၉. အဇ္ဈတ္တာနတ္တဟေတုသုတ္တံ

၁၄၂. ‘‘စက္ခုံ၊ ဘိက္ခဝေ၊ အနတ္တာ. ယောပိ ဟေတု၊ ယောပိ ပစ္စယော စက္ခုဿ ဥပ္ပါဒါယ၊ သောပိ အနတ္တာ. အနတ္တသမ္ဘူတံ၊ ဘိက္ခဝေ၊ စက္ခု ကုတော အတ္တာ ဘဝိဿတိ။ပေ။ ဇိဝှါ အနတ္တာ. ယောပိ ဟေတု ယောပိ ပစ္စယော ဇိဝှါယ ဥပ္ပါဒါယ၊ သောပိ အနတ္တာ. အနတ္တသမ္ဘူတာ၊ ဘိက္ခဝေ၊ ဇိဝှါ ကုတော အတ္တာ ဘဝိဿတိ။ပေ။ မနော အနတ္တာ. ယောပိ ဟေတု ယောပိ ပစ္စယော မနဿ ဥပ္ပါဒါယ၊ သောပိ အနတ္တာ. အနတ္တသမ္ဘူတော၊ ဘိက္ခဝေ၊ မနော ကုတော အတ္တာ ဘဝိဿတိ! ဧဝံ ပဿံ။ပေ။ ‘ခီဏာ ဇာတိ၊ ဝုသိတံ ဗြဟ္မစရိယံ၊ ကတံ ကရဏီယံ၊ နာပရံ ဣတ္ထတ္တာယာ’တိ ပဇာနာတီ’’တိ. နဝမံ.