၁. မာရသုတ္တံ

၁၆၀. သာဝတ္ထိနိဒါနံ. အထ ခေါ အာယသ္မာ ရာဓော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ရာဓော ဘဂဝန္တံ ဧတဒဝေါစ –

‘‘‘မာရော၊ မာရော’တိ၊ ဘန္တေ၊ ဝုစ္စတိ. ကိတ္တာဝတာ နု ခေါ၊ ဘန္တေ၊ မာရော’’တိ? ‘‘ရူပေ ခေါ၊ ရာဓ၊ သတိ မာရော ဝါ အဿ မာရေတာ ဝါ ယော ဝါ ပန မီယတိ. တသ္မာတိဟ တွံ၊ ရာဓ၊ ရူပံ မာရောတိ ပဿ၊ မာရေတာတိ ပဿ၊ မီယတီတိ ပဿ၊ ရောဂေါတိ ပဿ၊ ဂဏ္ဍောတိ ပဿ၊ သလ္လန္တိ ပဿ၊ အဃန္တိ ပဿ၊ အဃဘူတန္တိ ပဿ. ယေ နံ ဧဝံ ပဿန္တိ တေ သမ္မာ ပဿန္တိ. ဝေဒနာယ သတိ။ သညာယ သတိ။ သင်္ခါရေသု သတိ။ ဝိညာဏေ သတိ မာရော ဝါ အဿ မာရေတာ ဝါ ယော ဝါ ပန မီယတိ. တသ္မာတိဟ တွံ၊ ရာဓ၊ ဝိညာဏံ မာရောတိ ပဿ၊ မာရေတာတိ ပဿ၊ မီယတီတိ ပဿ၊ ရောဂေါတိ ပဿ၊ ဂဏ္ဍောတိ ပဿ၊ သလ္လန္တိ ပဿ၊ အဃန္တိ ပဿ၊ အဃဘူတန္တိ ပဿ. ယေ နံ ဧဝံ ပဿန္တိ၊ တေ သမ္မာ ပဿန္တီ’’တိ.

‘‘သမ္မာဒဿနံ ပန၊ ဘန္တေ၊ ကိမတ္ထိယ’’န္တိ? ‘‘သမ္မာဒဿနံ ခေါ၊ ရာဓ၊ နိဗ္ဗိဒတ္ထံ’’. ‘‘နိဗ္ဗိဒါ ပန၊ ဘန္တေ၊ ကိမတ္ထိယာ’’တိ? ‘‘နိဗ္ဗိဒါ ခေါ၊ ရာဓ၊ ဝိရာဂတ္ထာ’’. ‘‘ဝိရာဂေါ ပန၊ ဘန္တေ၊ ကိမတ္ထိယော’’တိ? ‘‘ဝိရာဂေါ ခေါ၊ ရာဓ၊ ဝိမုတ္တတ္ထော’’. ‘‘ဝိမုတ္တိ ပန၊ ဘန္တေ၊ ကိမတ္ထိယာ’’တိ? ‘‘ဝိမုတ္တိ ခေါ၊ ရာဓ၊ နိဗ္ဗာနတ္ထာ’’. ‘‘နိဗ္ဗာနံ ပန၊ ဘန္တေ၊ ကိမတ္ထိယ’’န္တိ? ‘‘အစ္စယာသိ [အစ္စသရာ (သီ. သျာ. ကံ.)၊ အဿ (ပီ.)၊ အစ္စယာ (က.)]၊ ရာဓ၊ ပဉှံ၊ နာသက္ခိ ပဉှဿ ပရိယန္တံ ဂဟေတုံ. နိဗ္ဗာနောဂဓဉှိ၊ ရာဓ၊ ဗြဟ္မစရိယံ ဝုဿတိ၊ နိဗ္ဗာနပရာယနံ နိဗ္ဗာနပရိယောသာန’’န္တိ. ပဌမံ.