၁၀. ဗာဟိရာနိစ္စဟေတုသုတ္တံ

၁၄၃. ‘‘ရူပါ၊ ဘိက္ခဝေ၊ အနိစ္စာ. ယောပိ ဟေတု၊ ယောပိ ပစ္စယော ရူပါနံ ဥပ္ပါဒါယ၊ သောပိ အနိစ္စော. အနိစ္စသမ္ဘူတာ၊ ဘိက္ခဝေ၊ ရူပါ ကုတော နိစ္စာ ဘဝိဿန္တိ! သဒ္ဒါ။ ဂန္ဓာ။ ရသာ။ ဖောဋ္ဌဗ္ဗာ။ ဓမ္မာ အနိစ္စာ. ယောပိ ဟေတု၊ ယောပိ ပစ္စယော ဓမ္မာနံ ဥပ္ပါဒါယ၊ သောပိ အနိစ္စော. အနိစ္စသမ္ဘူတာ၊ ဘိက္ခဝေ၊ ဓမ္မာ ကုတော နိစ္စာ ဘဝိဿန္တိ! ဧဝံ ပဿံ။ပေ။ ‘ခီဏာ ဇာတိ၊ ဝုသိတံ ဗြဟ္မစရိယံ၊ ကတံ ကရဏီယံ၊ နာပရံ ဣတ္ထတ္တာယာ’တိ ပဇာနာတီ’’တိ. ဒသမံ.