၃. အဘိညာပရိညာပဟာနသုတ္တံ

၂၅. ‘‘သဗ္ဗံ အဘိညာ ပရိညာ ပဟာနာယ ဝေါ၊ ဘိက္ခဝေ၊ ဓမ္မံ ဒေသေဿာမိ. တံ သုဏာထ. ကတမော စ၊ ဘိက္ခဝေ၊ သဗ္ဗံ အဘိညာ ပရိညာ ပဟာနာယ ဓမ္မော? စက္ခုံ၊ ဘိက္ခဝေ၊ အဘိညာ ပရိညာ ပဟာတဗ္ဗံ၊ ရူပါ အဘိညာ ပရိညာ ပဟာတဗ္ဗာ၊ စက္ခုဝိညာဏံ အဘိညာ ပရိညာ ပဟာတဗ္ဗံ၊ စက္ခုသမ္ဖဿော အဘိညာ ပရိညာ ပဟာတဗ္ဗော၊ ယမ္ပိဒံ စက္ခုသမ္ဖဿပစ္စယာ ဥပ္ပဇ္ဇတိ ဝေဒယိတံ သုခံ ဝါ ဒုက္ခံ ဝါ အဒုက္ခမသုခံ ဝါ တမ္ပိ အဘိညာ ပရိညာ ပဟာတဗ္ဗံ။ပေ။ ဇိဝှါ အဘိညာ ပရိညာ ပဟာတဗ္ဗာ၊ ရသာ အဘိညာ ပရိညာ ပဟာတဗ္ဗာ၊ ဇိဝှါဝိညာဏံ အဘိညာ ပရိညာ ပဟာတဗ္ဗံ၊ ဇိဝှါသမ္ဖဿော အဘိညာ ပရိညာ ပဟာတဗ္ဗော၊ ယမ္ပိဒံ ဇိဝှါသမ္ဖဿပစ္စယာ ဥပ္ပဇ္ဇတိ ဝေဒယိတံ သုခံ ဝါ ဒုက္ခံ ဝါ အဒုက္ခမသုခံ ဝါ တမ္ပိ အဘိညာ ပရိညာ ပဟာတဗ္ဗံ. ကာယော အဘိညာ ပရိညာ ပဟာတဗ္ဗော။ မနော အဘိညာ ပရိညာ ပဟာတဗ္ဗော၊ ဓမ္မာ အဘိညာ ပရိညာ ပဟာတဗ္ဗာ၊ မနောဝိညာဏံ အဘိညာ ပရိညာ ပဟာတဗ္ဗံ၊ မနောသမ္ဖဿော အဘိညာ ပရိညာ ပဟာတဗ္ဗော၊ ယမ္ပိဒံ မနောသမ္ဖဿပစ္စယာ ဥပ္ပဇ္ဇတိ ဝေဒယိတံ သုခံ ဝါ ဒုက္ခံ ဝါ အဒုက္ခမသုခံ ဝါ တမ္ပိ အဘိညာ ပရိညာ ပဟာတဗ္ဗံ. အယံ ခေါ၊ ဘိက္ခဝေ၊ သဗ္ဗံ အဘိညာ ပရိညာ ပဟာနာယ ဓမ္မော’’တိ. တတိယံ.