၅. ဒုတိယသာရိပုတ္တသုတ္တံ

၁၀၀၁. အထ ခေါ အာယသ္မာ သာရိပုတ္တော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အာယသ္မန္တံ သာရိပုတ္တံ ဘဂဝါ ဧတဒဝေါစ – ‘‘‘သောတာပတ္တိယင်္ဂံ၊ သောတာပတ္တိယင်္ဂ’န္တိ ဟိဒံ၊ သာရိပုတ္တ၊ ဝုစ္စတိ. ကတမံ နု ခေါ သာရိပုတ္တ၊ သောတာပတ္တိယင်္ဂ’’န္တိ? ‘‘သပ္ပုရိသသံသေဝေါ ဟိ၊ ဘန္တေ၊ သောတာပတ္တိယင်္ဂံ၊ သဒ္ဓမ္မဿဝနံ သောတာပတ္တိယင်္ဂံ၊ ယောနိသောမနသိကာရော သောတာပတ္တိယင်္ဂံ၊ ဓမ္မာနုဓမ္မပ္ပဋိပတ္တိ သောတာပတ္တိယင်္ဂ’’န္တိ. ‘‘သာဓု သာဓု၊ သာရိပုတ္တ! သပ္ပုရိသသံသေဝေါ ဟိ၊ သာရိပုတ္တ၊ သောတာပတ္တိယင်္ဂံ၊ သဒ္ဓမ္မဿဝနံ သောတာပတ္တိယင်္ဂံ၊ ယောနိသောမနသိကာရော သောတာပတ္တိယင်္ဂံ၊ ဓမ္မာနုဓမ္မပ္ပဋိပတ္တိ သောတာပတ္တိယင်္ဂံ’’.

‘‘‘သောတော၊ သောတော’တိ ဟိဒံ၊ သာရိပုတ္တ၊ ဝုစ္စတိ. ကတမော နု ခေါ၊ သာရိပုတ္တ၊ သောတော’’တိ? ‘‘အယမေဝ ဟိ၊ ဘန္တေ၊ အရိယော အဋ္ဌင်္ဂိကော မဂ္ဂေါ သောတော၊ သေယျထိဒံ – သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါစာ၊ သမ္မာကမ္မန္တော၊ သမ္မာအာဇီဝေါ၊ သမ္မာဝါယာမော၊ သမ္မာသတိ၊ သမ္မာသမာဓီ’’တိ. ‘‘သာဓု သာဓု၊ သာရိပုတ္တ! အယမေဝ ဟိ၊ သာရိပုတ္တ၊ အရိယော အဋ္ဌင်္ဂိကော မဂ္ဂေါ သောတော၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ’’.

‘‘‘သောတာပန္နော၊ သောတာပန္နော’တိ ဟိဒံ၊ သာရိပုတ္တ၊ ဝုစ္စတိ. ကတမော နု ခေါ၊ သာရိပုတ္တ၊ သောတာပန္နော’’တိ? ‘‘ယော ဟိ၊ ဘန္တေ၊ ဣမိနာ အရိယေန အဋ္ဌင်္ဂိကေန မဂ္ဂေန သမန္နာဂတော အယံ ဝုစ္စတိ သောတာပန္နော၊ သွာယံ အာယသ္မာ ဧဝံနာမော ဧဝံဂေါတ္တော’’တိ. ‘‘သာဓု သာဓု၊ သာရိပုတ္တ! ယော ဟိ၊ သာရိပုတ္တ၊ ဣမိနာ အရိယေန အဋ္ဌင်္ဂိကေန မဂ္ဂေန သမန္နာဂတော အယံ ဝုစ္စတိ သောတာပန္နော၊ သွာယံ အာယသ္မာ ဧဝံနာမော ဧဝံဂေါတ္တော’’တိ. ပဉ္စမံ.