၇. ဥပသေနအာသီဝိသသုတ္တံ

၆၉. ဧကံ သမယံ အာယသ္မာ စ သာရိပုတ္တော အာယသ္မာ စ ဥပသေနော ရာဇဂဟေ ဝိဟရန္တိ သီတဝနေ သပ္ပသောဏ္ဍိကပဗ္ဘာရေ. တေန ခေါ ပန သမယေန အာယသ္မတော ဥပသေနဿ ကာယေ အာသီဝိသော ပတိတော ဟောတိ. အထ ခေါ အာယသ္မာ ဥပသေနော ဘိက္ခူ အာမန္တေသိ – ‘‘ဧထ မေ၊ အာဝုသော၊ ဣမံ ကာယံ မဉ္စကံ အာရောပေတွာ ဗဟိဒ္ဓါ နီဟရထ. ပုရာယံ ကာယော ဣဓေဝ ဝိကိရတိ၊ သေယျထာပိ ဘုသမုဋ္ဌီ’’တိ.

ဧဝံ ဝုတ္တေ၊ အာယသ္မာ သာရိပုတ္တော အာယသ္မန္တံ ဥပသေနံ ဧတဒဝေါစ – ‘‘န ခေါ ပန မယံ ပဿာမ အာယသ္မတော ဥပသေနဿ ကာယဿ ဝါ အညထတ္တံ ဣန္ဒြိယာနံ ဝါ ဝိပရိဏာမံ. အထ စ ပနာယသ္မာ ဥပသေနော ဧဝမာဟ – ‘ဧထ မေ၊ အာဝုသော၊ ဣမံ ကာယံ မဉ္စကံ အာရောပေတွာ ဗဟိဒ္ဓါ နီဟရထ. ပုရာယံ ကာယော ဣဓေဝ ဝိကိရတိ၊ သေယျထာပိ ဘုသမုဋ္ဌီ’’’တိ. ‘‘ယဿ နူန၊ အာဝုသော သာရိပုတ္တ၊ ဧဝမဿ – ‘အဟံ စက္ခူတိ ဝါ မမ စက္ခူတိ ဝါ။ပေ။ အဟံ ဇိဝှါတိ ဝါ မမ ဇိဝှါတိ ဝါ။ အဟံ မနောတိ ဝါ မမ မနောတိ ဝါ’. တဿ၊ အာဝုသော သာရိပုတ္တ၊ သိယာ ကာယဿ ဝါ အညထတ္တံ ဣန္ဒြိယာနံ ဝါ ဝိပရိဏာမော. မယှဉ္စ ခေါ၊ အာဝုသော သာရိပုတ္တ၊ န ဧဝံ ဟောတိ – ‘အဟံ စက္ခူတိ ဝါ မမ စက္ခူတိ ဝါ။ပေ။ အဟံ ဇိဝှါတိ ဝါ မမ ဇိဝှါတိ ဝါ။ပေ။ အဟံ မနောတိ ဝါ မမ မနောတိ ဝါ’. တဿ မယှဉ္စ ခေါ၊ အာဝုသော သာရိပုတ္တ၊ ကိံ ကာယဿ ဝါ အညထတ္တံ ဘဝိဿတိ၊ ဣန္ဒြိယာနံ ဝါ ဝိပရိဏာမော’’တိ!

‘‘တထာ ဟိ ပနာယသ္မတော ဥပသေနဿ ဒီဃရတ္တံ အဟင်္ကာရမမင်္ကာရမာနာနုသယော သုသမူဟတော. တသ္မာ အာယသ္မတော ဥပသေနဿ န ဧဝံ ဟောတိ – ‘အဟံ စက္ခူတိ ဝါ မမ စက္ခူတိ ဝါ။ပေ။ အဟံ ဇိဝှါတိ ဝါ မမ ဇိဝှါတိ ဝါ။ပေ။ အဟံ မနောတိ ဝါ မမ မနောတိ ဝါ’’’တိ. အထ ခေါ တေ ဘိက္ခူ အာယသ္မတော ဥပသေနဿ ကာယံ မဉ္စကံ အာရောပေတွာ ဗဟိဒ္ဓါ နီဟရိံသု. အထ ခေါ အာယသ္မတော ဥပသေနဿ ကာယော တတ္ထေဝ ဝိကိရိ၊ သေယျထာပိ ဘုသမုဋ္ဌီတိ. သတ္တမံ.