၉. ပဌမဒုက္ခုပ္ပါဒသုတ္တံ

၂၁. ‘‘ယော၊ ဘိက္ခဝေ၊ စက္ခုဿ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော သောတဿ။ပေ။ ယော ဃာနဿ။ ယော ဇိဝှါယ။ ယော ကာယဿ။ ယော မနဿ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ.

‘‘ယော စ ခေါ၊ ဘိက္ခဝေ၊ စက္ခုဿ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော. ယော သောတဿ။ ယော ဃာနဿ။ ယော ဇိဝှါယ။ ယော ကာယဿ။ ယော မနဿ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. နဝမံ.