၉. ပဌမဟတ္ထပါဒေါပမသုတ္တံ

၂၃၆. ‘‘ဟတ္ထေသု၊ ဘိက္ခဝေ၊ သတိ အာဒါနနိက္ခေပနံ ပညာယတိ၊ ပါဒေသု သတိ အဘိက္ကမပဋိက္ကမော ပညာယတိ၊ ပဗ္ဗေသု သတိ သမိဉ္ဇနပသာရဏံ ပညာယတိ၊ ကုစ္ဆိသ္မိံ သတိ ဇိဃစ္ဆာ ပိပါသာ ပညာယတိ. ဧဝမေဝ ခေါ၊ ဘိက္ခဝေ၊ စက္ခုသ္မိံ သတိ စက္ခုသမ္ဖဿပစ္စယာ ဥပ္ပဇ္ဇတိ အဇ္ဈတ္တံ သုခံ ဒုက္ခံ။ပေ။ ဇိဝှါယ သတိ ဇိဝှါသမ္ဖဿပစ္စယာ ဥပ္ပဇ္ဇတိ အဇ္ဈတ္တံ သုခံ ဒုက္ခံ။ပေ။ မနသ္မိံ သတိ မနောသမ္ဖဿပစ္စယာ ဥပ္ပဇ္ဇတိ အဇ္ဈတ္တံ သုခံ ဒုက္ခံ။ပေ။.

‘‘ဟတ္ထေသု၊ ဘိက္ခဝေ၊ အသတိ အာဒါနနိက္ခေပနံ န ပညာယတိ၊ ပါဒေသု အသတိ အဘိက္ကမပဋိက္ကမော န ပညာယတိ၊ ပဗ္ဗေသု အသတိ သမိဉ္ဇနပသာရဏံ န ပညာယတိ၊ ကုစ္ဆိသ္မိံ အသတိ ဇိဃစ္ဆာ ပိပါသာ န ပညာယတိ. ဧဝမေဝ ခေါ၊ ဘိက္ခဝေ၊ စက္ခုသ္မိံ အသတိ စက္ခုသမ္ဖဿပစ္စယာ နုပ္ပဇ္ဇတိ အဇ္ဈတ္တံ သုခံ ဒုက္ခံ။ပေ။ ဇိဝှါယ အသတိ ဇိဝှါသမ္ဖဿပစ္စယာ နုပ္ပဇ္ဇတိ။ပေ။ မနသ္မိံ အသတိ မနောသမ္ဖဿပစ္စယာ နုပ္ပဇ္ဇတိ အဇ္ဈတ္တံ သုခံ ဒုက္ခ’’န္တိ. နဝမံ.