၁၀. ခန္ဓသုတ္တံ

၃၁၁. သာဝတ္ထိနိဒါနံ. ‘‘ရူပံ၊ ဘိက္ခဝေ၊ အနိစ္စံ ဝိပရိဏာမိ အညထာဘာဝိ၊ ဝေဒနာ အနိစ္စာ ဝိပရိဏာမီ အညထာဘာဝီ၊ သညာ။ သင်္ခါရာ အနိစ္စာ ဝိပရိဏာမိနော အညထာဘာဝိနော၊ ဝိညာဏံ အနိစ္စံ ဝိပရိဏာမိ အညထာဘာဝိ. ယော၊ ဘိက္ခဝေ၊ ဣမေ ဓမ္မေ ဧဝံ သဒ္ဒဟတိ အဓိမုစ္စတိ၊ အယံ ဝုစ္စတိ သဒ္ဓါနုသာရီ၊ ဩက္ကန္တော သမ္မတ္တနိယာမံ၊ သပ္ပုရိသဘူမိံ ဩက္ကန္တော၊ ဝီတိဝတ္တော ပုထုဇ္ဇနဘူမိံ၊ အဘဗ္ဗော တံ ကမ္မံ ကာတုံ၊ ယံ ကမ္မံ ကတွာ နိရယံ ဝါ တိရစ္ဆာနယောနိံ ဝါ ပေတ္တိဝိသယံ ဝါ ဥပပဇ္ဇေယျ၊ အဘဗ္ဗော စ တာဝ ကာလံ ကာတုံ ယာဝ န သောတာပတ္တိဖလံ သစ္ဆိကရောတိ’’.

‘‘ယဿ ခေါ၊ ဘိက္ခဝေ၊ ဣမေ ဓမ္မာ ဧဝံ ပညာယ မတ္တသော နိဇ္ဈာနံ ခမန္တိ၊ အယံ ဝုစ္စတိ – ‘ဓမ္မာနုသာရီ၊ ဩက္ကန္တော သမ္မတ္တနိယာမံ၊ သပ္ပုရိသဘူမိံ ဩက္ကန္တော၊ ဝီတိဝတ္တော ပုထုဇ္ဇနဘူမိံ၊ အဘဗ္ဗော တံ ကမ္မံ ကာတုံ၊ ယံ ကမ္မံ ကတွာ နိရယံ ဝါ တိရစ္ဆာနယောနိံ ဝါ ပေတ္တိဝိသယံ ဝါ ဥပပဇ္ဇေယျ၊ အဘဗ္ဗော စ တာဝ ကာလံ ကာတုံ ယာဝ န သောတာပတ္တိဖလံ သစ္ဆိကရောတိ’. ယော၊ ဘိက္ခဝေ၊ ဣမေ ဓမ္မေ ဧဝံ ပဇာနာတိ ဧဝံ ပဿတိ၊ အယံ ဝုစ္စတိ – ‘သောတာပန္နော အဝိနိပါတဓမ္မော နိယတော သမ္ဗောဓိပရာယနော’’’တိ. ဒသမံ.

ဩက္ကန္တသံယုတ္တံ [ဩက္ကန္တိကသံယုတ္တံ (ပီ. က.)] သမတ္တံ.