၇. ခေတ္တူပမသုတ္တံ

၃၅၉. ဧကံ သမယံ ဘဂဝါ နာဠန္ဒာယံ ဝိဟရတိ ပါဝါရိကမ္ဗဝနေ. အထ ခေါ အသိဗန္ဓကပုတ္တော ဂါမဏိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အသိဗန္ဓကပုတ္တော ဂါမဏိ ဘဂဝန္တံ ဧတဒဝေါစ – ‘‘နနု၊ ဘန္တေ၊ ဘဂဝါ သဗ္ဗပါဏဘူတဟိတာနုကမ္ပီ ဝိဟရတီ’’တိ? ‘‘ဧဝံ၊ ဂါမဏိ၊ တထာဂတော သဗ္ဗပါဏဘူတဟိတာနုကမ္ပီ ဝိဟရတီ’’တိ. ‘‘အထ ကိဉ္စရဟိ၊ ဘန္တေ၊ ဘဂဝါ ဧကစ္စာနံ သက္ကစ္စံ ဓမ္မံ ဒေသေတိ၊ ဧကစ္စာနံ နော တထာ သက္ကစ္စံ ဓမ္မံ ဒေသေတီ’’တိ? ‘‘တေန ဟိ၊ ဂါမဏိ၊ တညေဝေတ္ထ ပဋိပုစ္ဆိဿာမိ. ယထာ တေ ခမေယျ တထာ နံ ဗျာကရေယျာသိ. တံ ကိံ မညသိ၊ ဂါမဏိ၊ ဣဓဿု [ဣဓ (သီ. သျာ. ကံ. ပီ.)] ကဿကဿ ဂဟပတိနော တီဏိ ခေတ္တာနိ – ဧကံ ခေတ္တံ အဂ္ဂံ၊ ဧကံ ခေတ္တံ မဇ္ဈိမံ၊ ဧကံ ခေတ္တံ ဟီနံ ဇင်္ဂလံ ဦသရံ ပါပဘူမိ. တံ ကိံ မညသိ၊ ဂါမဏိ၊ အသု ကဿကော ဂဟပတိ ဗီဇာနိ ပတိဋ္ဌာပေတုကာမော ကတ္ထ ပဌမံ ပတိဋ္ဌာပေယျ၊ ယံ ဝါ အဒုံ ခေတ္တံ အဂ္ဂံ၊ ယံ ဝါ အဒုံ ခေတ္တံ မဇ္ဈိမံ၊ ယံ ဝါ အဒုံ ခေတ္တံ ဟီနံ ဇင်္ဂလံ ဦသရံ ပါပဘူမီ’’တိ? ‘‘အသု၊ ဘန္တေ၊ ကဿကော ဂဟပတိ ဗီဇာနိ ပတိဋ္ဌာပေတုကာမော ယံ အဒုံ ခေတ္တံ အဂ္ဂံ တတ္ထ ပတိဋ္ဌာပေယျ. တတ္ထ ပတိဋ္ဌာပေတွာ ယံ အဒုံ ခေတ္တံ မဇ္ဈိမံ တတ္ထ ပတိဋ္ဌာပေယျ. တတ္ထ ပတိဋ္ဌာပေတွာ ယံ အဒုံ ခေတ္တံ ဟီနံ ဇင်္ဂလံ ဦသရံ ပါပဘူမိ တတ္ထ ပတိဋ္ဌာပေယျပိ၊ နောပိ ပတိဋ္ဌာပေယျ. တံ ကိဿ ဟေတု? အန္တမသော ဂေါဘတ္တမ္ပိ ဘဝိဿတီ’’တိ.

‘‘သေယျထာပိ၊ ဂါမဏိ၊ ယံ အဒုံ ခေတ္တံ အဂ္ဂံ၊ ဧဝမေဝ မယှံ ဘိက္ခုဘိက္ခုနိယော. တေသာဟံ ဓမ္မံ ဒေသေမိ – အာဒိကလျာဏံ မဇ္ဈေကလျာဏံ ပရိယောသာနကလျာဏံ၊ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေမိ. တံ ကိဿ ဟေတု? ဧတေ ဟိ၊ ဂါမဏိ၊ မံဒီပါ မံလေဏာ မံတာဏာ မံသရဏာ ဝိဟရန္တိ. သေယျထာပိ၊ ဂါမဏိ၊ ယံ အဒုံ ခေတ္တံ မဇ္ဈိမံ၊ ဧဝမေဝ မယှံ ဥပါသကဥပါသိကာယော. တေသံ ပါဟံ ဓမ္မံ ဒေသေမိ – အာဒိကလျာဏံ မဇ္ဈေကလျာဏံ ပရိယောသာနကလျာဏံ၊ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေမိ. တံ ကိဿ ဟေတု? ဧတေ ဟိ၊ ဂါမဏိ၊ မံဒီပါ မံလေဏာ မံတာဏာ မံသရဏာ ဝိဟရန္တိ. သေယျထာပိ၊ ဂါမဏိ၊ ယံ အဒုံ ခေတ္တံ ဟီနံ ဇင်္ဂလံ ဦသရံ ပါပဘူမိ၊ ဧဝမေဝ မယှံ အညတိတ္ထိယာ သမဏဗြာဟ္မဏပရိဗ္ဗာဇကာ. တေသံ ပါဟံ ဓမ္မံ ဒေသေမိ – အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ၊ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေမိ. တံ ကိဿ ဟေတု? အပ္ပေဝ နာမ ဧကံ ပဒမ္ပိ အာဇာနေယျုံ တံ နေသံ အဿ ဒီဃရတ္တံ ဟိတာယ သုခါယာ’’တိ.

‘‘သေယျထာပိ၊ ဂါမဏိ၊ ပုရိသဿ တယော ဥဒကမဏိကာ – ဧကော ဥဒကမဏိကော အစ္ဆိဒ္ဒေါ အဟာရီ အပရိဟာရီ၊ ဧကော ဥဒကမဏိကော အစ္ဆိဒ္ဒေါ ဟာရီ ပရိဟာရီ၊ ဧကော ဥဒကမဏိကော ဆိဒ္ဒေါ ဟာရီ ပရိဟာရီ. တံ ကိံ မညသိ၊ ဂါမဏိ၊ အသု ပုရိသော ဥဒကံ နိက္ခိပိတုကာမော ကတ္ထ ပဌမံ နိက္ခိပေယျ၊ ယော ဝါ သော ဥဒကမဏိကော အစ္ဆိဒ္ဒေါ အဟာရီ အပရိဟာရီ၊ ယော ဝါ သော ဥဒကမဏိကော အစ္ဆိဒ္ဒေါ ဟာရီ ပရိဟာရီ၊ ယော ဝါ သော ဥဒကမဏိကော ဆိဒ္ဒေါ ဟာရီ ပရိဟာရီ’’တိ? ‘‘အသု၊ ဘန္တေ၊ ပုရိသော ဥဒကံ နိက္ခိပိတုကာမော၊ ယော သော ဥဒကမဏိကော အစ္ဆိဒ္ဒေါ အဟာရီ အပရိဟာရီ တတ္ထ နိက္ခိပေယျ၊ တတ္ထ နိက္ခိပိတွာ၊ ယော သော ဥဒကမဏိကော အစ္ဆိဒ္ဒေါ ဟာရီ ပရိဟာရီ တတ္ထ နိက္ခိပေယျ၊ တတ္ထ နိက္ခိပိတွာ၊ ယော သော ဥဒကမဏိကော ဆိဒ္ဒေါ ဟာရီ ပရိဟာရီ တတ္ထ နိက္ခိပေယျပိ၊ နောပိ နိက္ခိပေယျ. တံ ကိဿ ဟေတု? အန္တမသော ဘဏ္ဍဓောဝနမ္ပိ ဘဝိဿတီ’’တိ.

‘‘သေယျထာပိ၊ ဂါမဏိ၊ ယော သော ဥဒကမဏိကော အစ္ဆိဒ္ဒေါ အဟာရီ အပရိဟာရီ၊ ဧဝမေဝ မယှံ ဘိက္ခုဘိက္ခုနိယော. တေသာဟံ ဓမ္မံ ဒေသေမိ – အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ၊ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေမိ. တံ ကိဿ ဟေတု? ဧတေ ဟိ၊ ဂါမဏိ၊ မံဒီပါ မံလေဏာ မံတာဏာ မံသရဏာ ဝိဟရန္တိ. သေယျထာပိ၊ ဂါမဏိ၊ ယော သော ဥဒကမဏိကော အစ္ဆိဒ္ဒေါ ဟာရီ ပရိဟာရီ၊ ဧဝမေဝ မယှံ ဥပါသကဥပါသိကာယော. တေသာဟံ ဓမ္မံ ဒေသေမိ – အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ၊ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေမိ. တံ ကိဿ ဟေတု? ဧတေ ဟိ၊ ဂါမဏိ၊ မံဒီပါ မံလေဏာ မံတာဏာ မံသရဏာ ဝိဟရန္တိ. သေယျထာပိ၊ ဂါမဏိ၊ ယော သော ဥဒကမဏိကော ဆိဒ္ဒေါ ဟာရီ ပရိဟာရီ၊ ဧဝမေဝ မယှံ အညတိတ္ထိယာ သမဏဗြာဟ္မဏပရိဗ္ဗာဇကာ. တေသာဟံ ဓမ္မံ ဒေသေမိ – အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေမိ. တံ ကိဿ ဟေတု? အပ္ပေဝ နာမ ဧကံ ပဒမ္ပိ အာဇာနေယျုံ၊ တံ နေသံ အဿ ဒီဃရတ္တံ ဟိတာယ သုခါယာ’’တိ. ဧဝံ ဝုတ္တေ၊ အသိဗန္ဓကပုတ္တော ဂါမဏိ ဘဂဝန္တံ ဧတဒဝေါစ – ‘‘အဘိက္ကန္တံ၊ ဘန္တေ။ပေ။ အဇ္ဇတဂ္ဂေ ပါဏုပေတံ သရဏံ ဂတ’’န္တိ. သတ္တမံ.