၃. ဘဝနေတ္တိသုတ္တံ

၁၆၂. သာဝတ္ထိနိဒါနံ. ဧကမန္တံ နိသိန္နော ခေါ အာယသ္မာ ရာဓော ဘဂဝန္တံ ဧတဒဝေါစ – ‘‘‘ဘဝနေတ္တိနိရောဓော [ဘဝနေတ္တိ (သီ. သျာ. ကံ. ပီ.)]၊ ဘဝနေတ္တိနိရောဓော’တိ [ဘဝနေတ္တီတိ (သီ. သျာ. ကံ.)]၊ ဘန္တေ၊ ဝုစ္စတိ. ကတမာ နု ခေါ၊ ဘန္တေ၊ ဘဝနေတ္တိ၊ ကတမော ဘဝနေတ္တိနိရောဓော’’တိ? ‘‘ရူပေ ခေါ၊ ရာဓ၊ ယော ဆန္ဒော ယော ရာဂေါ ယာ နန္ဒီ ယာ တဏှာ ယေ ဥပယုပါဒါနာ စေတသော အဓိဋ္ဌာနာဘိနိဝေသာနုသယာ – အယံ ဝုစ္စတိ ဘဝနေတ္တိ. တေသံ နိရောဓော [နိရောဓာ (သီ. သျာ. ကံ. ပီ.)] ဘဝနေတ္တိနိရောဓော. ဝေဒနာယ။ သညာယ။ သင်္ခါရေသု ။ ဝိညာဏေ ယော ဆန္ဒော။ပေ။ အဓိဋ္ဌာနာဘိနိဝေသာနုသယာ – အယံ ဝုစ္စတိ ဘဝနေတ္တိ. တေသံ နိရောဓော ဘဝနေတ္တိနိရောဓော’’တိ. တတိယံ.