၁၀. ဒုတိယဗြဟ္မစရိယသုတ္တံ

၄၀. သာဝတ္ထိနိဒါနံ. ‘‘ဗြဟ္မစရိယဉ္စ ဝေါ၊ ဘိက္ခဝေ၊ ဒေသေဿာမိ၊ ဗြဟ္မစရိယတ္ထဉ္စ. တံ သုဏာထ. ကတမဉ္စ၊ ဘိက္ခဝေ၊ ဗြဟ္မစရိယံ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. ဣဒံ ဝုစ္စတိ၊ ဘိက္ခဝေ၊ ဗြဟ္မစရိယံ. ကတမော စ၊ ဘိက္ခဝေ၊ ဗြဟ္မစရိယတ္ထော? ယော ခေါ၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – အယံ ဝုစ္စတိ၊ ဘိက္ခဝေ၊ ဗြဟ္မစရိယတ္ထော’’တိ. ဒသမံ.

ပဋိပတ္တိဝဂ္ဂေါ စတုတ္ထော.

တဿုဒ္ဒါနံ –

ပဋိပတ္တိ ပဋိပန္နော စ၊ ဝိရဒ္ဓဉ္စ ပါရံဂမာ၊

သာမညေန စ ဒွေ ဝုတ္တာ၊ ဗြဟ္မညာ အပရေ ဒုဝေ၊

ဗြဟ္မစရိယေန ဒွေ ဝုတ္တာ၊ ဝဂ္ဂေါ တေန ပဝုစ္စတီတိ.