၁. ကာယဂတာသတိသုတ္တံ

၃၆၆. သာဝတ္ထိနိဒါနံ. ‘‘အသင်္ခတဉ္စ ဝေါ၊ ဘိက္ခဝေ၊ ဒေသေဿာမိ အသင်္ခတဂါမိဉ္စ မဂ္ဂံ. တံ သုဏာထ. ကတမဉ္စ၊ ဘိက္ခဝေ၊ အသင်္ခတံ? ယော၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – ဣဒံ ဝုစ္စတိ၊ ဘိက္ခဝေ၊ အသင်္ခတံ. ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? ကာယဂတာသတိ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ’’.

‘‘ဣတိ ခေါ၊ ဘိက္ခဝေ၊ ဒေသိတံ ဝေါ မယာ အသင်္ခတံ၊ ဒေသိတော အသင်္ခတဂါမိမဂ္ဂေါ. ယံ၊ ဘိက္ခဝေ၊ သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပါဒါယ၊ ကတံ ဝေါ တံ မယာ. ဧတာနိ၊ ဘိက္ခဝေ၊ ရုက္ခမူလာနိ၊ ဧတာနိ သုညာဂါရာနိ. ဈာယထ [နိဇ္ဈာယထ (က.)]၊ ဘိက္ခဝေ၊ မာ ပမာဒတ္ထ၊ မာ ပစ္ဆာ ဝိပ္ပဋိသာရိနော အဟုဝတ္ထ. အယံ ဝေါ အမှာကံ အနုသာသနီ’’တိ. ပဌမံ.