္တံ

၁၀၀၈. သာဝတ္ထိနိဒါနံ. ‘‘ဗြာဟ္မဏာ၊ ဘိက္ခဝေ၊ ဥဒယဂါမိနိံ နာမ ပဋိပဒံ ပညပေန္တိ. တေ သာဝကံ ဧဝံ သမာဒပေန္တိ – ‘ဧဟိ တွံ၊ အမ္ဘော ပုရိသ၊ ကာလဿေဝ ဥဋ္ဌာယ ပါစီနမုခေါ ယာဟိ. သော တွံ မာ သောဗ္ဘံ ပရိဝဇ္ဇေဟိ၊ မာ ပပါတံ၊ မာ ခါဏုံ၊ မာ ကဏ္ဍကဌာနံ [ကဏ္ဍကံ ဌာနံ (ပီ. က.)]၊ မာ စန္ဒနိယံ၊ မာ ဩဠိဂလ္လံ. ယတ္ထ [ယတ္ထေဝ (သျာ. ကံ.)၊ ယာနိ ဝါ (သီ.)] ပပတေယျာသိ တတ္ထေဝ မရဏံ အာဂမေယျာသိ. ဧဝံ တွံ၊ အမ္ဘော ပုရိသ၊ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇိဿသီ’’’တိ.

‘‘တံ ခေါ ပနေတံ၊ ဘိက္ခဝေ၊ ဗြာဟ္မဏာနံ ဗာလဂမနမေတံ [ဗာလာနံ ဂမနမေတံ (သီ.)] မူဠှဂမနမေတံ န နိဗ္ဗိဒါယ န ဝိရာဂါယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တတိ. အဟဉ္စ ခေါ၊ ဘိက္ခဝေ၊ အရိယဿ ဝိနယေ ဥဒယဂါမိနိံ ပဋိပဒံ ပညပေမိ၊ ယာ ဧကန္တနိဗ္ဗိဒါယ ဝိရာဂါယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တတိ.

‘‘ကတမာ စ သာ၊ ဘိက္ခဝေ၊ ဥဒယဂါမိနီ ပဋိပဒါ၊ ယာ ဧကန္တနိဗ္ဗိဒါယ။ပေ။ နိဗ္ဗာနာယ သံဝတ္တတိ? ဣဓ၊ ဘိက္ခဝေ၊ အရိယသာဝကော ဗုဒ္ဓေ အဝေစ္စပ္ပသာဒေန သမန္နာဂတော ဟောတိ – ဣတိပိ သော ဘဂဝါ အရဟံ သမ္မာသမ္ဗုဒ္ဓေါ။ပေ။ သတ္ထာ ဒေဝမနုဿာနံ ဗုဒ္ဓေါ ဘဂဝါတိ၊ ဓမ္မေ။ပေ။ သံဃေ။ပေ။ အရိယကန္တေဟိ သီလေဟိ သမန္နာဂတော ဟောတိ အခဏ္ဍေဟိ။ပေ။ သမာဓိသံဝတ္တနိကေဟိ. အယံ ခေါ သာ၊ ဘိက္ခဝေ၊ ဥဒယဂါမိနီ ပဋိပဒါ ဧကန္တနိဗ္ဗိဒါယ။ပေ။ နိဗ္ဗာနာယ သံဝတ္တတီ’’တိ. ဒုတိယံ.