၁. ပဌမဝဂ္ဂေါ

၁. ကာယဂတာသတိသုတ္တံ

၃၆၆. သာဝတ္ထိနိဒါနံ. ‘‘အသင်္ခတဉ္စ ဝေါ၊ ဘိက္ခဝေ၊ ဒေသေဿာမိ အသင်္ခတဂါမိဉ္စ မဂ္ဂံ. တံ သုဏာထ. ကတမဉ္စ၊ ဘိက္ခဝေ၊ အသင်္ခတံ? ယော၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – ဣဒံ ဝုစ္စတိ၊ ဘိက္ခဝေ၊ အသင်္ခတံ. ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? ကာယဂတာသတိ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ’’.

‘‘ဣတိ ခေါ၊ ဘိက္ခဝေ၊ ဒေသိတံ ဝေါ မယာ အသင်္ခတံ၊ ဒေသိတော အသင်္ခတဂါမိမဂ္ဂေါ. ယံ၊ ဘိက္ခဝေ၊ သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပါဒါယ၊ ကတံ ဝေါ တံ မယာ. ဧတာနိ၊ ဘိက္ခဝေ၊ ရုက္ခမူလာနိ၊ ဧတာနိ သုညာဂါရာနိ. ဈာယထ [နိဇ္ဈာယထ (က.)]၊ ဘိက္ခဝေ၊ မာ ပမာဒတ္ထ၊ မာ ပစ္ဆာ ဝိပ္ပဋိသာရိနော အဟုဝတ္ထ. အယံ ဝေါ အမှာကံ အနုသာသနီ’’တိ. ပဌမံ.

၂. သမထဝိပဿနာသုတ္တံ

၃၆၇. ‘‘အသင်္ခတဉ္စ ဝေါ၊ ဘိက္ခဝေ၊ ဒေသေဿာမိ အသင်္ခတဂါမိဉ္စ မဂ္ဂံ. တံ သုဏာထ. ကတမဉ္စ၊ ဘိက္ခဝေ၊ အသင်္ခတံ? ယော၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – ဣဒံ ဝုစ္စတိ၊ ဘိက္ခဝေ၊ အသင်္ခတံ. ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? သမထော စ ဝိပဿနာ စ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. ဒုတိယံ.

၃. သဝိတက္ကသဝိစာရသုတ္တံ

၃၆၈. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? သဝိတက္ကသဝိစာရော သမာဓိ၊ အဝိတက္ကဝိစာရမတ္တော သမာဓိ၊ အဝိတက္ကအဝိစာရော သမာဓိ – အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. တတိယံ.

၄. သုညတသမာဓိသုတ္တံ

၃၆၉. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? သုညတော သမာဓိ၊ အနိမိတ္တော သမာဓိ၊ အပ္ပဏိဟိတော သမာဓိ – အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. စတုတ္ထံ.

၅. သတိပဋ္ဌာနသုတ္တံ

၃၇၀. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? စတ္တာရော သတိပဋ္ဌာနာ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. ပဉ္စမံ.

၆. သမ္မပ္ပဓာနသုတ္တံ

၃၇၁. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? စတ္တာရော သမ္မပ္ပဓာနာ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. ဆဋ္ဌံ.

၇. ဣဒ္ဓိပါဒသုတ္တံ

၃၇၂. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? စတ္တာရော ဣဒ္ဓိပါဒါ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. သတ္တမံ.

၈. ဣန္ဒြိယသုတ္တံ

၃၇၃. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? ပဉ္စိန္ဒြိယာနိ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. အဋ္ဌမံ.

၉. ဗလသုတ္တံ

၃၇၄. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? ပဉ္စ ဗလာနိ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. နဝမံ.

၁၀. ဗောဇ္ဈင်္ဂသုတ္တံ

၃၇၅. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? သတ္တ ဗောဇ္ဈင်္ဂါ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ။ပေ။. ဒသမံ.

၁၁. မဂ္ဂင်္ဂသုတ္တံ

၃၇၆. ‘‘ကတမော စ၊ ဘိက္ခဝေ၊ အသင်္ခတဂါမိမဂ္ဂေါ? အရိယော အဋ္ဌင်္ဂိကော မဂ္ဂေါ. အယံ ဝုစ္စတိ၊ ဘိက္ခဝေ၊ အသင်္ခတဂါမိမဂ္ဂေါ. ဣတိ ခေါ၊ ဘိက္ခဝေ၊ ဒေသိတံ ဝေါ မယာ အသင်္ခတံ၊ ဒေသိတော အသင်္ခတဂါမိမဂ္ဂေါ. ယံ၊ ဘိက္ခဝေ၊ သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပါဒါယ ကတံ ဝေါ တံ မယာ. ဧတာနိ၊ ဘိက္ခဝေ၊ ရုက္ခမူလာနိ၊ ဧတာနိ သုညာဂါရာနိ. ဈာယထ၊ ဘိက္ခဝေ၊ မာ ပမာဒတ္ထ၊ မာ ပစ္ဆာ ဝိပ္ပဋိသာရိနော အဟုဝတ္ထ. အယံ ဝေါ အမှာကံ အနုသာသနီ’’တိ. ဧကာဒသမံ.

ပဌမော ဝဂ္ဂေါ.

တဿုဒ္ဒါနံ –

ကာယော သမထော သဝိတက္ကော၊ သုညတော သတိပဋ္ဌာနာ၊

သမ္မပ္ပဓာနာ ဣဒ္ဓိပါဒါ၊ ဣန္ဒြိယဗလဗောဇ္ဈင်္ဂါ၊

မဂ္ဂေန ဧကာဒသမံ၊ တဿုဒ္ဒါနံ ပဝုစ္စတိ.