၁၂. ရာသိယသုတ္တံ

၃၆၄. အထ ခေါ ရာသိယော ဂါမဏိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ရာသိယော ဂါမဏိ ဘဂဝန္တံ ဧတဒဝေါစ – ‘‘သုတံ မေတံ၊ ဘန္တေ၊ ‘သမဏော ဂေါတမော သဗ္ဗံ တပံ ဂရဟတိ၊ သဗ္ဗံ တပဿိံ လူခဇီဝိံ ဧကံသေန ဥပဝဒတိ ဥပက္ကောသတီ’တိ [ဥပက္ကောသတိ ဥပဝဒတီတိ (ဒီ. နိ. ၁.၃၈၁)]. ယေ တေ၊ ဘန္တေ၊ ဧဝမာဟံသု – ‘သမဏော ဂေါတမော သဗ္ဗံ တပံ ဂရဟတိ၊ သဗ္ဗံ တပဿိံ လူခဇီဝိံ ဧကံသေန ဥပဝဒတိ ဥပက္ကောသတီ’တိ၊ ကစ္စိ တေ၊ ဘန္တေ၊ ဘဂဝတော ဝုတ္တဝါဒိနော၊ န စ ဘဂဝန္တံ အဘူတေန အဗ္ဘာစိက္ခန္တိ၊ ဓမ္မဿ စာနုဓမ္မံ ဗျာကရောန္တိ၊ န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတီ’’တိ? ‘‘ယေ တေ၊ ဂါမဏိ၊ ဧဝမာဟံသု – ‘သမဏော ဂေါတမော သဗ္ဗံ တပံ ဂရဟတိ၊ သဗ္ဗံ တပဿိံ လူခဇီဝိံ ဧကံသေန ဥပဝဒတိ ဥပက္ကောသတီ’တိ၊ န မေ တေ ဝုတ္တဝါဒိနော၊ အဗ္ဘာစိက္ခန္တိ စ ပန မံ တေ အသတာ တုစ္ဆာ အဘူတေန’’.

‘‘ဒွေမေ၊ ဂါမဏိ၊ အန္တာ ပဗ္ဗဇိတေန န သေဝိတဗ္ဗာ – ယော စာယံ ကာမေသု ကာမသုခလ္လိကာနုယောဂေါ ဟီနော ဂမ္မော ပေါထုဇ္ဇနိကော အနရိယော အနတ္ထသံဟိတော၊ ယော စာယံ အတ္တကိလမထာနုယောဂေါ ဒုက္ခော အနရိယော အနတ္ထသံဟိတော. ဧတေ တေ၊ ဂါမဏိ၊ ဥဘော အန္တေ အနုပဂမ္မ မဇ္ဈိမာ ပဋိပဒါ တထာဂတေန အဘိသမ္ဗုဒ္ဓါ – စက္ခုကရဏီ ဉာဏကရဏီ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တတိ. ကတမာ စ သာ၊ ဂါမဏိ၊ မဇ္ဈိမာ ပဋိပဒါ တထာဂတေန အဘိသမ္ဗုဒ္ဓါ – စက္ခုကရဏီ ဉာဏကရဏီ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တတိ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. အယံ ခေါ သာ၊ ဂါမဏိ၊ မဇ္ဈိမာ ပဋိပဒါ တထာဂတေန အဘိသမ္ဗုဒ္ဓါ – စက္ခုကရဏီ ဉာဏကရဏီ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တတိ.

‘‘တယော ခေါ မေ၊ ဂါမဏိ၊ ကာမဘောဂိနော သန္တော သံဝိဇ္ဇမာနာ လောကသ္မိံ. ကတမေ တယော? ဣဓ၊ ဂါမဏိ၊ ဧကစ္စော ကာမဘောဂီ အဓမ္မေန ဘောဂေ ပရိယေသတိ၊ သာဟသေန အဓမ္မေန ဘောဂေ ပရိယေသိတွာ သာဟသေန န အတ္တာနံ သုခေတိ န ပီဏေတိ န သံဝိဘဇတိ န ပုညာနိ ကရောတိ. ဣဓ ပန၊ ဂါမဏိ၊ ဧကစ္စော ကာမဘောဂီ အဓမ္မေန ဘောဂေ ပရိယေသတိ သာဟသေန. အဓမ္မေန ဘောဂေ ပရိယေသိတွာ သာဟသေန အတ္တာနံ သုခေတိ ပီဏေတိ၊ န သံဝိဘဇတိ န ပုညာနိ ကရောတိ. ဣဓ ပန၊ ဂါမဏိ၊ ဧကစ္စော ကာမဘောဂီ အဓမ္မေန ဘောဂေ ပရိယေသတိ သာဟသေန. အဓမ္မေန ဘောဂေ ပရိယေသိတွာ သာဟသေန အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ.

‘‘ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မာဓမ္မေန ဘောဂေ ပရိယေသတိ သာဟသေနပိ အသာဟသေနပိ. ဓမ္မာဓမ္မေန ဘောဂေ ပရိယေသိတွာ သာဟသေနပိ အသာဟသေနပိ န အတ္တာနံ သုခေတိ၊ န ပီဏေတိ၊ န သံဝိဘဇတိ၊ န ပုညာနိ ကရောတိ. ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မာဓမ္မေန ဘောဂေ ပရိယေသတိ သာဟသေနပိ အသာဟသေနပိ. ဓမ္မာဓမ္မေန ဘောဂေ ပရိယေသိတွာ သာဟသေနပိ အသာဟသေနပိ အတ္တာနံ သုခေတိ ပီဏေတိ၊ န သံဝိဘဇတိ၊ န ပုညာနိ ကရောတိ. ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မာဓမ္မေန ဘောဂေ ပရိယေသတိ၊ သာဟသေနပိ အသာဟသေနပိ. ဓမ္မာဓမ္မေန ဘောဂေ ပရိယေသိတွာ သာဟသေနပိ အသာဟသေနပိ အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ.

‘‘ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မေန ဘောဂေ ပရိယေသတိ အသာဟသေန. ဓမ္မေန ဘောဂေ ပရိယေသိတွာ အသာဟသေန န အတ္တာနံ သုခေတိ၊ န ပီဏေတိ၊ န သံဝိဘဇတိ၊ န ပုညာနိ ကရောတိ. ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မေန ဘောဂေ ပရိယေသတိ အသာဟသေန. ဓမ္မေန ဘောဂေ ပရိယေသိတွာ အသာဟသေန အတ္တာနံ သုခေတိ ပီဏေတိ၊ န သံဝိဘဇတိ၊ န ပုညာနိ ကရောတိ. ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မေန ဘောဂေ ပရိယေသတိ အသာဟသေန. ဓမ္မေန ဘောဂေ ပရိယေသိတွာ အသာဟသေန အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ. တေ စ ဘောဂေ ဂဓိတော [ဂထိတော (သီ.)] မုစ္ဆိတော အဇ္ဈောပန္နော အနာဒီနဝဒဿာဝီ အနိဿရဏပညော ပရိဘုဉ္ဇတိ. ဣဓ ပန၊ ဂါမဏိ၊ ဧကစ္စော ကာမဘောဂီ ဓမ္မေန ဘောဂေ ပရိယေသတိ အသာဟသေန. ဓမ္မေန ဘောဂေ ပရိယေသိတွာ အသာဟသေန အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ. တေ စ ဘောဂေ အဂဓိတော အမုစ္ဆိတော အနဇ္ဈောပန္နော အာဒီနဝဒဿာဝီ နိဿရဏပညော ပရိဘုဉ္ဇတိ.

‘‘တတြ၊ ဂါမဏိ၊ ယွာယံ ကာမဘောဂီ အဓမ္မေန ဘောဂေ ပရိယေသတိ သာဟသေန၊ အဓမ္မေန ဘောဂေ ပရိယေသိတွာ သာဟသေန န အတ္တာနံ သုခေတိ၊ န ပီဏေတိ၊ န သံဝိဘဇတိ၊ န ပုညာနိ ကရောတိ. အယံ၊ ဂါမဏိ၊ ကာမဘောဂီ တီဟိ ဌာနေဟိ ဂါရယှော. ကတမေဟိ တီဟိ ဌာနေဟိ ဂါရယှော? အဓမ္မေန ဘောဂေ ပရိယေသတိ သာဟသေနာတိ၊ ဣမိနာ ပဌမေန ဌာနေန ဂါရယှော. န အတ္တာနံ သုခေတိ န ပီဏေတီတိ၊ ဣမိနာ ဒုတိယေန ဌာနေန ဂါရယှော. န သံဝိဘဇတိ၊ န ပုညာနိ ကရောတီတိ၊ ဣမိနာ တတိယေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမေဟိ တီဟိ ဌာနေဟိ ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ အဓမ္မေန ဘောဂေ ပရိယေသတိ သာဟသေန၊ အဓမ္မေန ဘောဂေ ပရိယေသိတွာ သာဟသေန အတ္တာနံ သုခေတိ ပီဏေတိ၊ န သံဝိဘဇတိ၊ န ပုညာနိ ကရောတိ. အယံ၊ ဂါမဏိ၊ ကာမဘောဂီ ဒွီဟိ ဌာနေဟိ ဂါရယှော၊ ဧကေန ဌာနေန ပါသံသော. ကတမေဟိ ဒွီဟိ ဌာနေဟိ ဂါရယှော? အဓမ္မေန ဘောဂေ ပရိယေသတိ သာဟသေနာတိ၊ ဣမိနာ ပဌမေန ဌာနေန ဂါရယှော. န သံဝိဘဇတိ၊ န ပုညာနိ ကရောတီတိ၊ ဣမိနာ ဒုတိယေန ဌာနေန ဂါရယှော. ကတမေန ဧကေန ဌာနေန ပါသံသော? အတ္တာနံ သုခေတိ ပီဏေတီတိ၊ ဣမိနာ ဧကေန ဌာနေန ပါသံသော. အယံ၊ ဂါမဏိ၊ ကာမဘောဂီ ဣမေဟိ ဒွီဟိ ဌာနေဟိ ဂါရယှော၊ ဣမိနာ ဧကေန ဌာနေန ပါသံသော.

‘‘တတြ၊ ဂါမဏိ၊ ယွာယံ ကာမဘောဂီ အဓမ္မေန ဘောဂေ ပရိယေသတိ သာဟသေန၊ အဓမ္မေန ဘောဂေ ပရိယေသိတွာ သာဟသေန အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ. အယံ၊ ဂါမဏိ၊ ကာမဘောဂီ ဧကေန ဌာနေန ဂါရယှော၊ ဒွီဟိ ဌာနေဟိ ပါသံသော. ကတမေန ဧကေန ဌာနေန ဂါရယှော? အဓမ္မေန ဘောဂေ ပရိယေသတိ သာဟသေနာတိ၊ ဣမိနာ ဧကေန ဌာနေန ဂါရယှော. ကတမေဟိ ဒွီဟိ ဌာနေဟိ ပါသံသော? အတ္တာနံ သုခေတိ ပီဏေတီတိ၊ ဣမိနာ ပဌမေန ဌာနေန ပါသံသော. သံဝိဘဇတိ ပုညာနိ ကရောတီတိ၊ ဣမိနာ ဒုတိယေန ဌာနေန ပါသံသော. အယံ၊ ဂါမဏိ၊ ကာမဘောဂီ၊ ဣမိနာ ဧကေန ဌာနေန ဂါရယှော၊ ဣမေဟိ ဒွီဟိ ဌာနေဟိ ပါသံသော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မာဓမ္မေန ဘောဂေ ပရိယေသတိ သာဟသေနပိ အသာဟသေနပိ၊ ဓမ္မာဓမ္မေန ဘောဂေ ပရိယေသိတွာ သာဟသေနပိ အသာဟသေနပိ န အတ္တာနံ သုခေတိ၊ န ပီဏေတိ၊ န သံဝိဘဇတိ၊ န ပုညာနိ ကရောတိ. အယံ၊ ဂါမဏိ၊ ကာမဘောဂီ ဧကေန ဌာနေန ပါသံသော၊ တီဟိ ဌာနေဟိ ဂါရယှော. ကတမေန ဧကေန ဌာနေန ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ဧကေန ဌာနေန ပါသံသော. ကတမေဟိ တီဟိ ဌာနေဟိ ဂါရယှော? အဓမ္မေန ဘောဂေ ပရိယေသတိ သာဟသေနာတိ၊ ဣမိနာ ပဌမေန ဌာနေန ဂါရယှော. န အတ္တာနံ သုခေတိ၊ န ပီဏေတီတိ၊ ဣမိနာ ဒုတိယေန ဌာနေန ဂါရယှော. န သံဝိဘဇတိ၊ န ပုညာနိ ကရောတီတိ၊ ဣမိနာ တတိယေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမိနာ ဧကေန ဌာနေန ပါသံသော၊ ဣမေဟိ တီဟိ ဌာနေဟိ ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မာဓမ္မေန ဘောဂေ ပရိယေသတိ သာဟသေနပိ အသာဟသေနပိ၊ ဓမ္မာဓမ္မေန ဘောဂေ ပရိယေသိတွာ သာဟသေနပိ အသာဟသေနပိ အတ္တာနံ သုခေတိ ပီဏေတိ၊ န သံဝိဘဇတိ၊ န ပုညာနိ ကရောတိ. အယံ၊ ဂါမဏိ၊ ကာမဘောဂီ ဒွီဟိ ဌာနေဟိ ပါသံသော၊ ဒွီဟိ ဌာနေဟိ ဂါရယှော. ကတမေဟိ ဒွီဟိ ဌာနေဟိ ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ပဌမေန ဌာနေန ပါသံသော. အတ္တာနံ သုခေတိ ပီဏေတီတိ၊ ဣမိနာ ဒုတိယေန ဌာနေန ပါသံသော. ကတမေဟိ ဒွီဟိ ဌာနေဟိ ဂါရယှော? အဓမ္မေန ဘောဂေ ပရိယေသတိ သာဟသေနာတိ၊ ဣမိနာ ပဌမေန ဌာနေန ဂါရယှော. န သံဝိဘဇတိ၊ န ပုညာနိ ကရောတီတိ၊ ဣမိနာ ဒုတိယေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမေဟိ ဒွီဟိ ဌာနေဟိ ပါသံသော၊ ဣမေဟိ ဒွီဟိ ဌာနေဟိ ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မာဓမ္မေန ဘောဂေ ပရိယေသတိ သာဟသေနပိ အသာဟသေနပိ၊ ဓမ္မာဓမ္မေန ဘောဂေ ပရိယေသိတွာ သာဟသေနပိ အသာဟသေနပိ အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ. အယံ၊ ဂါမဏိ၊ ကာမဘောဂီ တီဟိ ဌာနေဟိ ပါသံသော၊ ဧကေန ဌာနေန ဂါရယှော. ကတမေဟိ တီဟိ ဌာနေဟိ ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ပဌမေန ဌာနေန ပါသံသော. အတ္တာနံ သုခေတိ ပီဏေတီတိ၊ ဣမိနာ ဒုတိယေန ဌာနေန ပါသံသော. သံဝိဘဇတိ ပုညာနိ ကရောတီတိ၊ ဣမိနာ တတိယေန ဌာနေန ပါသံသော. ကတမေန ဧကေန ဌာနေန ဂါရယှော? အဓမ္မေန ဘောဂေ ပရိယေသတိ သာဟသေနာတိ၊ ဣမိနာ ဧကေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမေဟိ တီဟိ ဌာနေဟိ ပါသံသော၊ ဣမိနာ ဧကေန ဌာနေန ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မေန ဘောဂေ ပရိယေသတိ အသာဟသေန၊ ဓမ္မေန ဘောဂေ ပရိယေသိတွာ အသာဟသေန၊ န အတ္တာနံ သုခေတိ၊ န ပီဏေတိ၊ န သံဝိဘဇတိ၊ န ပုညာနိ ကရောတိ. အယံ၊ ဂါမဏိ၊ ကာမဘောဂီ ဧကေန ဌာနေန ပါသံသော၊ ဒွီဟိ ဌာနေဟိ ဂါရယှော. ကတမေန ဧကေန ဌာနေန ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ဧကေန ဌာနေန ပါသံသော. ကတမေဟိ ဒွီဟိ ဌာနေဟိ ဂါရယှော? န အတ္တာနံ သုခေတိ၊ န ပီဏေတီတိ၊ ဣမိနာ ပဌမေန ဌာနေန ဂါရယှော. န သံဝိဘဇတိ၊ န ပုညာနိ ကရောတီတိ၊ ဣမိနာ ဒုတိယေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမိနာ ဧကေန ဌာနေန ပါသံသော၊ ဣမေဟိ ဒွီဟိ ဌာနေဟိ ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မေန ဘောဂေ ပရိယေသတိ အသာဟသေန၊ ဓမ္မေန ဘောဂေ ပရိယေသိတွာ အသာဟသေန အတ္တာနံ သုခေတိ ပီဏေတိ၊ န သံဝိဘဇတိ၊ န ပုညာနိ ကရောတိ. အယံ၊ ဂါမဏိ၊ ကာမဘောဂီ ဒွီဟိ ဌာနေဟိ ပါသံသော၊ ဧကေန ဌာနေန ဂါရယှော. ကတမေဟိ ဒွီဟိ ဌာနေဟိ ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ပဌမေန ဌာနေန ပါသံသော. အတ္တာနံ သုခေတိ ပီဏေတီတိ၊ ဣမိနာ ဒုတိယေန ဌာနေန ပါသံသော. ကတမေန ဧကေန ဌာနေန ဂါရယှော? န သံဝိဘဇတိ၊ န ပုညာနိ ကရောတီတိ၊ ဣမိနာ ဧကေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမေဟိ ဒွီဟိ ဌာနေဟိ ပါသံသော၊ ဣမိနာ ဧကေန ဌာနေန ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မေန ဘောဂေ ပရိယေသတိ အသာဟသေန၊ ဓမ္မေန ဘောဂေ ပရိယေသိတွာ အသာဟသေန အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ၊ တေ စ ဘောဂေ ဂဓိတော မုစ္ဆိတော အဇ္ဈောပန္နော အနာဒီနဝဒဿာဝီ အနိဿရဏပညော ပရိဘုဉ္ဇတိ. အယံ၊ ဂါမဏိ၊ ကာမဘောဂီ တီဟိ ဌာနေဟိ ပါသံသော၊ ဧကေန ဌာနေန ဂါရယှော. ကတမေဟိ တီဟိ ဌာနေဟိ ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ပဌမေန ဌာနေန ပါသံသော. အတ္တာနံ သုခေတိ ပီဏေတီတိ၊ ဣမိနာ ဒုတိယေန ဌာနေန ပါသံသော. သံဝိဘဇတိ ပုညာနိ ကရောတီတိ၊ ဣမိနာ တတိယေန ဌာနေန ပါသံသော. ကတမေန ဧကေန ဌာနေန ဂါရယှော? တေ စ ဘောဂေ ဂဓိတော မုစ္ဆိတော အဇ္ဈောပန္နော အနာဒီနဝဒဿာဝီ အနိဿရဏပညော ပရိဘုဉ္ဇတီတိ၊ ဣမိနာ ဧကေန ဌာနေန ဂါရယှော. အယံ၊ ဂါမဏိ၊ ကာမဘောဂီ ဣမေဟိ တီဟိ ဌာနေဟိ ပါသံသော၊ ဣမိနာ ဧကေန ဌာနေန ဂါရယှော.

‘‘တတြ၊ ဂါမဏိ၊ ယွာယံ ကာမဘောဂီ ဓမ္မေန ဘောဂေ ပရိယေသတိ အသာဟသေန၊ ဓမ္မေန ဘောဂေ ပရိယေသိတွာ အသာဟသေန အတ္တာနံ သုခေတိ ပီဏေတိ သံဝိဘဇတိ ပုညာနိ ကရောတိ. တေ စ ဘောဂေ အဂဓိတော အမုစ္ဆိတော အနဇ္ဈောပန္နော အာဒီနဝဒဿာဝီ နိဿရဏပညော ပရိဘုဉ္ဇတိ. အယံ၊ ဂါမဏိ၊ ကာမဘောဂီ စတူဟိ ဌာနေဟိ ပါသံသော. ကတမေဟိ စတူဟိ ဌာနေဟိ ပါသံသော? ဓမ္မေန ဘောဂေ ပရိယေသတိ အသာဟသေနာတိ၊ ဣမိနာ ပဌမေန ဌာနေန ပါသံသော. အတ္တာနံ သုခေတိ ပီဏေတီတိ၊ ဣမိနာ ဒုတိယေန ဌာနေန ပါသံသော. သံဝိဘဇတိ ပုညာနိ ကရောတီတိ၊ ဣမိနာ တတိယေန ဌာနေန ပါသံသော. တေ စ ဘောဂေ အဂဓိတော အမုစ္ဆိတော အနဇ္ဈောပန္နော အာဒီနဝဒဿာဝီ နိဿရဏပညော ပရိဘုဉ္ဇတီတိ၊ ဣမိနာ စတုတ္ထေန ဌာနေန ပါသံသော. အယံ၊ ဂါမဏိ၊ ကာမဘောဂီ ဣမေဟိ စတူဟိ ဌာနေဟိ ပါသံသော.

‘‘တယောမေ၊ ဂါမဏိ၊ တပဿိနော လူခဇီဝိနော သန္တော သံဝိဇ္ဇမာနာ လောကသ္မိံ. ကတမေ တယော? ဣဓ၊ ဂါမဏိ၊ ဧကစ္စော တပဿီ လူခဇီဝီ သဒ္ဓါ အဂါရသ္မာ အနဂါရိယံ ပဗ္ဗဇိတော ဟောတိ – ‘အပ္ပေဝ နာမ ကုသလံ ဓမ္မံ အဓိဂစ္ဆေယျံ၊ အပ္ပေဝ နာမ ဥတ္တရိမနုဿဓမ္မာ အလမရိယဉာဏဒဿနဝိသေသံ သစ္ဆိကရေယျ’န္တိ. သော အတ္တာနံ အာတာပေတိ ပရိတာပေတိ၊ ကုသလဉ္စ ဓမ္မံ နာဓိဂစ္ဆတိ၊ ဥတ္တရိ စ မနုဿဓမ္မာ အလမရိယဉာဏဒဿနဝိသေသံ န သစ္ဆိကရောတိ.

‘‘ဣဓ ပန၊ ဂါမဏိ၊ ဧကစ္စော တပဿီ လူခဇီဝီ သဒ္ဓါ အဂါရသ္မာ အနဂါရိယံ ပဗ္ဗဇိတော ဟောတိ – ‘အပ္ပေဝ နာမ ကုသလံ ဓမ္မံ အဓိဂစ္ဆေယျံ၊ အပ္ပေဝ နာမ ဥတ္တရိမနုဿဓမ္မာ အလမရိယဉာဏဒဿနဝိသေသံ သစ္ဆိကရေယျ’န္တိ. သော အတ္တာနံ အာတာပေတိ ပရိတာပေတိ၊ ကုသလဉှိ ခေါ ဓမ္မံ အဓိဂစ္ဆတိ၊ ဥတ္တရိမနုဿဓမ္မာ အလမရိယဉာဏဒဿနဝိသေသံ န သစ္ဆိကရောတိ.

‘‘ဣဓ ပန၊ ဂါမဏိ၊ ဧကစ္စော တပဿီ လူခဇီဝီ သဒ္ဓါ အဂါရသ္မာ အနဂါရိယံ ပဗ္ဗဇိတော ဟောတိ – ‘အပ္ပေဝ နာမ ကုသလံ ဓမ္မံ အဓိဂစ္ဆေယျံ၊ အပ္ပေဝ နာမ ဥတ္တရိမနုဿဓမ္မာ အလမရိယဉာဏဒဿနဝိသေသံ သစ္ဆိကရေယျ’န္တိ. သော အတ္တာနံ အာတာပေတိ ပရိတာပေတိ၊ ကုသလဉ္စ ဓမ္မံ အဓိဂစ္ဆတိ၊ ဥတ္တရိ စ မနုဿဓမ္မာ အလမရိယဉာဏဒဿနဝိသေသံ သစ္ဆိကရောတိ.

‘‘တတြ၊ ဂါမဏိ၊ ယွာယံ တပဿီ လူခဇီဝီ အတ္တာနံ အာတာပေတိ ပရိတာပေတိ၊ ကုသလဉ္စ ဓမ္မံ နာဓိဂစ္ဆတိ၊ ဥတ္တရိ စ မနုဿဓမ္မာ အလမရိယဉာဏဒဿနဝိသေသံ န သစ္ဆိကရောတိ. အယံ၊ ဂါမဏိ၊ တပဿီ လူခဇီဝီ တီဟိ ဌာနေဟိ ဂါရယှော. ကတမေဟိ တီဟိ ဌာနေဟိ ဂါရယှော? အတ္တာနံ အာတာပေတိ ပရိတာပေတီတိ၊ ဣမိနာ ပဌမေန ဌာနေန ဂါရယှော. ကုသလဉ္စ ဓမ္မံ နာဓိဂစ္ဆတီတိ၊ ဣမိနာ ဒုတိယေန ဌာနေန ဂါရယှော. ဥတ္တရိ စ မနုဿဓမ္မာ အလမရိယဉာဏဒဿနဝိသေသံ န သစ္ဆိကရောတီတိ၊ ဣမိနာ တတိယေန ဌာနေန ဂါရယှော. အယံ၊ ဂါမဏိ၊ တပဿီ လူခဇီဝီ၊ ဣမေဟိ တီဟိ ဌာနေဟိ ဂါရယှော.

‘‘တတြ၊ ဂါမဏိ၊ ယွာယံ တပဿီ လူခဇီဝီ အတ္တာနံ အာတာပေတိ ပရိတာပေတိ၊ ကုသလဉှိ ခေါ ဓမ္မံ အဓိဂစ္ဆတိ၊ ဥတ္တရိ စ မနုဿဓမ္မာ အလမရိယဉာဏဒဿနဝိသေသံ န သစ္ဆိကရောတိ. အယံ၊ ဂါမဏိ၊ တပဿီ လူခဇီဝီ ဒွီဟိ ဌာနေဟိ ဂါရယှော၊ ဧကေန ဌာနေန ပါသံသော. ကတမေဟိ ဒွီဟိ ဌာနေဟိ ဂါရယှော? အတ္တာနံ အာတာပေတိ ပရိတာပေတီတိ၊ ဣမိနာ ပဌမေန ဌာနေန ဂါရယှော. ဥတ္တရိ စ မနုဿဓမ္မာ အလမရိယဉာဏဒဿနဝိသေသံ န သစ္ဆိကရောတီတိ၊ ဣမိနာ ဒုတိယေန ဌာနေန ဂါရယှော. ကတမေန ဧကေန ဌာနေန ပါသံသော? ကုသလဉှိ ခေါ ဓမ္မံ အဓိဂစ္ဆတီတိ၊ ဣမိနာ ဧကေန ဌာနေန ပါသံသော. အယံ၊ ဂါမဏိ၊ တပဿီ လူခဇီဝီ ဣမေဟိ ဒွီဟိ ဌာနေဟိ ဂါရယှော၊ ဣမိနာ ဧကေန ဌာနေန ပါသံသော.

‘‘တတြ၊ ဂါမဏိ၊ ယွာယံ တပဿီ လူခဇီဝီ အတ္တာနံ အာတာပေတိ ပရိတာပေတိ၊ ကုသလဉ္စ ဓမ္မံ အဓိဂစ္ဆတိ၊ ဥတ္တရိ စ မနုဿဓမ္မာ အလမရိယဉာဏဒဿနဝိသေသံ သစ္ဆိကရောတိ. အယံ၊ ဂါမဏိ၊ တပဿီ လူခဇီဝီ ဧကေန ဌာနေန ဂါရယှော၊ ဒွီဟိ ဌာနေဟိ ပါသံသော. ကတမေန ဧကေန ဌာနေန ဂါရယှော? အတ္တာနံ အာတာပေတိ ပရိတာပေတီတိ၊ ဣမိနာ ဧကေန ဌာနေန ဂါရယှော. ကတမေဟိ ဒွီဟိ ဌာနေဟိ ပါသံသော? ကုသလဉ္စ ဓမ္မံ အဓိဂစ္ဆတီတိ၊ ဣမိနာ ပဌမေန ဌာနေန ပါသံသော. ဥတ္တရိ စ မနုဿဓမ္မာ အလမရိယဉာဏဒဿနဝိသေသံ သစ္ဆိကရောတီတိ၊ ဣမိနာ ဒုတိယေန ဌာနေန ပါသံသော. အယံ၊ ဂါမဏိ၊ တပဿီ လူခဇီဝီ ဣမိနာ ဧကေန ဌာနေန ဂါရယှော၊ ဣမေဟိ ဒွီဟိ ဌာနေဟိ ပါသံသော.

‘‘တိဿော ဣမာ၊ ဂါမဏိ၊ သန္ဒိဋ္ဌိကာ နိဇ္ဇရာ အကာလိကာ ဧဟိပဿိကာ ဩပနေယျိကာ ပစ္စတ္တံ ဝေဒိတဗ္ဗာ ဝိညူဟိ. ကတမာ တိဿော? ယံ ရတ္တော ရာဂါဓိကရဏံ အတ္တဗျာဗာဓာယပိ စေတေတိ၊ ပရဗျာဗာဓာယပိ စေတေတိ၊ ဥဘယဗျာဗာဓာယပိ စေတေတိ. ရာဂေ ပဟီနေ နေဝတ္တဗျာဗာဓာယ စေတေတိ၊ န ပရဗျာဗာဓာယ စေတေတိ၊ န ဥဘယဗျာဗာဓာယ စေတေတိ. သန္ဒိဋ္ဌိကာ နိဇ္ဇရာ အကာလိကာ ဧဟိပဿိကာ ဩပနေယျိကာ ပစ္စတ္တံ ဝေဒိတဗ္ဗာ ဝိညူဟိ. ယံ ဒုဋ္ဌော ဒေါသာဓိကရဏံ အတ္တဗျာဗာဓာယပိ စေတေတိ၊ ပရဗျာဗာဓာယပိ စေတေတိ၊ ဥဘယဗျာဗာဓာယပိ စေတေတိ. ဒေါသေ ပဟီနေ နေဝတ္တဗျာဗာဓာယ စေတေတိ၊ န ပရဗျာဗာဓာယ စေတေတိ၊ န ဥဘယဗျာဗာဓာယ စေတေတိ. သန္ဒိဋ္ဌိကာ နိဇ္ဇရာ အကာလိကာ ဧဟိပဿိကာ ဩပနေယျိကာ ပစ္စတ္တံ ဝေဒိတဗ္ဗာ ဝိညူဟိ. ယံ မူဠှော မောဟာဓိကရဏံ အတ္တဗျာဗာဓာယပိ စေတေတိ၊ ပရဗျာဗာဓာယပိ စေတေတိ၊ ဥဘယဗျာဗာဓာယပိ စေတေတိ. မောဟေ ပဟီနေ နေဝတ္တဗျာဗာဓာယ စေတေတိ၊ န ပရဗျာဗာဓာယ စေတေတိ၊ န ဥဘယဗျာဗာဓာယ စေတေတိ. သန္ဒိဋ္ဌိကာ နိဇ္ဇရာ အကာလိကာ ဧဟိပဿိကာ ဩပနေယျိကာ ပစ္စတ္တံ ဝေဒိတဗ္ဗာ ဝိညူဟိ. ဣမာ ခေါ၊ ဂါမဏိ၊ တိဿော သန္ဒိဋ္ဌိကာ နိဇ္ဇရာ အကာလိကာ ဧဟိပဿိကာ ဩပနေယျိကာ ပစ္စတ္တံ ဝေဒိတဗ္ဗာ ဝိညူဟီ’’တိ.

ဧဝံ ဝုတ္တေ၊ ရာသိယော ဂါမဏိ ဘဂဝန္တံ ဧတဒဝေါစ – ‘‘အဘိက္ကန္တံ၊ ဘန္တေ။ပေ။ ဥပါသကံ မံ ဘဂဝါ ဓာရေတု အဇ္ဇတဂ္ဂေ ပါဏုပေတံ သရဏံ ဂတ’’န္တိ. ဒွါဒသမံ.