၂. ဒုတိယပဋိပတ္တိသုတ္တံ

၃၂. သာဝတ္ထိနိဒါနံ. ‘‘မိစ္ဆာပဋိပန္နဉ္စ ဝေါ၊ ဘိက္ခဝေ၊ ဒေသေဿာမိ၊ သမ္မာပဋိပန္နဉ္စ. တံ သုဏာထ. ကတမော စ၊ ဘိက္ခဝေ၊ မိစ္ဆာပဋိပန္နော? ဣဓ၊ ဘိက္ခဝေ၊ ဧကစ္စော မိစ္ဆာဒိဋ္ဌိကော ဟောတိ။ပေ။ မိစ္ဆာသမာဓိ – အယံ ဝုစ္စတိ၊ ဘိက္ခဝေ၊ မိစ္ဆာပဋိပန္နော. ကတမော စ၊ ဘိက္ခဝေ၊ သမ္မာပဋိပန္နော? ဣဓ၊ ဘိက္ခဝေ၊ ဧကစ္စော သမ္မာဒိဋ္ဌိကော ဟောတိ။ပေ။ သမ္မာသမာဓိ – အယံ ဝုစ္စတိ၊ ဘိက္ခဝေ၊ သမ္မာပဋိပန္နော’’တိ. ဒုတိယံ.