၄. ပုဗ္ဗသုတ္တံ

၂၇၂. ‘‘ပုဗ္ဗေဝ မေ၊ ဘိက္ခဝေ၊ သမ္ဗောဓာ အနဘိသမ္ဗုဒ္ဓဿ ဗောဓိသတ္တဿေဝ သတော ဧတဒဟောသိ – ‘ကတမာ နု ခေါ ဝေဒနာ၊ ကတမော ဝေဒနာသမုဒယော၊ ကတမာ ဝေဒနာသမုဒယဂါမိနီ ပဋိပဒါ၊ ကတမော ဝေဒနာနိရောဓော၊ ကတမာ ဝေဒနာနိရောဓဂါမိနီ ပဋိပဒါ? ကော ဝေဒနာယ အဿာဒေါ၊ ကော အာဒီနဝေါ၊ ကိံ နိဿရဏ’န္တိ? တဿ မယှံ၊ ဘိက္ခဝေ၊ ဧတဒဟောသိ – ‘တိဿော ဣမာ ဝေဒနာ – သုခါ ဝေဒနာ၊ ဒုက္ခာ ဝေဒနာ၊ အဒုက္ခမသုခါ ဝေဒနာ. ဣမာ ဝုစ္စန္တိ ဝေဒနာ. ဖဿသမုဒယာ ဝေဒနာသမုဒယော. တဏှာ ဝေဒနာသမုဒယဂါမိနီ ပဋိပဒါ။ပေ။ ယော ဝေဒနာယ ဆန္ဒရာဂဝိနယော ဆန္ဒရာဂပ္ပဟာနံ. ဣဒံ ဝေဒနာယ နိဿရဏ’’’န္တိ. စတုတ္ထံ.