၁၀. ဒုတိယဒုက္ခုပ္ပါဒသုတ္တံ

၂၂. ‘‘ယော၊ ဘိက္ခဝေ၊ ရူပါနံ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ. ယော သဒ္ဒါနံ။ပေ။ ယော ဂန္ဓာနံ။ ယော ရသာနံ။ ယော ဖောဋ္ဌဗ္ဗာနံ။ ယော ဓမ္မာနံ ဥပ္ပါဒေါ ဌိတိ အဘိနိဗ္ဗတ္တိ ပါတုဘာဝေါ၊ ဒုက္ခဿေသော ဥပ္ပါဒေါ၊ ရောဂါနံ ဌိတိ၊ ဇရာမရဏဿ ပါတုဘာဝေါ.

‘‘ယော စ ခေါ၊ ဘိက္ခဝေ၊ ရူပါနံ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော. ယော သဒ္ဒါနံ။ပေ။ ယော ဂန္ဓာနံ။ ယော ရသာနံ။ ယော ဖောဋ္ဌဗ္ဗာနံ။ ယော ဓမ္မာနံ နိရောဓော ဝူပသမော အတ္ထင်္ဂမော၊ ဒုက္ခဿေသော နိရောဓော၊ ရောဂါနံ ဝူပသမော၊ ဇရာမရဏဿ အတ္ထင်္ဂမော’’တိ. ဒသမံ.

ယမကဝဂ္ဂေါ ဒုတိယော.

တဿုဒ္ဒါနံ –

သမ္ဗောဓေန ဒုဝေ ဝုတ္တာ၊ အဿာဒေန အပရေ ဒုဝေ၊

နော စေတေန ဒုဝေ ဝုတ္တာ၊ အဘိနန္ဒေန အပရေ ဒုဝေ၊

ဥပ္ပါဒေန ဒုဝေ ဝုတ္တာ၊ ဝဂ္ဂေါ တေန ပဝုစ္စတီတိ.