၄. ပဋိပတ္တိဝဂ္ဂေါ

၁. ပဌမပဋိပတ္တိသုတ္တံ

၃၁. သာဝတ္ထိနိဒါနံ. ‘‘မိစ္ဆာပဋိပတ္တိဉ္စ ဝေါ၊ ဘိက္ခဝေ၊ ဒေသေဿာမိ၊ သမ္မာပဋိပတ္တိဉ္စ. တံ သုဏာထ. ကတမာ စ၊ ဘိက္ခဝေ၊ မိစ္ဆာပဋိပတ္တိ? သေယျထိဒံ – မိစ္ဆာဒိဋ္ဌိ။ပေ။ မိစ္ဆာသမာဓိ. အယံ ဝုစ္စတိ၊ ဘိက္ခဝေ၊ မိစ္ဆာပဋိပတ္တိ. ကတမာ စ၊ ဘိက္ခဝေ၊ သမ္မာပဋိပတ္တိ? သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. အယံ ဝုစ္စတိ၊ ဘိက္ခဝေ၊ သမ္မာပဋိပတ္တီ’’တိ. ပဌမံ.

၂. ဒုတိယပဋိပတ္တိသုတ္တံ

၃၂. သာဝတ္ထိနိဒါနံ. ‘‘မိစ္ဆာပဋိပန္နဉ္စ ဝေါ၊ ဘိက္ခဝေ၊ ဒေသေဿာမိ၊ သမ္မာပဋိပန္နဉ္စ. တံ သုဏာထ. ကတမော စ၊ ဘိက္ခဝေ၊ မိစ္ဆာပဋိပန္နော? ဣဓ၊ ဘိက္ခဝေ၊ ဧကစ္စော မိစ္ဆာဒိဋ္ဌိကော ဟောတိ။ပေ။ မိစ္ဆာသမာဓိ – အယံ ဝုစ္စတိ၊ ဘိက္ခဝေ၊ မိစ္ဆာပဋိပန္နော. ကတမော စ၊ ဘိက္ခဝေ၊ သမ္မာပဋိပန္နော? ဣဓ၊ ဘိက္ခဝေ၊ ဧကစ္စော သမ္မာဒိဋ္ဌိကော ဟောတိ။ပေ။ သမ္မာသမာဓိ – အယံ ဝုစ္စတိ၊ ဘိက္ခဝေ၊ သမ္မာပဋိပန္နော’’တိ. ဒုတိယံ.

၃. ဝိရဒ္ဓသုတ္တံ

၃၃. သာဝတ္ထိနိဒါနံ. ‘‘ယေသံ ကေသဉ္စိ၊ ဘိက္ခဝေ၊ အရိယော အဋ္ဌင်္ဂိကော မဂ္ဂေါ ဝိရဒ္ဓေါ၊ ဝိရဒ္ဓေါ တေသံ အရိယော အဋ္ဌင်္ဂိကော မဂ္ဂေါ သမ္မာ ဒုက္ခက္ခယဂါမီ. ယေသံ ကေသဉ္စိ၊ ဘိက္ခဝေ၊ အရိယော အဋ္ဌင်္ဂိကော မဂ္ဂေါ အာရဒ္ဓေါ၊ အာရဒ္ဓေါ တေသံ အရိယော အဋ္ဌင်္ဂိကော မဂ္ဂေါ သမ္မာ ဒုက္ခက္ခယဂါမီ. ကတမော စ၊ ဘိက္ခဝေ၊ အရိယော အဋ္ဌင်္ဂိကော မဂ္ဂေါ? သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ယေသံ ကေသဉ္စိ၊ ဘိက္ခဝေ၊ အယံ အရိယော အဋ္ဌင်္ဂိကော မဂ္ဂေါ ဝိရဒ္ဓေါ၊ ဝိရဒ္ဓေါ တေသံ အရိယော အဋ္ဌင်္ဂိကော မဂ္ဂေါ သမ္မာ ဒုက္ခက္ခယဂါမီ. ယေသံ ကေသဉ္စိ၊ ဘိက္ခဝေ၊ အယံ အရိယော အဋ္ဌင်္ဂိကော မဂ္ဂေါ အာရဒ္ဓေါ၊ အာရဒ္ဓေါ တေသံ အရိယော အဋ္ဌင်္ဂိကော မဂ္ဂေါ သမ္မာ ဒုက္ခက္ခယဂါမီ’’တိ. တတိယံ.

၄. ပါရင်္ဂမသုတ္တံ

၃၄. သာဝတ္ထိနိဒါနံ. ‘‘အဋ္ဌိမေ၊ ဘိက္ခဝေ၊ ဓမ္မာ ဘာဝိတာ ဗဟုလီကတာ အပါရာ ပါရံ ဂမနာယ သံဝတ္တန္တိ. ကတမေ အဋ္ဌ? သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣမေ ခေါ၊ ဘိက္ခဝေ၊ အဋ္ဌ ဓမ္မာ ဘာဝိတာ ဗဟုလီကတာ အပါရာ ပါရံ ဂမနာယ သံဝတ္တန္တီ’’တိ.

ဣဒမဝေါစ ဘဂဝါ. ဣဒံ ဝတွာန သုဂတော အထာပရံ ဧတဒဝေါစ သတ္ထာ –

‘‘အပ္ပကာ တေ မနုဿေသု၊ ယေ ဇနာ ပါရဂါမိနော၊

အထာယံ ဣတရာ ပဇာ၊ တီရမေဝါနုဓာဝတိ.

‘‘ယေ စ ခေါ သမ္မဒက္ခာတေ၊ ဓမ္မေ ဓမ္မာနုဝတ္တိနော၊

တေ ဇနာ ပါရမေဿန္တိ၊ မစ္စုဓေယျံ သုဒုတ္တရံ.

‘‘ကဏှံ ဓမ္မံ ဝိပ္ပဟာယ၊ သုက္ကံ ဘာဝေထ ပဏ္ဍိတော၊

ဩကာ အနောကမာဂမ္မ၊ ဝိဝေကေ ယတ္ထ ဒူရမံ.

‘‘တတြာဘိရတိမိစ္ဆေယျ၊ ဟိတွာ ကာမေ အကိဉ္စနော၊

ပရိယောဒပေယျ အတ္တာနံ၊ စိတ္တက္လေသေဟိ ပဏ္ဍိတော.

‘‘ယေသံ သမ္ဗောဓိယင်္ဂေသု၊ သမ္မာ စိတ္တံ သုဘာဝိတံ၊

အာဒါနပဋိနိဿဂ္ဂေ၊ အနုပါဒါယ ယေ ရတာ၊

ခီဏာသဝါ ဇုတိမန္တော၊ တေ လောကေ ပရိနိဗ္ဗုတာ’’တိ. စတုတ္ထံ၊

၅. ပဌမသာမညသုတ္တံ

၃၅. သာဝတ္ထိနိဒါနံ. ‘‘သာမညဉ္စ ဝေါ၊ ဘိက္ခဝေ၊ ဒေသေဿာမိ၊ သာမညဖလာနိ စ. တံ သုဏာထ. ကတမဉ္စ၊ ဘိက္ခဝေ၊ သာမညံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ သာမညံ. ကတမာနိ စ၊ ဘိက္ခဝေ၊ သာမညဖလာနိ? သောတာပတ္တိဖလံ၊ သကဒါဂါမိဖလံ၊ အနာဂါမိဖလံ၊ အရဟတ္တဖလံ – ဣမာနိ ဝုစ္စန္တိ၊ ဘိက္ခဝေ၊ သာမညဖလာနီ’’တိ. ပဉ္စမံ.

၆. ဒုတိယသာမညသုတ္တံ

၃၆. သာဝတ္ထိနိဒါနံ. ‘‘သာမညဉ္စ ဝေါ၊ ဘိက္ခဝေ၊ ဒေသေဿာမိ၊ သာမညတ္ထဉ္စ. တံ သုဏာထ. ကတမဉ္စ ခေါ၊ ဘိက္ခဝေ၊ သာမညံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ သာမညံ. ကတမော စ၊ ဘိက္ခဝေ၊ သာမညတ္ထော? ယော ခေါ၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – အယံ ဝုစ္စတိ၊ ဘိက္ခဝေ၊ သာမညတ္ထော’’တိ. ဆဋ္ဌံ.

၇. ပဌမဗြဟ္မညသုတ္တံ

၃၇. သာဝတ္ထိနိဒါနံ. ‘‘ဗြဟ္မညဉ္စ ဝေါ၊ ဘိက္ခဝေ၊ ဒေသေဿာမိ၊ ဗြဟ္မညဖလာနိ စ. တံ သုဏာထ. ကတမဉ္စ ခေါ၊ ဘိက္ခဝေ၊ ဗြဟ္မညံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ ဗြဟ္မညံ. ကတမာနိ စ၊ ဘိက္ခဝေ၊ ဗြဟ္မညဖလာနိ? သောတာပတ္တိဖလံ၊ သကဒါဂါမိဖလံ၊ အနာဂါမိဖလံ၊ အရဟတ္တဖလံ – ဣမာနိ ဝုစ္စန္တိ၊ ဘိက္ခဝေ၊ ဗြဟ္မညဖလာနီ’’တိ. သတ္တမံ.

၈. ဒုတိယဗြဟ္မညသုတ္တံ

၃၈. သာဝတ္ထိနိဒါနံ. ‘‘ဗြဟ္မညဉ္စ ဝေါ၊ ဘိက္ခဝေ၊ ဒေသေဿာမိ၊ ဗြဟ္မညတ္ထဉ္စ. တံ သုဏာထ. ကတမဉ္စ၊ ဘိက္ခဝေ၊ ဗြဟ္မညံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ ဗြဟ္မညံ. ကတမော စ၊ ဘိက္ခဝေ၊ ဗြဟ္မညတ္ထော? ယော ခေါ၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – အယံ ဝုစ္စတိ၊ ဘိက္ခဝေ၊ ဗြဟ္မညတ္ထော’’တိ. အဋ္ဌမံ.

၉. ပဌမဗြဟ္မစရိယသုတ္တံ

၃၉. သာဝတ္ထိနိဒါနံ. ‘‘ဗြဟ္မစရိယဉ္စ ဝေါ၊ ဘိက္ခဝေ၊ ဒေသေဿာမိ၊ ဗြဟ္မစရိယဖလာနိ စ. တံ သုဏာထ. ကတမဉ္စ၊ ဘိက္ခဝေ၊ ဗြဟ္မစရိယံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ ဗြဟ္မစရိယံ. ကတမာနိ စ၊ ဘိက္ခဝေ၊ ဗြဟ္မစရိယဖလာနိ? သောတာပတ္တိဖလံ၊ သကဒါဂါမိဖလံ၊ အနာဂါမိဖလံ၊ အရဟတ္တဖလံ – ဣမာနိ ဝုစ္စန္တိ၊ ဘိက္ခဝေ၊ ဗြဟ္မစရိယဖလာနီ’’တိ. နဝမံ.

၁၀. ဒုတိယဗြဟ္မစရိယသုတ္တံ

၄၀. သာဝတ္ထိနိဒါနံ. ‘‘ဗြဟ္မစရိယဉ္စ ဝေါ၊ ဘိက္ခဝေ၊ ဒေသေဿာမိ၊ ဗြဟ္မစရိယတ္ထဉ္စ. တံ သုဏာထ. ကတမဉ္စ၊ ဘိက္ခဝေ၊ ဗြဟ္မစရိယံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ ဗြဟ္မစရိယံ. ကတမော စ၊ ဘိက္ခဝေ၊ ဗြဟ္မစရိယတ္ထော? ယော ခေါ၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – အယံ ဝုစ္စတိ၊ ဘိက္ခဝေ၊ ဗြဟ္မစရိယတ္ထော’’တိ. ဒသမံ.

ပဋိပတ္တိဝဂ္ဂေါ စတုတ္ထော.

တဿုဒ္ဒါနံ –

ပဋိပတ္တိ ပဋိပန္နော စ၊ ဝိရဒ္ဓဉ္စ ပါရံဂမာ၊

သာမညေန စ ဒွေ ဝုတ္တာ၊ ဗြဟ္မညာ အပရေ ဒုဝေ၊

ဗြဟ္မစရိယေန ဒွေ ဝုတ္တာ၊ ဝဂ္ဂေါ တေန ပဝုစ္စတီတိ.