၄. အနတ္တနိဗ္ဗာနသပ္ပါယသုတ္တံ

၁၄၉. ‘‘နိဗ္ဗာနသပ္ပါယံ ဝေါ၊ ဘိက္ခဝေ၊ ပဋိပဒံ ဒေသေဿာမိ. တံ သုဏာထ။ပေ။ ကတမာ စ သာ၊ ဘိက္ခဝေ၊ နိဗ္ဗာနသပ္ပါယာ ပဋိပဒါ? ဣဓ၊ ဘိက္ခဝေ၊ ဘိက္ခု စက္ခုံ အနတ္တာတိ ပဿတိ၊ ရူပါ အနတ္တာတိ ပဿတိ၊ စက္ခုဝိညာဏံ အနတ္တာတိ ပဿတိ၊ စက္ခုသမ္ဖဿော အနတ္တာတိ ပဿတိ၊ ယမ္ပိဒံ စက္ခုသမ္ဖဿပစ္စယာ ဥပ္ပဇ္ဇတိ ဝေဒယိတံ သုခံ ဝါ ဒုက္ခံ ဝါ အဒုက္ခမသုခံ ဝါ တမ္ပိ အနတ္တာတိ ပဿတိ။ပေ။ မနော အနတ္တာတိ ပဿတိ၊ ဓမ္မာ အနတ္တာတိ ပဿတိ၊ မနောဝိညာဏံ အနတ္တာတိ ပဿတိ၊ မနောသမ္ဖဿော အနတ္တာတိ ပဿတိ၊ ယမ္ပိဒံ မနောသမ္ဖဿပစ္စယာ ဥပ္ပဇ္ဇတိ ဝေဒယိတံ သုခံ ဝါ ဒုက္ခံ ဝါ အဒုက္ခမသုခံ ဝါ တမ္ပိ အနတ္တာတိ ပဿတိ. အယံ ခေါ သာ၊ ဘိက္ခဝေ၊ နိဗ္ဗာနသပ္ပါယာ ပဋိပဒါ’’တိ. စတုတ္ထံ.