၁. သဗ္ဗသုတ္တံ

၂၃. သာဝတ္ထိနိဒါနံ. ‘‘သဗ္ဗံ ဝေါ၊ ဘိက္ခဝေ၊ ဒေသေဿာမိ. တံ သုဏာထ. ကိဉ္စ၊ ဘိက္ခဝေ၊ သဗ္ဗံ? စက္ခုဉ္စေဝ ရူပါ စ၊ သောတဉ္စ [သောတဉ္စေဝ (?) ဧဝမိတရယုဂလေသုပိ] သဒ္ဒါ စ၊ ဃာနဉ္စ ဂန္ဓာ စ၊ ဇိဝှါ စ ရသာ စ၊ ကာယော စ ဖောဋ္ဌဗ္ဗာ စ၊ မနော စ ဓမ္မာ စ – ဣဒံ ဝုစ္စတိ၊ ဘိက္ခဝေ၊ သဗ္ဗံ. ယော၊ ဘိက္ခဝေ၊ ဧဝံ ဝဒေယျ – ‘အဟမေတံ သဗ္ဗံ ပစ္စက္ခာယ အညံ သဗ္ဗံ ပညာပေဿာမီ’တိ၊ တဿ ဝါစာဝတ္ထုကမေဝဿ [ဝါစာဝတ္ထုရေဝဿ (သီ. ပီ.)၊ ဝါစာဝတ္ထုဒေဝဿ (သျာ. ကံ.)]၊ ပုဋ္ဌော စ န သမ္ပာယေယျ၊ ဥတ္တရိဉ္စ ဝိဃာတံ အာပဇ္ဇေယျ. တံ ကိဿ ဟေတု? ယထာ တံ၊ ဘိက္ခဝေ၊ အဝိသယသ္မိ’’န္တိ. ပဌမံ.