၃. ကဿပဂေါတ္တသုတ္တံ

၂၂၃. ဧကံ သမယံ အာယသ္မာ ကဿပဂေါတ္တော ကောသလေသု ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန အာယသ္မာ ကဿပဂေါတ္တော ဒိဝါဝိဟာရဂတော အညတရံ ဆေတံ ဩဝဒတိ. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ အာယသ္မန္တံ ကဿပဂေါတ္တံ သံဝေဇေတုကာမာ ယေနာယသ္မာ ကဿပဂေါတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ ကဿပဂေါတ္တံ ဂါထာဟိ အဇ္ဈဘာသိ –

‘‘ဂိရိဒုဂ္ဂစရံ ဆေတံ၊ အပ္ပပညံ အစေတသံ၊

အကာလေ ဩဝဒံ ဘိက္ခု၊ မန္ဒောဝ ပဋိဘာတိ မံ.

‘‘သုဏာတိ န ဝိဇာနာတိ၊ အာလောကေတိ န ပဿတိ၊

ဓမ္မသ္မိံ ဘညမာနသ္မိံ၊ အတ္ထံ ဗာလော န ဗုဇ္ဈတိ.

‘‘သစေပိ ဒသ ပဇ္ဇောတေ၊ ဓာရယိဿသိ ကဿပ၊

နေဝ ဒက္ခတိ ရူပါနိ၊ စက္ခု ဟိဿ န ဝိဇ္ဇတီ’’တိ.

အထ ခေါ အာယသ္မာ ကဿပဂေါတ္တော တာယ ဒေဝတာယ သံဝေဇိတော သံဝေဂမာပါဒီတိ.